जैसलमेर-जोधपूर बस अपघात: दिवाळीच्या सुट्ट्यांसाठी घरी निघालेला जितेश जिवंत जळला; 20 प्रवाशांचा मृत्यू
जैसलमेर-जोधपूर बस अपघात: दिवाळीच्या सुट्ट्यांसाठी घरी निघालेला जितेश जिवंत जळला; 20 प्रवाशांचा मृत्यू
राजस्थानमधील जैसलमेर-जोधपूर एसी स्लीपर बसमध्ये शॉर्ट सर्किटमुळे भीषण आग लागली. या अपघातात २० प्रवाशांचा मृत्यू झाला, तर १५ जखमी झाले. दिवाळीसाठी घरी निघालेला जितेश चौहान यांचा शेवटचा कॉल त्याच्या पत्नीला झाला.
सायली मेमाणे
पुणे १५ ऑक्टोबर २०२५ : राजस्थानमध्ये मंगळवारी घडलेल्या धक्कादायक बस अपघाताने संपूर्ण राज्याला हादरवून ठेवले आहे. जैसलमेरहून जोधपूरकडे जात असलेल्या एका एसी स्लीपर बसमध्ये शॉर्ट सर्किटमुळे भीषण आग लागली, ज्यामुळे २० प्रवाशांचा मृत्यू झाला तर १५ जखमी झाले.
या अपघातात मृत्यूमुखी पडलेल्यांमध्ये जितेश चौहान नावाचा युवकही होता. जितेश रागडच्या पॉवर प्लांटमध्ये काम करत होता आणि दिवाळीसाठी पत्नी आणि मुलांकडे घरी निघाला होता. बसमध्ये बसण्यापूर्वी त्याने आपल्या पत्नीला फोन करून सांगितले की तो बसमध्ये बसला आहे, आणि दिवाळीच्या तयारीबाबत बोलणी झाली. हे शेवटचे शब्द ठरले.
जितेशच्या पत्नीला टीव्हीवर जैसलमेर-जोधपूर मार्गावरील बसमध्ये भीषण आग लागल्याची बातमी कळताच तिचा धक्का बसला. तिने त्याच्याशी सतत फोनवर संपर्क साधण्याचा प्रयत्न केला, परंतु फक्त रिंग वाजत होती. तिच्या मनात भीती आणि चिंता वाढत होती. पोलिसांच्या सूचनेनंतर कुटुंबीय जोधपूरच्या रुग्णालयात पोहोचले, परंतु जितेश कुठे दिसला नाही.
जितेशच्या मृतदेहाची ओळख सध्या डीएनए तपासणीच्या माध्यमातून निश्चित केली जाणार आहे. जितेशचा भाऊ गजेश चौहान म्हणतो की, दिवाळीचा आनंद दु:खात बदलला असून शेवटच्या कॉलमध्ये जितेशची आठवण कायम राहील.
या भीषण अपघातामुळे बसमधील प्रवाशांची संख्या आणि आपत्कालीन प्रतिसाद यावर चर्चा सुरू झाली आहे. जखमी प्रवाशांवर जोधपूरच्या विविध रुग्णालयात उपचार सुरू आहेत. पोलीस आणि अग्निशामक दलाने घटनास्थळी धाव घेत आग विझवली, मात्र बस पूर्णपणे जळून नष्ट झाली.
विशेष म्हणजे, शॉर्ट सर्किटमुळे सुरू झालेली ही आग इतकी झपाट्याने पसरली की प्रवाशांना सुरक्षितपणे बाहेर पडण्याची संधी मिळाली नाही. यातून वाहनांतील इलेक्ट्रिकल सुरक्षा आणि बस कंपन्यांच्या देखभाल प्रक्रियेची गंभीर चर्चा सुरू झाली आहे.
स्थानिक प्रशासनाने या घटनेची चौकशी सुरू केली असून, भविष्यात अशा प्रकारच्या दुर्घटना टाळण्यासाठी कडक उपाययोजना करण्याचे आश्वासन दिले आहे. या अपघातामुळे प्रवाशांच्या सुरक्षेसाठी वाहनांचे नियमित तपासणी आणि अग्निशमन उपाय याविषयी जागरूकता वाढवण्याची गरज अधोरेखित झाली आहे.
जैसलमेर-जोधपूर बस अपघाताची ही घटना दिवाळीच्या सणाच्या पार्श्वभूमीवर अधिक दुःखद ठरली आहे. जितेशसारख्या अनेक प्रवाशांचा हे हादरवणारे मृत्यू आणि जखमी झाल्यामुळे कुटुंबीयांवर दु:खाचा डोंगर कोसळला आहे.
