नालासोपारा: अल्पवयीन विद्यार्थिनीची छेडछाड करणाऱ्या शिक्षकाला पालक व नागरिकांचा चोप
नालासोपारा: अल्पवयीन विद्यार्थिनीची छेडछाड करणाऱ्या शिक्षकाला पालक व नागरिकांचा चोप
नालासोपारा पश्चिम येथे अल्पवयीन विद्यार्थिनीची छेडछाड करणाऱ्या शिक्षकाला संतप्त पालक आणि नागरिकांनी चोप दिला. आरोपी राहुल दुबे याच्यावर पोलिसांनी गुन्हा दाखल केला आहे.
सायली मेमाणे
पुणे २५ ऑगस्ट २०२५ : नालासोपारा पश्चिम (पालघर): शिक्षकी पेशाला काळिमा फासणारी घटना नालासोपारा येथे उघडकीस आली आहे. येथील एका खासगी अकॅडमीमध्ये अल्पवयीन विद्यार्थिनीला सतत छेडछाड करून त्रास देणाऱ्या शिक्षकाला संतप्त पालक आणि नागरिकांनी चोप दिला. आरोपी शिक्षकाचे नाव राहुल दुबे असून त्याच्याविरोधात पोलिसांनी गुन्हा दाखल केला आहे.
पीडित विद्यार्थिनीला गेल्या काही दिवसांपासून शिक्षकाकडून संशयास्पद आणि त्रासदायक वर्तनाचा सामना करावा लागत होता. मुलगी दडपणाखाली राहत होती; परंतु अखेर तिने धैर्य दाखवत आपल्या पालकांना सत्य सांगितले. यानंतर पालकांनी तातडीने अकॅडमी गाठली.
मुलीच्या तोंडून सत्य समजल्यावर संतापलेल्या पालकांनी आरोपी शिक्षकाला प्रश्न विचारले. दरम्यान, स्थानिक नागरिक देखील घटनास्थळी जमा झाले आणि त्यांनी आरोपीला चांगलाच चोप दिला. अचानक झालेल्या या गोंधळामुळे परिसरात तणावाचे वातावरण निर्माण झाले.
प्रकरणाची माहिती मिळताच नालासोपारा पोलिसांनी तातडीने घटनास्थळी धाव घेतली. आरोपी राहुल दुबे याला ताब्यात घेऊन त्याच्याविरोधात अल्पवयीन विद्यार्थिनीच्या छेडछाडीचा गुन्हा दाखल करण्यात आला आहे. पुढील तपास पोलिसांकडून सुरू आहे.
या घटनेनंतर स्थानिकांमध्ये संतापाचे वातावरण आहे. शिक्षकी पेशाला कलंक लावणाऱ्या अशा घटनांना कठोर शिक्षा होणे आवश्यक असल्याची मागणी होत आहे. पालक व सामाजिक संस्थांनी यावर तातडीने कठोर पावले उचलण्याची मागणी प्रशासनाकडे केली आहे.
