निगडी प्राधिकरणमध्ये वृद्ध व्यक्ती लुटण्यात आला, ₹6.15 लाखाची चोरी; पोलिसांना १२०० किलोमीटरचा पाठलाग
निगडी प्राधिकरणमध्ये वृद्ध व्यक्ती लुटण्यात आला, ₹6.15 लाखाची चोरी;निगडी प्राधिकरणमध्ये वृद्ध व्यक्ती लुटण्यात आला, ₹6.15 लाखाची चोरी;
पिंपरी-चिंचवडमधील निगडी प्राधिकरणात एका ७६ वर्षीय वृद्धाच्या घरात घुसून चोरट्यांनी ₹6.15 लाखांची लूट केली. वॉकी-टॉकीच्या साहाय्याने चोरट्यांनी मोबाईल टाळून पोलिसांना चकवा दिला. पोलिसांनी १२०० किमीचा पाठलाग करून ३ आरोपींना अटक केली.
सायली मेमाणे
पुणे १ ऑगस्ट २०२५ : पिंपरी-चिंचवड शहरात सुरक्षित समजल्या जाणाऱ्या निगडी प्राधिकरण भागात एका ७६ वर्षीय वृद्ध व्यक्तीच्या बंगल्यावर मोठ्या प्रमाणावर चोरीची घटना घडली आहे. तब्बल ₹6.15 लाखांच्या किंमतीच्या सोन्याचे दागिने, चांदी, घड्याळे, रोख रक्कम आणि महत्त्वाचे कागदपत्रे लंपास करण्यात आली. ही घटना १९ जुलैच्या रात्री ९ ते ९.३० च्या दरम्यान घडली.
चोरट्यांनी वृद्धाला पिस्तुलाचा धाक दाखवत त्याचे हात-पाय बांधले, तोंडावर चिकटपट्टी लावली आणि घरातील अन्य सदस्यांनाही मागील भागात अडकवले. विशेष म्हणजे, आरोपींनी वॉकी-टॉकीचा वापर करून मोबाईल न वापरता आपसात संपर्क ठेवत पोलिसांना चुकवण्याचा प्रयत्न केला.
या प्रकरणाचा तपास करताना पिंपरी-चिंचवड गुन्हे शाखेने सुमारे १२०० किलोमीटरचा पाठलाग करत राजस्थान आणि महाराष्ट्रातील वेगवेगळ्या भागांमध्ये जाऊन माहिती गोळा केली. २०० हून अधिक सीसीटीव्ही फुटेज तपासल्यानंतर आरोपींचा माग काढण्यात आला.
पोलिसांनी सुरेश लादुराम ढाका (वय २९, रा. दंतीवास, जलौर जिल्हा, राजस्थान), महिपाल विष्णोई (वय १९, रा. तळेगाव मावळ) आणि त्यांच्या एका साथीदाराला अटक केली. आरोपींनी चोरी करताना वापरलेले वॉकी-टॉकी सेट, आधार कार्ड, घरमालकाचे दस्तऐवज, रोख रक्कम, दागिने आणि इतर महत्वाचा मुद्देमाल जप्त करण्यात आला आहे.
पोलिस उपायुक्त शिवाजी पवार यांच्या नेतृत्वाखाली हा तपास करण्यात आला असून, पुढील आरोपींचा शोध सुरु आहे. पोलिसांनी या घटनेनंतर स्थानिक नागरिकांच्या मदतीने वेळीच तक्रार दाखल झाल्यामुळे टोळीला पकडण्यात यश मिळाले. पोलिस अधिकाऱ्यांच्या मते, आरोपी हे परप्रांतीय असून त्यांनी अशा स्वरूपाचे गुन्हे यापूर्वीही केले असल्याचा संशय आहे. या प्रकारामुळे नागरिकांमध्ये भीतीचं वातावरण असून, घरांमध्ये सुरक्षा व्यवस्था मजबूत करण्याचं आवाहन करण्यात येत आहे.
