पुण्यात कोथरूड एमआयटी कॉलेजबाहेर विद्यार्थ्यांमध्ये हाणामारी, सोशल मीडियावर व्हिडिओ व्हायरल
पुण्यातील कोथरूडमधील एमआयटी कॉलेजबाहेर विद्यार्थ्यांमध्ये हाणामारी, सोशल मीडियावर व्हिडिओ व्हायरल
पुण्यात कोथरूडमधील एमआयटी कॉलेजबाहेर विद्यार्थ्यांमध्ये अचानक हाणामारी झाली. या घटनेचा व्हिडिओ सोशल मीडियावर व्हायरल झाला असून परिसरात भीतीचं वातावरण निर्माण झालं आहे.
सायली मेमाणे
पुणे ७ ऑगस्ट २०२५ : पुण्यातील कोथरूड परिसरातील एमआयटी कॉलेजबाहेर विद्यार्थ्यांमध्ये हाणामारी झाल्याची घटना समोर आली आहे. या प्रकारामुळे परिसरात भीतीचं वातावरण निर्माण झालं असून, कॉलेज परिसरातील सुरक्षेविषयी प्रश्नचिन्ह निर्माण झालं आहे. हाणामारीचा नेमका कारण स्पष्ट झालेला नसला तरी हा संपूर्ण प्रकार सोशल मीडियावर व्हायरल झालेल्या व्हिडिओमुळे चांगलाच गाजतो आहे.
प्राथमिक माहितीनुसार, एमआयटी कॉलेज परिसरात सकाळच्या सुमारास काही विद्यार्थ्यांमध्ये जोरदार वाद झाला. हा वाद हाणामारीपर्यंत पोहोचल्याने एकच खळबळ उडाली. स्थानिक नागरिक आणि इतर विद्यार्थ्यांच्या हस्तक्षेपानंतर हा प्रकार शांत झाला असला तरी त्यानंतर या घटनेचा व्हिडिओ सोशल मीडियावर झपाट्याने व्हायरल झाला.
या घटनेमुळे कॉलेजमध्ये दररोज येणाऱ्या विद्यार्थ्यांमध्ये भीतीचं वातावरण पसरलं आहे. शिक्षणाच्या वातावरणात अशा प्रकारची हाणामारी होणे ही अत्यंत गंभीर बाब मानली जात आहे. पोलिसांकडून यासंदर्भात कोणती अधिकृत प्रतिक्रिया मिळालेली नसली तरी, संबंधित व्हिडिओ आणि साक्षीदारांच्या आधारे तपास सुरू असल्याची माहिती समजते.
कोथरूड परिसरातील कॉलेजबाहेर अशा घटना घडणे ही चिंतेची बाब आहे. पालक वर्गाने आणि शैक्षणिक संस्थांनी विद्यार्थ्यांमध्ये समजूतदारपणा आणि संवाद यावर भर देण्याची गरज अधोरेखित झाली आहे. सोशल मीडियावर व्हायरल झालेला व्हिडिओ पाहता, हा प्रकार नियोजनबद्ध होता की अचानक घडलेला, याची चौकशी आता पोलिसांसमोरची प्राथमिक जबाबदारी ठरणार आहे.
