घरकाम करणाऱ्या महिलांना 1500 रुपये, 10 रुपयात जेवण! ठाकरे बंधूंचा संयुक्त वचननामा काय सांगतो?
घरकाम करणाऱ्या महिलांना 1500 रुपये, 10 रुपयात जेवण! ठाकरे बंधूंचा संयुक्त वचननामा काय सांगतो?
मुंबई महापालिका निवडणुकीआधी सेना, मनसे आणि राष्ट्रवादीचा संयुक्त वचननामा जाहीर. घरकाम करणाऱ्या महिलांना 1500 रुपये, 10 रुपयात जेवण, मोफत प्रवास, वीज व करमाफीसह ठाकरेंची मोठी आश्वासने वाचा सविस्तर.
०४ जानेवारी २०२६ : मुंबई महापालिका निवडणुकीच्या पार्श्वभूमीवर राज्याच्या राजकारणात आज एक ऐतिहासिक क्षण पाहायला मिळाला. तब्बल 20 वर्षांनंतर मनसे अध्यक्ष राज ठाकरे आणि शिवसेना (उद्धव बाळासाहेब ठाकरे) प्रमुख उद्धव ठाकरे हे शिवसेना भवनात एकत्र आले. यावेळी शिवसेना, महाराष्ट्र नवनिर्माण सेना आणि शरद पवार यांच्या नेतृत्वाखालील राष्ट्रवादी काँग्रेस यांचा संयुक्त ‘शिवशक्ती’ वचननामा अधिकृतपणे प्रकाशित करण्यात आला. या वचननाम्यामुळे मुंबईच्या राजकारणात मोठी चर्चा सुरू झाली असून ठाकरेंनी दिलेल्या शब्दांकडे सर्वांचे लक्ष लागले आहे.
या संयुक्त वचननाम्यात सर्वसामान्य मुंबईकर, कष्टकरी वर्ग, महिला, विद्यार्थी आणि ज्येष्ठ नागरिक यांच्यासाठी अनेक महत्त्वाची आणि थेट लाभ देणारी आश्वासने देण्यात आली आहेत. विशेषतः घरकाम करणाऱ्या महिलांसाठी मोठी घोषणा करण्यात आली असून त्यांच्या नोंदणीद्वारे नोंदणीकृत महिलांना दरमहा 1500 रुपयांचा स्वाभिमान निधी देण्याचे आश्वासन देण्यात आले आहे. यासोबतच 10 रुपयांत जेवण आणि नाश्ता उपलब्ध करून देण्याचा निर्णय हा वचननाम्याचा केंद्रबिंदू ठरत आहे.
महिला आणि नोकरदार पालकांच्या सोयीसाठी कष्टकरी महिलांना सांभाळणारी पाळणाघरे सुरू करण्याची घोषणा करण्यात आली आहे. आरोग्य सुविधांमध्ये पाळीव प्राण्यांसाठी स्वतंत्र दवाखाना, मुंबईसाठी सुपर स्पेशालिस्ट कॅन्सर रुग्णालय आणि रॅपिड बाईक मेडिकल असिस्टंट अॅम्ब्युलन्स सेवा सुरू करण्याचे आश्वासन देण्यात आले आहे. शिक्षण क्षेत्रात महापालिकेच्या शाळांचा दर्जा उंचावण्यावर भर देण्यात आला असून दहावीनंतर बारावीपर्यंत ज्युनियर कॉलेज सुरू करण्यात येणार आहेत. मुंबई पब्लिक स्कूल्स अधिक अत्याधुनिक करण्यात येणार असून मराठी शाळांमध्ये ‘बोलतो मराठी’ हा डिजिटल उपक्रम सुरू करण्याचा निर्धार व्यक्त करण्यात आला आहे.
शहरातील पायाभूत सुविधा सुधारण्यासाठी उत्तम दर्जाचे रस्ते बांधण्यात येणार असून कंत्राटदारांकडून 15 वर्षांची हमी घेतली जाईल, असे वचननाम्यात नमूद करण्यात आले आहे. सांडपाणी प्रक्रिया करणारे मलनिसारण प्रकल्प उभारणे, 12 महिने नालेसफाईची प्रक्रिया राबवणे आणि समुद्राचे पाणी गोड्या पाण्यात रूपांतर करून वापरण्यायोग्य करण्याचा निर्णयही यामध्ये समाविष्ट आहे. पाण्याचे दर स्थिर ठेवून मुंबईकरांना नियमित पाणीपुरवठा करण्याचे आश्वासन देण्यात आले आहे.
सामान्य मुंबईकरांना आर्थिक दिलासा देणाऱ्या घोषणांमध्ये 700 चौ.फुटांपर्यंत मालमत्ता कर माफ करणे, कचरा कर रद्द करणे आणि मुंबईतील नागरिकांना 100 युनिटपर्यंत मोफत वीज देण्याचा समावेश आहे. वाहतूक सुविधांमध्ये बेस्टचा प्रवास खिशाला परवडणारा करण्यासोबतच महिला आणि विद्यार्थ्यांसाठी बेस्ट बसमध्ये मोफत प्रवास, तसेच महापालिकेच्या पार्किंगमध्ये मोफत पार्किंगची सुविधा देण्याचे आश्वासन देण्यात आले आहे. प्रत्येक वार्डात मिनी स्पोर्ट्स कॉम्प्लेक्स आणि आजी-आजोबांसाठी मैदान उभारण्याचाही समावेश या वचननाम्यात आहे.
20 वर्षांनंतर राज ठाकरे शिवसेना भवनात आल्याने आणि तिन्ही पक्ष एकत्र आल्याने राजकीय वर्तुळात याला मोठे महत्त्व दिले जात आहे. शिवसेना खासदार संजय राऊत यांनी ही घडामोड ‘हिंदू अनडिव्हायडेड फॅमिली’सारखी असल्याचे सांगत संयुक्त सभा, संयुक्त पत्रकार परिषद, संयुक्त मुलाखत आणि संयुक्त वचननामा हे एकत्र येण्याचे प्रतीक असल्याचे म्हटले आहे. या वचननाम्यामुळे मुंबई महापालिका निवडणुकीत राजकीय समीकरणे बदलण्याची शक्यता निर्माण झाली असून ठाकरे बंधूंचा शब्द मुंबईकरांच्या अपेक्षांना किती उतरेल, याकडे आता सर्वांचे लक्ष लागले आहे.
Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/
Twitter – https://x.com/NewsDotz
Also Read: Pune’s Latest Information
