जेईई अँडव्हान्स २०२५ : जुन्नरच्या विद्यार्थ्याचा देशात ३२ वा क्रमांक

जेईई अँडव्हान्स २०२५ मध्ये जुन्नर तालुक्यातील एक सामान्य कुटुंबातील विद्यार्थी मोहम्मद अय्युब याने देशात ३२ वी रँक मिळवत प्रेरणादायी यश संपादन केलं आहे

JEE Advanced 2025 परीक्षेचा निकाल देशभरात जाहीर झाला असून, पुणे जिल्ह्यातील जुन्नर या ग्रामीण भागातून येणाऱ्या एका विद्यार्थ्याने संपूर्ण देशाचे लक्ष वेधले आहे. अत्यंत साध्या कुटुंबात वाढलेला मोहम्मद अय्युब सय्यद याने देशात ३२ वा क्रमांक मिळवून स्वतःच्या मेहनतीची चमक दाखवली आहे.

अय्युबचे वडील इलेक्ट्रिशियन असून ते स्थानिक होमगार्डच्या जबाबदाऱ्या देखील पार पाडतात. आर्थिक अडचणी असूनही शिक्षणावर भर देत त्यांनी मुलाला वेळेवर सर्व सुविधा उपलब्ध करून दिल्या. त्यांच्या कष्टाचे चीज करत अय्युबने सातत्यपूर्ण अभ्यासाने देशपातळीवर आपली छाप सोडली आहे.

या विद्यार्थ्याच्या जीवनात सर्व काही सोपं नव्हतं. शिकण्यासाठी पुरेशी साधनं नव्हती, अनेकदा वीज नव्हती, तर कधी इंटरनेटची अडचण होती. पण अय्युबने अडथळ्यांकडे दुर्लक्ष करत आपलं ध्येय पक्कं केलं. अभ्यासाच्या प्रत्येक क्षणात त्याने मेहनतीचा मार्ग स्वीकारला आणि त्याचे फळ आज देशात ३२ व्या क्रमांकाच्या रूपाने मिळालं.

अय्युबच्या यशावर त्याचे शिक्षक, मित्र, गावकऱ्यांनी कौतुकाचा वर्षाव केला आहे. गावात सर्वत्र आनंदाचं वातावरण असून, अय्युब हा आज अनेक ग्रामीण विद्यार्थ्यांसाठी प्रेरणास्त्रोत बनला आहे.

भविष्यात आयआयटी मुंबईमध्ये शिक्षण घेऊन संशोधन करण्याचं त्याचं स्वप्न आहे. “मी जे यश मिळवलं, ते माझ्या वडिलांच्या त्यागामुळे आहे,” असं तो आवर्जून सांगतो. समाजात अशा विद्यार्थ्यांनी आपला ठसा उमटवावा, हीच सर्वांची अपेक्षा आहे.