पुणे महापालिकेच्या पदाधिकाऱ्यांसाठी अलिशान गाड्यांची खरेदी; सव्वा पाच कोटींचा खर्च, ई-व्हेईकल निर्णयाकडे दुर्लक्ष
पुणे महापालिकेच्या पदाधिकाऱ्यांसाठी अलिशान गाड्यांची खरेदी; सव्वा पाच कोटींचा खर्च, ई-व्हेईकल निर्णयाकडे दुर्लक्ष
पुणे महापालिकेतील नवीन पदाधिकाऱ्यांसाठी २८ अलिशान गाड्यांची खरेदी करण्यात येणार असून यासाठी सव्वा पाच कोटी रुपयांचा खर्च होणार आहे. ई-व्हेईकल धोरणाकडे दुर्लक्ष झाल्याचा आरोप.
पुणे ०८ जानेवारी २०२६ : पुणे महापालिकेतील नवीन पदाधिकाऱ्यांसाठी तब्बल सव्वा पाच कोटी रुपये खर्च करून २८ अलिशान गाड्यांची खरेदी करण्यात येणार असल्याची माहिती समोर आली आहे. तब्बल नऊ वर्षांनंतर पुणे महापालिकेचे नवीन सभागृह अस्तित्वात येत असून, त्यासोबतच महापौर, उपमहापौर, विरोधी पक्ष नेता, स्थायी समिती अध्यक्ष, सभागृह नेता तसेच प्रभाग समिती आणि विषय समितीच्या अध्यक्षांसाठी महागड्या गाड्या देण्याचा निर्णय घेण्यात आला आहे. मात्र, यामुळे महापालिकेच्या ई-व्हेईकल धोरणावर प्रश्नचिन्ह उपस्थित झाले आहे.
महापालिका सभागृहात याआधी अधिकारी आणि पदाधिकारी यांच्यासाठी वाहन खरेदी करताना ती वाहने ई-व्हेईकल असावीत, असा ठराव मंजूर करण्यात आला होता. त्या निर्णयानुसार पहिल्या टप्प्यात काही अधिकाऱ्यांसाठी ई-व्हेईकल खरेदी करण्यात आल्या होत्या. त्यासाठी महापालिकेच्या विविध कार्यालये तसेच मुख्य इमारतीच्या पार्किंग परिसरात चार्जिंग स्टेशनची उभारणीही करण्यात आली होती. मात्र, आता नवीन पदाधिकाऱ्यांसाठी करण्यात येणाऱ्या वाहन खरेदीत ई-व्हेईकलचा विचार न करता पारंपरिक इंधनावरील आलिशान गाड्यांची निवड करण्यात आल्याचे स्पष्ट झाले आहे.
महापौरांसाठी एसयूव्ही प्रकारातील ‘इनोव्हा हायक्रॉस’ ही गाडी खरेदी करण्यात येणार असून तिचा खर्च सुमारे २५ लाख ४१ हजार रुपये अपेक्षित आहे. विरोधी पक्ष नेता आणि शहर सुधारणा समिती अध्यक्षांसाठी ‘मारुती व्हिक्टोरिअस’ ही एसयूव्ही देण्यात येणार असून त्यासाठी सुमारे १५ लाख ६५ हजार रुपये खर्च करण्यात येणार आहेत. उपमहापौर, स्थायी समिती अध्यक्ष आणि सभागृह नेता यांच्यासाठी सेदान प्रकारातील ‘ह्युंदाई व्हर्ना’ कार देण्यात येणार असून प्रत्येकी सुमारे १४ लाख रुपये खर्च अपेक्षित आहे. तर प्रभाग समिती आणि विषय समितीच्या अध्यक्षांसाठी ‘ग्रँड विटारा’ कार खरेदी केली जाणार आहे.
या सर्व २८ वाहनांच्या खरेदीसाठी एकूण खर्च सव्वा पाच कोटी रुपयांपर्यंत जाणार आहे. एकीकडे पर्यावरणपूरक धोरणांचा आग्रह धरण्यात येत असताना आणि नागरिकांकडून ई-व्हेईकल वापरासाठी जनजागृती केली जात असताना, महापालिकेच्या पदाधिकाऱ्यांसाठी मात्र महागड्या इंधनावरील गाड्या खरेदी करण्याचा निर्णय घेतल्याने टीकेचा सूर उमटत आहे. पुणे शहर हे स्मार्ट सिटी आणि पर्यावरणपूरक शहर म्हणून ओळख निर्माण करण्याचा प्रयत्न करत असताना, अशा निर्णयांमुळे महापालिकेच्या धोरणांतील विसंगती अधोरेखित होत आहे.
नागरिकांमध्ये आधीच महागाई, पायाभूत सुविधा, रस्त्यांची अवस्था, पाणीपुरवठा आणि वाहतूक समस्यांबाबत नाराजी असताना, पदाधिकाऱ्यांसाठी कोट्यवधींच्या गाड्या खरेदी करण्याचा निर्णय कितपत योग्य आहे, असा सवाल उपस्थित केला जात आहे. आगामी काळात या निर्णयावर राजकीय आणि सामाजिक पातळीवर तीव्र प्रतिक्रिया उमटण्याची शक्यता असून, ई-व्हेईकल धोरणाची अंमलबजावणी नेमकी कुठे अडखळली, याबाबत महापालिका प्रशासनाने स्पष्ट भूमिका मांडावी, अशी मागणी होत आहे.
Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/
Twitter – https://x.com/NewsDotz
Also Read: Pune’s Latest Information
