पृथ्वी शॉची नवी सुरुवात! मुंबईचा निरोप घेत आता खेळणार महाराष्ट्रासाठी
अखेर Prithvi Shaw चा मुंबईला रामराम!
Prithvi Shaw ने मुंबई संघाला रामराम ठोकून महाराष्ट्र संघात प्रवेश केला. MCA कडून अधिकृत घोषणा; ऋतुराज गायकवाडसोबत खेळणार.
सायली मेमाणे
पुणे ८ जुलै २०२५ : खेर Prithvi Shaw चा मुंबईला रामराम! ऋतुराज गायकवाडसोबत महाराष्ट्र संघात नवा डाव
भारतीय संघाचा आक्रमक सलामीवीर पृथ्वी शॉ आता महाराष्ट्राच्या रणजी संघासाठी खेळताना दिसणार आहे. मुंबई क्रिकेट असोसिएशनचा भाग असलेल्या शॉने अखेर या संघाला सोडचिठ्ठी दिली असून, महाराष्ट्र क्रिकेट असोसिएशनने (MCA) त्याच्या प्रवेशाची अधिकृत घोषणा केली आहे. हा बदल देशांतर्गत क्रिकेटमधील एक मोठी घडामोड मानली जात आहे, जी महाराष्ट्र संघाच्या खेळात नवे बळ निर्माण करू शकते.
पृथ्वी शॉ हा गेल्या काही महिन्यांपासून मुंबई संघाकडून नाराज होता, विशेषतः त्याच्या फिटनेस, शिस्तभंग आणि संधीच्या अभावामुळे. त्यामुळे त्याने मुंबई क्रिकेट असोसिएशनकडे ना हरकत प्रमाणपत्राची (NOC) मागणी केली होती, जी संघाच्या गव्हर्निंग कौन्सिलने मान्य केली. शॉने मुंबईसाठी शेवटचा सामना सय्यद मुश्ताक अली ट्रॉफी स्पर्धेत मध्य प्रदेशविरुद्ध खेळला होता. त्यानंतर त्याला रणजी संघातून वगळण्यात आले होते. आता तो महाराष्ट्रासाठी रणजी ट्रॉफीच्या आगामी हंगामात खेळेल.
MCA च्या निवेदनात पृथ्वी शॉचे देशांतर्गत आणि आंतरराष्ट्रीय क्रिकेटमधील योगदान गौरवण्यात आले आहे. शॉने भारतासाठी कसोटी, एकदिवसीय आणि टी-२० स्वरूपात प्रभावी कामगिरी केली आहे. त्याच्या आक्रमक शैलीमुळे आणि सामने जिंकण्याच्या क्षमतेमुळे त्याची मोठी ओळख आहे. तसेच IPL मध्येही त्याने जबरदस्त फलंदाजी करत सर्वांची मने जिंकली आहेत.
शॉच्या या निर्णयावर स्वतः त्याने प्रतिक्रिया देताना सांगितले, “माझ्या कारकिर्दीच्या या टप्प्यावर महाराष्ट्र संघात सामील होणे हे माझ्यासाठी महत्त्वाचं आहे. मला पुन्हा माझ्या क्रिकेटवर लक्ष केंद्रित करता येईल आणि पुढे जाण्यास मदत होईल. मी मुंबई क्रिकेट असोसिएशनचे मन:पूर्वक आभार मानतो की त्यांनी मला इतके वर्ष खेळण्याची संधी दिली.”
MCA चे अध्यक्ष रोहित पवार यांनी शॉच्या स्वागतात उत्साह व्यक्त केला आहे. त्यांच्या मते, “पृथ्वी शॉसारख्या आंतरराष्ट्रीय दर्जाच्या खेळाडूचा आमच्या संघात समावेश होणे, ही संघासाठी मोठी शक्ती आहे. ऋतुराज गायकवाड, अंकित बावणे, राहुल त्रिपाठी, मुकेश चौधरी, रजनीश गुरबानी यांच्यासारख्या अनुभवी खेळाडूंसोबत शॉचा अनुभव संघाला अधिक बळकट करेल. विशेषतः तरुण खेळाडूंना मार्गदर्शन करण्यासाठी त्याची उपस्थिती खूप महत्त्वाची ठरणार आहे.”
पृथ्वी शॉची महाराष्ट्र संघात एंट्री ही केवळ एक खेळाडूची स्थलांतरण घटना नसून, देशांतर्गत क्रिकेटच्या राजकारणात आणि स्पर्धात्मकतेत एक नवा अध्याय सुरू होण्यासारखा आहे. आता सर्वांचे लक्ष शॉच्या नव्या सुरुवातीकडे लागले आहे — तो महाराष्ट्राच्या संघात आपली छाप कशी सोडतो आणि नव्या संघात पुनरागमन करून राष्ट्रीय संघात आपले स्थान परत मिळवतो का, हे पाहणे उत्सुकतेचे ठरणार आहे.
