भुशी डॅम दुर्घटना: २ तरुणांचा बुडून मृत्यू, पाण्यात पोहण्याचा मोह ठरला जीवघेणा

भुशी डॅममध्ये पाण्यात पोहण्यासाठी गेलेल्या दोन तरुणांचा बुडून मृत्यू झाला. उत्तर प्रदेशातील मूळ रहिवासी असलेले हे तरुण लोणावळ्यात कामानिमित्त राहत होते. पावसाळ्यात पर्यटनस्थळी सतर्कता बाळगण्याचे आवाहन.

सायली मेमाणे

पुणे : 9 जून २०२५ : भुशी डॅममध्ये रविवार ८ जून रोजी एक अत्यंत दुर्दैवी घटना घडली. लोणावळ्यातील या प्रसिद्ध पर्यटनस्थळी फिरायला आलेल्या तरुणांच्या गटातून दोन तरुणांचा पाण्यात बुडून मृत्यू झाला. पावसाळ्याच्या सुरुवातीस भुशी डॅममध्ये पर्यटकांची गर्दी होत असते. पाण्याच्या प्रवाहात खेळण्याचा मोह अनेकांना होतो आणि काही वेळा त्याचे परिणाम जीवघेणे ठरतात. या दोघांनीही डॅमच्या पाण्यात पोहण्याचा प्रयत्न केला. मात्र पाण्याची खोली व प्रवाहाचा अंदाज न आल्यामुळे हे दोघेही पाण्यात बुडाले. सोबत असलेल्या मित्रांनी आरडाओरड केली, पण मदत पोहोचेपर्यंत उशीर झाला होता.

घटनेची माहिती मिळताच लोणावळा पोलीस, आपत्कालीन सेवा आणि शिवदुर्ग रेस्क्यू टीम घटनास्थळी दाखल झाली. त्यांनी पाण्यात शोधमोहीम राबवून दोन्ही तरुणांचे मृतदेह बाहेर काढले. मृत्यू झालेल्या तरुणांची ओळख साहिल अश्रफ अली शेख आणि मोहम्मद जमाल अशी झाली आहे. हे दोघेही उत्तर प्रदेशातील असून लोणावळ्यात कामानिमित्त वास्तव्यास होते.

ही घटना पुन्हा एकदा डोंगरकपारी आणि धरण परिसरात सुरक्षिततेच्या नियमांकडे दुर्लक्ष केल्याने काय भीषण परिणाम होऊ शकतात, याची आठवण करून देते. दरवर्षी पावसाळ्यात महाराष्ट्रातील अनेक ठिकाणी अशी दुर्घटना घडत असते. धरण परिसरात जलप्रवाह वेगवान आणि अनिश्चित असतो, त्यामुळे स्थानिक प्रशासनाकडून सतत सूचना देण्यात येतात की अशा ठिकाणी पोहणे टाळावे.

या घटनेच्या पार्श्वभूमीवर आणखी एक हृदयद्रावक घटना गडचिरोली जिल्ह्यात घडली. महाराष्ट्र-तेलंगणा सीमेजवळील गोदावरी नदीत ७ जून रोजी तेलंगणातील सहा बालकांचा पाण्यात बुडून मृत्यू झाला. ही मुलं नदीत आंघोळीसाठी गेली होती. जवळपास १२ तास चाललेल्या शोध मोहिमेनंतर सर्व मृतदेह बाहेर काढण्यात आले. दोन्ही घटनांनी राज्यभरात शोककळा पसरली आहे.