महिलांच्या डब्यात घुसून विकृत कृत्य; १८ वर्षीय कॉलेज तरुणीला धावत्या लोकलमधून ढकलले, मुंबईत खळबळ
महिलांच्या डब्यात घुसून विकृत कृत्य; १८ वर्षीय कॉलेज तरुणीला धावत्या लोकलमधून ढकलले, मुंबईत खळबळ
Mumbai Local Viral Video: महिलांच्या डब्यात घुसलेल्या व्यक्तीने कॉलेज तरुणीला चालत्या लोकलमधून ढकलले; व्हिडिओ व्हायरल, महिला सुरक्षेचा प्रश्न ऐरणीवर.
पुणे २२ डिसेंबर २०२५ : मुंबई लोकलमधील महिलांच्या सुरक्षेबाबत पुन्हा एकदा गंभीर प्रश्न उपस्थित झाला असून गुरुवारी सकाळी घडलेल्या एका धक्कादायक घटनेचा व्हिडिओ सध्या सोशल मीडियावर प्रचंड व्हायरल होत आहे. मुंबईची जीवनवाहिनी म्हणून ओळखल्या जाणाऱ्या लोकल ट्रेनमधील महिला डब्यात एका विकृत प्रवृत्तीच्या व्यक्तीने घुसखोरी करत १८ वर्षीय महाविद्यालयीन तरुणीला धावत्या लोकलमधून ढकलून दिल्याची भयावह घटना घडली आहे. ही घटना पनवेल ते खांदेश्वर स्थानकांदरम्यान सकाळच्या गर्दीच्या वेळी घडली.
मिळालेल्या माहितीनुसार, श्वेता संजय महाडीक ही तरुणी खारघर येथील एका अभियांत्रिकी महाविद्यालयात शिक्षण घेत असून ती गुरुवारी सकाळी ७:५९ च्या पनवेल-सीएसएमटी लोकलने आपल्या मैत्रिणीसोबत कॉलेजकडे निघाली होती. महिलांच्या डब्यात प्रवास सुरू असताना शेख अख्तर नवाज नावाचा ५० वर्षीय पुरुष प्रवासी बेकायदेशीरपणे त्या डब्यात चढला. महिलांच्या डब्यात पुरुषाचा प्रवेश झाल्याचे लक्षात येताच डब्यातील महिला प्रवाशांनी त्याला जाब विचारत तात्काळ खाली उतरण्यास सांगितले.
याच दरम्यान आरोपी आणि महिला प्रवाशांमध्ये वाद झाला. तरुणी श्वेतानेही आरोपीला विरोध करत डब्यातून उतरण्यास सांगितले. मात्र या विरोधाचा आरोपीला प्रचंड राग आला. रागाच्या भरात आणि कुठलाही विचार न करता आरोपीने धावत्या लोकलमध्येच श्वेताला जोरदार धक्का दिला आणि तिला थेट रुळावर ढकलून दिले. हा क्षण अत्यंत भीषण असून सुदैवाने मोठा अपघात टळला आणि तरुणीचा जीव वाचला.
या घटनेत श्वेताच्या डोक्याला आणि कंबरेला गंभीर दुखापत झाली असून तिला तातडीने रुग्णालयात दाखल करण्यात आले आहे. सध्या तिच्यावर उपचार सुरू असून तिची प्रकृती स्थिर असल्याची माहिती आहे. घटनेनंतर आरोपीने पळून जाण्याचा प्रयत्न केला, मात्र खांदेश्वर स्थानकात सतर्क प्रवाशांनी प्रसंगावधान राखत त्याला पकडले आणि रेल्वे पोलिसांच्या ताब्यात दिले.
भरदिवसा, गर्दीच्या वेळी आणि महिलांच्या डब्यात घडलेल्या या प्रकारामुळे रेल्वे पोलिसांच्या गस्तीवर आणि एकूणच महिला सुरक्षेच्या व्यवस्थेवर प्रश्नचिन्ह निर्माण झाले आहे. मुंबई लोकलमध्ये महिला प्रवाशांच्या सुरक्षेसाठी विशेष पथके, सीसीटीव्ही आणि पोलिस गस्त असतानाही अशा घटना वारंवार समोर येत असल्याने संताप व्यक्त केला जात आहे.
दरम्यान, या संपूर्ण घटनेचा व्हिडिओ सोशल मीडियावर व्हायरल झाला असून नागरिकांकडून तीव्र प्रतिक्रिया उमटत आहेत. आरोपीवर कठोर कारवाई करण्याची आणि महिलांच्या डब्यातील सुरक्षाव्यवस्था अधिक कडक करण्याची मागणी जोर धरत आहे. मुंबईसारख्या महानगरात महिलांना सुरक्षित प्रवास करता येईल का, हा प्रश्न पुन्हा एकदा ऐरणीवर आला आहे.
Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/
Twitter – https://x.com/NewsDotz
Also Read: Pune’s Latest Information
