मोठी बातमी: वसंत मोरेंच्या अडचणी वाढल्या; आंदोलनामुळे गुन्हा दाखल
वसंत मोरेंच्या अडचणी वाढल्या
कात्रज-कोंढवा रस्त्यावरून परवानगीशिवाय आंदोलन; वसंत मोरे व २५ कार्यकर्त्यांवर गुन्हा दाखल, पोलिस तपास सुरु.
सायली मेमाणे
पुणे २८ जून २०२५ : पुणे शहरात शिवसेना (उद्धव बाळासाहेब ठाकरे) पक्षाचे नेते वसंत मोरे यांच्यावर भारती विद्यापीठ पोलिस ठाण्यात गुन्हा दाखल करण्यात आला आहे. कात्रज-कोंढवा रस्त्याच्या रखडलेल्या कामावरून त्यांनी केलेल्या आंदोलनामुळे त्यांच्या अडचणी वाढल्या आहेत. परवानगी न घेता सार्वजनिक ठिकाणी आंदोलन केल्यामुळे पोलिसांनी वसंत मोरे व त्यांच्यासोबत असलेल्या २५ ते ३० कार्यकर्त्यांवर गुन्हा दाखल केला आहे.
ही कारवाई वसंत मोरे यांनी कात्रज बायपास चौकातील रस्त्याच्या कामासंदर्भात उभारलेल्या आंदोलनावरून झाली आहे. भाजप आमदार योगेश टिळेकर यांच्याकडून कामाची पाहणी सुरु असताना, वसंत मोरे यांनी घटनास्थळी उपस्थित राहून जोरदार घोषणाबाजी केली व प्रश्न उपस्थित केले. पोलिसांनी या कृतीला परवानगीविना आंदोलन मानत गुन्हा दाखल केला.
या प्रकरणाचा उगम काही दिवसांपूर्वी वसंत मोरे यांनी पुणे महापालिका आयुक्त नवल किशोर राम यांना सादर केलेल्या निवेदनात दिसून येतो. त्यांनी निवेदनाद्वारे खालील प्रश्न मांडले होते:
- अंबिका हॉटेल ते बालवडकर बिल्डिंगदरम्यानचा ‘दुष्काळी रस्ता’ १९७२ पासून अस्तित्वात असूनही बंद करण्यात आला आहे.
- कात्रज चौकातील उड्डाणपुलाचे काम वेळेत पूर्ण न झाल्यामुळे नागरिकांना अत्यंत त्रास सहन करावा लागत आहे.
- D.M.R. कन्स्ट्रक्शनच्या कामात वेळेचे पालन होत नसल्याचा आरोप त्यांनी लावला आहे.
- वाहतूक वळविल्यामुळे कोंडीचा त्रास वाढला आहे व वाहतूक विभागावर D.M.R. कडून दबाव असल्याची शंका व्यक्त केली आहे.
- जे.एस.पी.एम. समोरील गटाराचे काम अत्यंत संथगतीने सुरू असून त्यावर PMC नियंत्रण घेत नाही, असेही त्यांनी नमूद केले.
वसंत मोरे यांनी निवेदनात स्पष्ट इशारा दिला होता की, “या प्रश्नांकडे तातडीने लक्ष दिले नाही तर शिवसेना (उद्धव बाळासाहेब ठाकरे) पक्षातर्फे तीव्र आंदोलन छेडले जाईल. त्याची सर्व जबाबदारी D.M.R. कन्स्ट्रक्शन, वाहतूक विभाग आणि महानगरपालिका प्रशासनाची राहील.”
तथापि, यानंतरही जबाबदार यंत्रणांकडून ठोस कारवाई झाली नसल्याने मोरे यांनी प्रत्यक्षात आंदोलन उभारले. आमदार योगेश टिळेकर पाहणीसाठी आले असताना त्यांनी थेट संवाद साधून प्रशासनाच्या दुर्लक्षावर आवाज उठवला. त्यानंतर पोलिसांनी गुन्हा नोंदवला.
सध्या भारती विद्यापीठ पोलिस ठाणे या प्रकरणाचा तपास करत आहे. शहरात वाहतूक कोंडी, रखडलेली कामे आणि प्रकल्प विलंबावरून नागरिकांमध्येही अस्वस्थता आहे. वसंत मोरे यांचे हे आंदोलन त्या असंतोषाचे प्रतीक मानले जात आहे.
राजकीय स्तरावरून या घटनेवर विविध प्रतिक्रिया उमटण्याची शक्यता असून, पुण्यातील नागरी प्रशासन आणि प्रकल्प अंमलबजावणीच्या गतीवर पुन्हा प्रश्न उपस्थित झाले आहेत.
