विजय देवरकोंडावर आदिवासी समाजाची नाराजी, सिरोंच्यात अॅट्रॉसिटी अंतर्गत तक्रार दाखल
विजय देवरकोंडावर आदिवासी समाजाची नाराजी
आदिवासी समूहाबद्दल विवादित विधान केल्याचा आरोप, सिरोंचा पोलिस ठाण्यात विजय देवरकोंंडाविरुद्ध अॅट्रॉसिटी कायद्यान्वये तक्रार नोंदवली.
सायली मेमाणे
२७ जून २०२५ : दाक्षिणात्य अभिनेता विजय देवरकोंडावर आदिवासी समाजाबाबत वादग्रस्त विधान केल्याचा आरोप करत गडचिरोली जिल्ह्यातील सिरोंचा पोलीस ठाण्यात अॅट्रॉसिटी कायद्यान्वये तक्रार दाखल करण्यात आली आहे. ही घटना २६ जून रोजी घडली असून स्थानिक नगरसेवक सतीश भोगे व त्यांच्या सोबतच्या काही पदाधिकाऱ्यांनी संबंधित अधिकाऱ्यांना लेखी निवेदन सादर करून कारवाईची मागणी केली. त्यानुसार पोलिसांकडून प्राथमिक चौकशी सुरू करण्यात आली आहे. देवरकोंडाने अलीकडेच दिलेल्या एका वक्तव्यात आदिवासी समुदायासंदर्भात काही वाक्य बोलल्याचा आरोप आहे, ज्यामुळे स्थानिक आदिवासी समाजात तीव्र नाराजी पसरली आहे. आदिवासी हक्क आणि स्वाभिमान रक्षणाच्या दृष्टीने सदर वक्तव्याचा निषेध होत असून कायदेशीर कारवाईची मागणी जोर धरत आहे. तक्रार दाखल झाल्यानंतर पोलीस निरीक्षकांनीही या प्रकरणात वरिष्ठांच्या मार्गदर्शनानुसार पुढील तपास केला जाईल, असे स्पष्ट केले. देवरकोंडाच्या वक्तव्यावर अद्याप त्यांच्या वतीने कोणताही अधिकृत खुलासा करण्यात आलेला नाही. या घटनेने राजकीय आणि सामाजिक पातळीवर वाद निर्माण होण्याची शक्यता वर्तवली जात आहे. या प्रकरणाचा तपास सुरु असून, या प्रकरणाचा आगामी राजकीय प्रभाव काय असेल हे पाहणे महत्त्वाचे ठरेल.
