शिवसेनेचे ज्येष्ठ नेते मोहन आंब्रे यांचे अपघाती निधन, खेड तालुक्यात शोककळा

खेड मधील अपघातात शिवसेनेचे मोहन आंब्रे यांचे निधन. जुने कार्यकर्ते, सामाजिक आणि राजकीय वर्तुळात हळहळ.

सायली मेमाणे

१८ जून २०२५ :रत्नागिरी : कोकणातील खेड तालुक्यात मंगळवारी (१८ जून) झालेल्या भीषण अपघातात शिवसेनेचे ज्येष्ठ नेते आणि माजी पंचायत समिती उपसभापती मोहन मनोहर आंब्रे (Mohan Ambre) यांचे निधन झाले. चिरणी गावाजवळील पुलावर त्यांची बाईक समोरून येणाऱ्या दुचाकीला धडकून अपघात झाला. डोक्याला गंभीर दुखापत झाल्याने त्यांना तातडीने रुग्णालयात हलवण्यात आले, मात्र उपचारादरम्यान त्यांनी अखेरचा श्वास घेतला.

प्राथमिक माहितीनुसार, मोहन आंब्रे हे चिरणी येथील त्यांच्या घराच्या कामासाठी दुपारी लोटे येथे बुलेटवरून निघाले होते. चिरणी पुलाजवळ समोरून येणाऱ्या बाईकला धडक देऊन ते रस्त्यावर फेकले गेले. त्यांच्या डोक्याला जबर दुखापत झाली होती. स्थानिकांनी तातडीने त्यांना चिपळूण रुग्णालयात दाखल केले, नंतर रत्नागिरी आणि त्यानंतर कोल्हापूरच्या खासगी रुग्णालयात हलवण्यात आले. मात्र उपचारांदरम्यान मध्यरात्री त्यांचे निधन झाले.

मोहन आंब्रे हे खेड तालुक्यातील चिरणी गावचे रहिवासी आणि शिवसेनेचे जुने जाणते कार्यकर्ते होते. खेड तालुका पंचायत समितीचे माजी उपसभापती, शिवसेना माजी तालुकाप्रमुख अशा अनेक जबाबदाऱ्या त्यांनी पार पाडल्या होत्या. त्यांचा परिसरात आणि राजकीय वर्तुळात मोठा प्रभाव होता. त्यांच्या जाण्याने खेड तालुक्यातून शोककळा पसरली आहे.

त्यांच्या पश्चात पत्नी, दोन मुले, आर्मीतून निवृत्त असलेले सख्खे भाऊ, भावजय असा मोठा परिवार आहे. त्यांच्या निधनावर विविध सामाजिक संस्थांपासून ते राजकीय नेत्यांनी शोक व्यक्त केला आहे. मनसेचे कोकण संघटक वैभव खेडेकर यांनी “आमचा एक चांगला सहकारी गमावला,” अशा शब्दांत श्रद्धांजली अर्पण केली आहे.

त्यांचा अंत्यविधी आज, बुधवार १८ जून रोजी दुपारी १ वाजता त्यांच्या मूळगाव चिरणी (ता. खेड) येथे होणार असल्याची माहिती त्यांच्या कुटुंबीयांनी दिली आहे.

Do‑follow Links:
Instagram: https://www.instagram.com/newsdotz/
YouTube: https://www.youtube.com/@NewsDotz
Facebook: https://www.facebook.com/profile.php?id=61573903448264
Twitter: https://x.com/NewsDotz