हैदर अलीला लैंगिक शोषणाच्या आरोपाखाली ब्रिटनमध्ये अटक, PCB कडून तात्पुरते निलंबन
लैंगिक शोषणाच्या आरोपाखाली पाकिस्तानी क्रिकेटपटू हैदर अलीला ब्रिटनमध्ये अटक
पाकिस्तानी क्रिकेटपटू हैदर अलीला युकेमध्ये बलात्कार आणि वंशवादाच्या आरोपाखाली अटक. PCB ने तात्पुरते निलंबन केले. प्रकरणाची चौकशी सुरू.
सायली मेमाणे
पुणे ८ ऑगस्ट २०२५ : पाकिस्तान क्रिकेटला मोठा धक्का बसला आहे. पाकिस्तान शाहीन संघाचा क्रिकेटपटू हैदर अली याला ब्रिटनमध्ये बलात्काराच्या आरोपाखाली अटक करण्यात आली आहे. पाकिस्तानचा अ संघ (पाकिस्तान शाहीन) सध्या युके दौऱ्यावर असून, हैदर अली हा या संघाचा सदस्य होता.
वृत्तानुसार, पाकिस्तानी वंशाच्या एका तरुणीने हैदर अलीवर लैंगिक शोषणासोबतच वंशवादाचा आरोप केला. या तक्रारीनंतर ग्रेटर मँचेस्टर पोलिसांनी तत्काळ कारवाई करत हैदर अलीला अटक केली. प्रकरणाची सखोल चौकशी सुरू असून, पोलिसांकडून सर्व पुरावे आणि साक्षी गोळा करण्याचे काम सुरू आहे.
या घटनेची माहिती मिळताच पाकिस्तान क्रिकेट बोर्डाने (PCB) हैदर अलीला तात्पुरते निलंबित करण्याचा निर्णय घेतला आहे. बोर्डाने स्पष्ट केले आहे की, चौकशी पूर्ण होईपर्यंत हैदर अली कोणत्याही क्रिकेट सामन्यात किंवा प्रशिक्षण सत्रात सहभागी होऊ शकणार नाही.
या प्रकरणामुळे पाकिस्तान क्रिकेटवर पुन्हा एकदा नकारात्मक छाया पडली आहे. गेल्या काही वर्षांत पाकिस्तानी खेळाडूंशी संबंधित वादग्रस्त प्रकरणांची संख्या वाढली असून, यामुळे PCB च्या शिस्तपालनावरील धोरणावरही प्रश्नचिन्ह उपस्थित होत आहेत.
