वाधवण पोर्ट चौथी मुंबई म्हणून विकसित होणार : मुख्यमंत्री फडणवीस

वाधवण पोर्ट चौथी मुंबई म्हणून उभारणार; बुलेट ट्रेन व कोस्टल रोड प्रकल्प पालघरपर्यंत वाढवणार असल्याची घोषणा मुख्यमंत्री देवेंद्र फडणवीस यांनी गुंतवणूक परिषदेत केली.

सायली मेमाणे

पुणे ५ जून २०२५ : महाराष्ट्राचे मुख्यमंत्री देवेंद्र फडणवीस यांनी नुकत्याच मुंबईत पार पडलेल्या बँक ऑफ अमेरिका सिक्युरिटीजच्या गुंतवणूक परिषदेत राज्याच्या पायाभूत सुविधांच्या विकासाबाबत महत्त्वाची घोषणा केली. त्यानुसार पालघर जिल्ह्यातील वाधवण पोर्ट परिसराला वाधवण पोर्ट चौथी मुंबई म्हणून विकसित केले जाणार आहे. याच भागात देशातील सर्वात मोठे सागरी बंदर आणि एक नवे आंतरराष्ट्रीय विमानतळ उभारले जाणार आहे.

फडणवीसांनी सांगितले की, पंतप्रधान नरेंद्र मोदी यांनी या प्रकल्पांसाठी मंजुरी दिली असून, मुंबई-अहमदाबाद बुलेट ट्रेन प्रकल्प आणि मुंबईचा कोस्टल रोड पालघरपर्यंत विस्तारित केला जाणार आहे. या निर्णयामुळे पालघरमध्ये वाहतूक, व्यापार आणि उद्योगांसाठी मोठी संधी निर्माण होणार आहे.

मुख्यमंत्री फडणवीसांनी त्या परिषदेत स्पष्ट केले की, “ही चौथी मुंबई केवळ एक बंदर नसून, ते एक बहुआयामी नागरी व आर्थिक केंद्र असेल.” त्यांच्या म्हणण्यानुसार, या विकासामुळे केवळ मुंबईवरील लोकसंख्येचा ताण कमी होणार नाही, तर नव्या गुंतवणुकीसाठी व रोजगार निर्मितीसाठी एक नवा केंद्रबिंदू तयार होणार आहे.

मुंबईतील काही उद्योग गुजरातकडे स्थलांतर करू शकतील, या भीतीवर उत्तर देताना फडणवीसांनी ठाम भूमिका घेतली. “मुंबई हे भारताचे आर्थिक केंद्र राहील. BKC आणि दक्षिण मुंबईतील हिरे व्यापार केंद्र अजूनही प्रचंड सक्रिय आहे,” असं त्यांनी नमूद केलं. “गेल्या दोन वर्षांमध्ये मुंबईतील हिरे व्यापार कार्यालयांच्या किंमतीत ४०% वाढ झाली आहे.”

ते पुढे म्हणाले, “सर्व प्रमुख फिनटेक कंपन्या मुंबईत गुंतवणूक करत आहेत. BKC मधील भूखंड विक्रीचे दर अभूतपूर्व आहेत. हेच दर्शवते की मुंबईची आर्थिक ताकद अजूनही टिकून आहे.”

राज्यांनी स्पर्धक न होता सहकारी म्हणून काम केले पाहिजे, असं मत त्यांनी व्यक्त केलं. “भारताचा सर्वांगीण विकास हा एकत्रित प्रयत्नातूनच शक्य आहे,” असे ते म्हणाले.

वाधवण पोर्ट चौथी मुंबई म्हणून घडवण्याच्या योजनेमुळे महाराष्ट्रात नव्या युगाची सुरुवात होणार आहे. या प्रकल्पामुळे उत्तर कोकणातील पालघर जिल्ह्याचा चेहरामोहरा बदलणार आहे. लॉजिस्टिक्स, औद्योगिक गुंतवणूक, नागरी वसाहती आणि आंतरराष्ट्रीय व्यापार यांचे नवे पर्व येथे सुरू होण्याची शक्यता आहे.