सोलापुरात भाजप ओबीसी मोर्चाकडून पूरग्रस्त विद्यार्थ्यांना शालेय साहित्य वाटप
सोलापुरात भाजप ओबीसी मोर्चाकडून पूरग्रस्त विद्यार्थ्यांना शालेय साहित्य वाटप
सोलापुरातील ओबीसी मोर्चाने पूरग्रस्त विद्यार्थ्यांसाठी मदतीचा हात पुढे केला. पूरात साहित्य गमावलेल्या विद्यार्थ्यांना भाजपच्या वतीने शालेय साहित्य वाटप करण्यात आलं.
सायली मेमाणे
पुणे १८ ऑक्टोबर २०२५ : सोलापुरात पूरग्रस्त विद्यार्थ्यांसाठी दिलासा देणारी आणि सामाजिक बांधिलकीची प्रेरणादायी अशी कृती करण्यात आली आहे. भारतीय जनता पार्टीच्या ओबीसी मोर्चाच्या वतीने पूरग्रस्त विद्यार्थ्यांना शालेय साहित्याचे वाटप करण्यात आले. या उपक्रमामुळे आपत्तीग्रस्त भागातील विद्यार्थ्यांमध्ये पुन्हा शिक्षणाविषयी उत्साह निर्माण झाला आहे.
सीना नदीला आलेल्या तीव्र पुरामुळे दक्षिण आणि उत्तर सोलापूर तालुक्यातील तिऱ्हे, डोंणगाव, पाथरी, तेलगाव आणि नंदूर या गावांमध्ये मोठ्या प्रमाणात हानी झाली होती. अनेक घरांना पाण्याचा फटका बसला आणि शालेय विद्यार्थ्यांचे पुस्तके, वह्या, गणवेश आणि इतर शैक्षणिक साहित्य वाहून गेले.
या पार्श्वभूमीवर भाजप ओबीसी मोर्चाने सामाजिक जबाबदारी स्वीकारत पूरग्रस्त विद्यार्थ्यांना नवीन शालेय साहित्य, वह्या, पेन, बॅग आणि आवश्यक शिक्षण सामग्रीचे वितरण केले. या उपक्रमामध्ये स्थानिक कार्यकर्त्यांनी सक्रिय सहभाग घेतला आणि विद्यार्थ्यांना त्यांच्या शैक्षणिक प्रवासात पुन्हा उभं राहण्यासाठी प्रोत्साहन दिलं.
भाजप ओबीसी मोर्चाच्या पदाधिकाऱ्यांनी सांगितलं की, “पूरग्रस्त भागातील कुटुंबं अजूनही सावरत आहेत. या विद्यार्थ्यांच्या शिक्षणात अडथळा येऊ नये म्हणून आम्ही हा लहानसा प्रयत्न केला आहे.” या कार्यक्रमाला स्थानिक ग्रामपंचायत सदस्य, शिक्षक आणि नागरिक मोठ्या संख्येने उपस्थित होते.
पूरामुळे बाधित गावांमध्ये अजूनही पुनर्वसनाची प्रक्रिया सुरू आहे. अशा परिस्थितीत भाजप ओबीसी मोर्चाचा हा उपक्रम विद्यार्थ्यांसाठी नवी आशा घेऊन आला आहे. ग्रामीण भागातील विद्यार्थ्यांना शिक्षणासाठी प्रोत्साहन देणारा आणि सामाजिक संवेदनशीलतेचं उदाहरण ठरणारा हा उपक्रम असल्याचं स्थानिकांनी नमूद केलं.
