पालखी सोहळ्यासाठी ग्रामविकास विभागाकडून ६० कोटींची तरतूद – १९ जून २०२५

महाराष्ट्र शासनाने संत ज्ञानेश्वर महाराजांच्या पालखी सोहळ्यासाठी ग्रामविकास विभागाकडून ६० कोटी रुपयांची आर्थिक मदत दिली आहे. यंदा १९ जून रोजी पंढरपूरकडे सोहळा सुरळीत होण्याची तयारी अंतिम टप्प्यावर आहे.

सायली मेमाणे

पुणे : 9 जून २०२५ : संत ज्ञानेश्वर महाराजांच्या पालखी सोहळ्यासाठी महाराष्ट्र शासनाने ग्रामविकास विभागाकडून ६० कोटी रुपयांची आर्थिक मदत दिली आहे. यंदा १९ जून रोजी पंढरपूरकडे चालणाऱ्या या धार्मिक सोहळ्याची तयारी अंतिम टप्प्यावर आली आहे. प्रशासनाने वारकऱ्यांच्या सुरक्षिततेसाठी आणि सोयीसाठी विविध व्यवस्थांचा वापर केला आहे.

पालखी मार्गावर पावसाळी निवारा निर्माण करण्यासाठी ठिकठिकाणी शेड बांधले जात आहेत. नीरा परिसरातील पालखी तळासाठी ५० लाख रुपयांचा निधी त्वरित मंजूर केला गेला असून पुणे जिल्हा परिषदेला या कामाला प्राधान्य देण्याचे आदेश दिले आहेत.

ग्रामविकास मंत्री जयकुमार गोरे यांनी सांगितले की, मागील वर्षीच्या अडचणींचा विचार करून यंदा अधिक चांगल्या व्यवस्थेची रचना करण्यात आली आहे. वारकऱ्यांसाठी सात ते आठ लाख चौ. फुट क्षेत्रात निवारा शेडसाठी जर्मन तंत्रज्ञानाचा वापर केला जाणार आहे. यामुळे पावसाच्या हंगामात वारकऱ्यांना सुरक्षित आणि आरामदायी निवारा मिळेल.

फलटण तालुक्यातील तरडगाव येथील पालखी तळाच्या नुकसानीसाठी १.५ कोटी रुपयांची तरतूद करण्यात आली आहे. या दुरुस्तीचे काम दहा दिवसांत पूर्ण होईल, असे सांगितले गेले आहे.

पालखी मार्गावर स्वागत सोहळा आणि वाहतूक सुरळीत ठेवण्यासाठी स्टेज आणि स्वागत कमानी यावर नियंत्रण ठेवण्यात आले आहे. आवाजाच्या तक्रारींवर तत्काळ कारवाई केली जात आहे.

शासनाने शौचालय बांधकामासाठी होणाऱ्या खर्चावर नियंत्रण ठेवून ८ ते १० कोटी रुपयांची बचत केली आहे. या बचतीचा वापर पालखी सोहळ्याच्या विविध व्यवस्थांमध्ये होणार आहे.

या सर्व तयारीमुळे यंदाचा पालखी सोहळा अधिक सुव्यवस्थित आणि सुरक्षित रित्या पार पडेल अशी अपेक्षा व्यक्त केली जात आहे.