सुप्यात रिलायन्स कॅम्प कोला डीलरशिप फसवणूक प्रकरण; चार लाखांचा आर्थिक गंडा

सुपे येथील व्यावसायिकाला रिलायन्स कॅम्प कोला डीलरशिप देण्याच्या नावाखाली सुमारे चार लाखांची फसवणूक करण्यात आली. सायबर पोलिसांकडे गुन्हा दाखल.

सायली मेमाणे

पुणे ११ जून २०२५ : रिलायन्स कॅम्प कोला डीलरशिप फसवणूक प्रकरणात पुणे जिल्ह्यातील सुपे गावातील एका व्यावसायिकाची सुमारे चार लाख रुपयांची फसवणूक झाल्याचा धक्कादायक प्रकार समोर आला आहे. वैभव नवनाथ चांदगुडे (वय ३२, रा. खोपवाडी, सुपे, ता. बारामती) यांना रिलायन्स कॅम्प कोला कंपनीची डीलरशिप मिळवून देतो, असे सांगून एक अनोळखी व्यक्ती फोनवरून संपर्कात आली. या व्यक्तीने वैभव यांना सांगितले की, कंपनीचे अधिकृत अॅग्रीमेंट झाल्यानंतर त्यांच्या गोडाऊनला कंपनीची टीम पाहणीसाठी येईल. त्यामुळे वैभव यांनी सुरुवातीला ४९ हजार ५०० रुपये गुगल पेच्या माध्यमातून दिले. त्यानंतर या व्यक्तीने अॅग्रीमेंट पूर्ण झाल्याचे सांगून पुढील टप्प्यावर कोल्ड्रिंकसाठी अर्धे पेमेंट मागितले.

फसवणूक करणाऱ्याने एक बनावट बिल पाठवून सुमारे ५ लाख १० हजार रुपयांच्या कोल्ड्रिंक ऑर्डरसाठी अर्धी रक्कम भरण्यास सांगितली. वैभव यांनी विश्वासाने बँकेकडून कर्ज काढले व ९० हजार १९० रुपये जीएसटी म्हणून आणि उर्वरित २ लाख ५० हजार रुपये पाठवले. या व्यवहारात एकूण ३ लाख ८९ हजार ६९० रुपये त्यांनी पाठवले. मात्र, ठरल्याप्रमाणे कंपनीची टीम गोडाऊनला आली नाही, तसेच संपर्क साधण्याचा प्रयत्न केला असता ती व्यक्ती गायब झाली. अखेर यामागे एक मोठा फसवणुकीचा प्रकार असल्याचे लक्षात आले.

वैभव चांदगुडे यांनी याप्रकरणी सायबर पोलिस ठाण्यात तक्रार दाखल केली आहे. पोलिसांनी गुन्हा नोंदवत तपास सुरू केला असून, संबंधित व्यक्तीचे कॉल रेकॉर्ड व व्यवहारांचे बँक तपशील मागवले जात आहेत. ऑनलाइन व्यवहार करताना आवश्यक ती सर्व खबरदारी घेणे गरजेचे आहे. कोणतीही डीलरशिप ऑफर आल्यास त्या कंपनीची अधिकृत माहिती, वेबसाइट, जीएसटी क्रमांक आणि कागदपत्रे योग्यप्रकारे पडताळणं अत्यावश्यक आहे. तसेच मोठ्या रकमेचे व्यवहार करताना कायदेशीर सल्ला घेणंही गरजेचं ठरतं.

अशा फसवणुकींपासून वाचण्यासाठी नागरिकांनी अधिक सतर्क राहावं, शंका आल्यास त्वरित सायबर पोलिस किंवा ग्राहक संरक्षण विभागाकडे संपर्क साधावा. सायबर गुन्हे विभागाच्या अधिकृत पोर्टलवर तक्रार दाखल करण्यासाठी येथे क्लिक करा (DoFollow). तसेच ग्राहक संरक्षण कायद्यांची अधिकृत माहिती (DoFollow) यावरही वाचकांनी नजर टाकणं गरजेचं आहे.

या प्रकारामुळे बारामती परिसरात संभ्रमाचे वातावरण आहे. अशा बनावट डीलरशिप स्कॅममुळे स्थानिक व्यावसायिकांच्या मनात भीती निर्माण झाली असून, पोलिसांनी यामध्ये तत्काळ कारवाई करावी अशी मागणी होत आहे. या प्रकरणाचे गांभीर्य लक्षात घेता यासंदर्भात अधिक तपशील मिळवून, दोषींवर कठोर कारवाई केली जाईल, असे पोलिसांनी स्पष्ट केले आहे.