PMC Election Result 2026: हायहोल्टेज लढतीत अमोल बालवडकरांची बाजी; प्रभाग 9 मध्ये राष्ट्रवादीचे 2 शिलेदार विजयी

PMC Election Result 2026 मध्ये प्रभाग 9 बाणेर-बालेवाडी येथे अमोल बालवडकरांनी भाजपच्या लहू बालवडकरांचा 896 मतांनी पराभव केला, तर प्रभाग 32 मध्ये भाजपचा क्लीन स्वीप.

पुणे १७ जानेवारी २०२६ : पुणे महानगरपालिका निवडणूक निकाल 2026 मध्ये बाणेर-बालेवाडीचा प्रभाग 9 आणि वारजे-पॉप्युलर नगरचा प्रभाग 32 हे दोन्ही प्रभाग राजकीयदृष्ट्या अत्यंत चर्चेचे ठरले आहेत. या दोन्ही ठिकाणी वेगवेगळ्या राजकीय समीकरणांमुळे चुरशीचे आणि धक्कादायक निकाल समोर आले असून पुण्यातील राजकारणाला नवी दिशा मिळाल्याचे चित्र स्पष्ट झाले आहे. विशेषतः प्रभाग 9 मधील हायहोल्टेज लढतीकडे संपूर्ण शहराचे लक्ष लागून होते.

पुणे महानगरपालिकेच्या या निवडणुकीत अनेक दिग्गज नेत्यांची प्रतिष्ठा पणाला लागली होती. त्यात सर्वाधिक चर्चा बाणेर-बालेवाडी परिसरातील प्रभाग 9 ची होती. हा प्रभाग पुण्यातील सर्वात हायव्होल्टेज मतदारसंघ म्हणून ओळखला जातो. शेवटच्या फेरीपर्यंत मतमोजणीदरम्यान उत्कंठा कायम होती. अखेर भाजपमधून राष्ट्रवादी काँग्रेसमध्ये (अजित पवार गट) प्रवेश केलेल्या अमोल बालवडकर यांनी बाजी मारत भाजपला मोठा धक्का दिला आहे.

अमोल बालवडकर यांनी भाजपचे उमेदवार लहू बालवडकर यांचा तब्बल 896 मतांनी पराभव केला. हा पराभव भाजपसाठी केवळ एका जागेपुरता मर्यादित नसून, ज्येष्ठ नेते चंद्रकांत पाटील यांच्या प्रतिष्ठेलाही मोठा धक्का मानला जात आहे. अमोल बालवडकर यांच्या विजयानंतर राष्ट्रवादी काँग्रेसच्या गोटात उत्साहाचे वातावरण आहे. याच प्रभागात राष्ट्रवादीचे ज्येष्ठ नेते बाबुराव चांदेरे यांनी भाजपच्या गणेश कळमकर यांचा 1415 मतांनी पराभव करत आपला गड अबाधित ठेवला आहे. त्यामुळे प्रभाग 9 मधून राष्ट्रवादी काँग्रेसने दोन महत्त्वाच्या जागा जिंकत भाजपच्या वर्चस्वाला आव्हान दिले आहे.

मात्र, भाजपसाठीही या प्रभागात पूर्ण निराशाजनक चित्र नाही. रोहिणी चिमटे आणि मयुरी कोकाटे यांनी भाजपकडून विजय मिळवत पक्षाची उपस्थिती कायम ठेवली आहे. तरीही, एकंदर निकाल पाहता प्रभाग 9 मध्ये राष्ट्रवादीने निर्णायक मुसंडी मारल्याचे स्पष्ट होते आणि पुण्यातील राजकीय समीकरणांमध्ये बदल घडवून आणल्याचे संकेत मिळतात.

दुसरीकडे, वारजे-पॉप्युलर नगर परिसरातील प्रभाग 32 मध्ये भारतीय जनता पक्षाने निर्विवाद वर्चस्व गाजवत ‘क्लीन स्वीप’ केला आहे. या प्रभागात भाजपचे पूर्ण पॅनल निवडून आल्याने कार्यकर्त्यांमध्ये जल्लोषाचे वातावरण आहे. विशेष म्हणजे राष्ट्रवादीतून भाजपमध्ये प्रवेश केलेले सचिन दोडके आणि सायली वांजळे यांनी मतदारांचा विश्वास संपादन करत मोठा विजय मिळवला आहे. त्यांच्या नेतृत्वाखाली भाजपने राष्ट्रवादीच्या बालेकिल्ल्यात थेट शिरकाव केला आहे.

प्रभाग 32 मधून सचिन दोडके, सायली वांजळे, भारत भूषण बराटे आणि हर्षदा भोसले हे चारही भाजपचे उमेदवार विजयी झाले आहेत. या निकालामुळे वारजे परिसरात भाजपची ताकद अधिक भक्कम झाली असून आगामी काळात पुणे महापालिकेतील राजकीय समीकरणांवर याचा मोठा परिणाम होण्याची शक्यता आहे. एकूणच, PMC Election Result 2026 मध्ये प्रभाग 9 आणि प्रभाग 32 मधील निकालांनी पुण्यातील राजकारण अधिक रंगतदार आणि अनिश्चित बनवले आहे.