राज्यसभेत थरारक क्षण: खासदार सी. सदानंदन मास्टर यांनी दोन्ही कृत्रिम पाय टेबलवर ठेवत सांगितली 31 वर्षांपूर्वीची क्रूर घटना
राज्यसभेत थरारक क्षण: खासदार सी. सदानंदन मास्टर यांनी दोन्ही कृत्रिम पाय टेबलवर ठेवत सांगितली 31 वर्षांपूर्वीची क्रूर घटना
राज्यसभेत भाजप खासदार सी. सदानंदन मास्टर यांनी आपले कृत्रिम पाय टेबलवर ठेवून 31 वर्षांपूर्वी झालेल्या अमानुष हल्ल्याची आठवण सांगितली. या घटनेने संपूर्ण सभागृह स्तब्ध झाले.
पुणे ०३ जानेवारी २०२६ : दिल्लीमध्ये सुरू असलेल्या संसदेच्या अर्थसंकल्पीय अधिवेशनादरम्यान सोमवारी राज्यसभेत घडलेल्या एका प्रसंगाने संपूर्ण देशाचे लक्ष वेधून घेतले. सत्ताधारी आणि विरोधकांमधील नेहमीच्या राजकीय खडाजंगीत अचानक असा क्षण आला की सभागृहातील वातावरण पूर्णपणे बदलून गेले. भाजपचे राज्यसभा खासदार सी. सदानंदन मास्टर यांनी आपल्या भाषणादरम्यान दोन्ही कृत्रिम पाय काढून थेट टेबलवर ठेवले आणि 31 वर्षांपूर्वी आपल्या आयुष्यात घडलेल्या एका क्रूर आणि अमानुष घटनेची आठवण सभागृहासमोर मांडली. हा प्रसंग पाहून अनेक खासदार सुन्न झाले, तर काही क्षणांसाठी संपूर्ण सभागृह स्तब्ध झाले.
आभार प्रस्तावावरील चर्चेदरम्यान बोलताना सदानंदन मास्टर यांनी लोकशाही आणि राजकीय हिंसाचाराचा मुद्दा उपस्थित केला. “अध्यक्ष महोदय, हे माझे दोन्ही पाय आहेत. एकेकाळी मी दोन पाय असलेला एक सशक्त माणूस होतो. आज माझे गुडघ्याखालील दोन्ही पाय कृत्रिम आहेत,” असे म्हणत त्यांनी आपली व्यथा मांडली. लोकशाहीच्या नावाखाली घोषणाबाजी करणाऱ्या लोकांनीच 31 वर्षांपूर्वी केरळमध्ये आपल्यावर जीवघेणा हल्ला केल्याचा आरोप त्यांनी यावेळी केला. या हल्ल्यामागे सीपीआय(एम)च्या कार्यकर्त्यांचा हात असल्याचा दावा करत त्यांनी राजकीय हिंसाचारावर जोरदार प्रहार केला.
सदानंदन मास्टर यांच्या या वक्तव्यामुळे सभागृहात एकच खळबळ उडाली. विरोधी बाकांवरील खासदारांनी जोरदार आक्षेप घेतला. केरळमधील सीपीआय(एम)चे खासदार जॉन ब्रिटास यांनी नियमांचा हवाला देत सभागृहात अशा प्रकारे कृत्रिम अवयव प्रदर्शित करण्यास हरकत घेतली. यानंतर काही काळ गोंधळाचे वातावरण निर्माण झाले. राज्यसभा अध्यक्ष सी. पी. राधाकृष्णन यांनी परिस्थिती शांत करत सदानंदन मास्टर यांना कृत्रिम पाय खाली ठेवण्यास सांगण्याचे आश्वासन दिले. दरम्यान, सभागृह नेते जे. पी. नड्डा यांनी चर्चेदरम्यान वापरले गेलेले काही असंसदीय शब्द वगळण्याची विनंती अध्यक्षांकडे केली.
या भावनिक प्रसंगामागची पार्श्वभूमी अत्यंत वेदनादायक आहे. केरळच्या कन्नूर जिल्ह्यातील रहिवासी असलेले सी. सदानंदन मास्टर हे भाजप आणि आरएसएसशी दीर्घकाळापासून संबंधित आहेत. 25 जानेवारी 1994 रोजी त्यांच्यावर कथितपणे सीपीआय(एम)च्या कार्यकर्त्यांनी जीवघेणा हल्ला केला होता. या हल्ल्यात त्यांचे दोन्ही पाय करवतीने कापण्यात आले होते. या घटनेने संपूर्ण केरळ हादरून गेले होते आणि आजही ती घटना राजकीय हिंसाचाराच्या इतिहासातील एक काळा अध्याय मानली जाते.
शिक्षक म्हणून काम केलेल्या सदानंदन मास्टर यांनी गुवाहाटी विद्यापीठातून बी.कॉम. आणि कालिकत विद्यापीठातून बी.एड. पदवी घेतली आहे. राष्ट्रीय शिक्षक संघामध्येही त्यांनी महत्त्वाची भूमिका बजावली आहे. गेल्या वर्षी जुलैमध्ये त्यांची राज्यसभेवर निवड झाली. राज्यसभेतील हा प्रसंग केवळ राजकीय वक्तव्यापुरता मर्यादित न राहता, लोकशाही, सहिष्णुता आणि राजकीय मतभेदांच्या नावाखाली होणाऱ्या हिंसाचारावर गंभीर प्रश्न उपस्थित करणारा ठरला आहे.
Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/
Twitter – https://x.com/NewsDotz
Also Read: Pune’s Latest Information
