ऑपरेशन ‘फ्लश आऊट’ यशस्वी: सिंहगड रोड परिसरातून कोयता व तलवार जप्त, एक जण अटकेत

पुण्यातील सिंहगड रोड पोलीस ठाण्याची ऑपरेशन फ्लश आऊट अंतर्गत कारवाई. वडगाव भागातून कोयता, धारदार हत्यार आणि तलवार जप्त; आरोपीविरुद्ध आर्म्स अॅक्ट अंतर्गत गुन्हा.

पुणे १८ एप्रिल २०२६ : पुणे शहरात गुन्हेगारीवर आळा घालण्यासाठी राबविण्यात येत असलेल्या ‘ऑपरेशन फ्लश आऊट’ मोहिमेत सिंहगड रोड पोलीस स्टेशन पथकाने महत्त्वाची कारवाई केली आहे. वडगाव परिसरातील धोडीबा निवास इमारतीजवळ संशयास्पद हालचाल करणाऱ्या एका इसमाला ताब्यात घेत त्याच्याकडून एक लोखंडी कोयता, एक धारदार हत्यार आणि एक लोखंडी तलवार जप्त करण्यात आली. या प्रकरणी आरोपीविरुद्ध आर्म्स अॅक्टअंतर्गत गुन्हा दाखल करण्यात आला असून पुढील तपास सुरू आहे.

दि. १६ एप्रिल २०२६ रोजी गुन्हे प्रतिबंधात्मक पेट्रोलिंगदरम्यान तपास पथकाला खास बातमीदारामार्फत माहिती मिळाली की, निळा शर्ट व काळी पॅन्ट घातलेला, केस वाढलेला एक इसम पांढऱ्या पिशवीत लोखंडी हत्यार घेऊन धोडीबा निवास बिल्डिंगखाली थांबलेला आहे. ही माहिती तत्काळ पथकप्रमुख पोलीस उपनिरीक्षक संतोष भांडवलकर यांना कळविण्यात आली. वरिष्ठांच्या सूचनेनुसार पथकाने तातडीने घटनास्थळी धाव घेत पाहणी केली असता संशयित इसम पार्किंगमध्ये उभा असल्याचे दिसून आले. पोलिसांना पाहताच त्याने पळण्याचा प्रयत्न केला; मात्र पथकाने पाठलाग करून त्याला पकडले.

चौकशीत त्याने आपले नाव संकेत बालाजी गायकवाड (वय २७) रा. गोसावी बस्ती, वडगाव बु., पुणे असे सांगितले. अंगझडतीत त्याच्याकडून सुमारे ८०० रुपयांचा लोखंडी कोयता आढळून आला. पुढील तपासात त्याच्या घरझडतीदरम्यान एक धारदार लोखंडी हत्यार आणि एक लोखंडी तलवार मिळून आली. या शस्त्रसाठ्याच्या आधारे त्याला ताब्यात घेऊन पुणे शहर पोलीस यांनी आर्म्स अॅक्ट कलम ४ (२५) तसेच म.पो.अधि.क. ३७ (१) सह १३५ अन्वये गुन्हा नोंदवला. या गुन्ह्याचा पुढील तपास पोलीस अंमलदार विकास बांदल करीत आहेत.

ही कारवाई वरिष्ठांच्या मार्गदर्शनाखाली करण्यात आली. राजेश बनसोडे (अपर पोलीस आयुक्त, पश्चिम प्रादेशिक विभाग), संभाजी कदम (पोलीस उपआयुक्त, परीमंडळ ३), अजय परमार (सहाय्यक पोलीस आयुक्त, सिंहगड रोड विभाग) यांच्या मार्गदर्शनाखाली व वरिष्ठ पोलीस निरीक्षक विनय पाटणकर आणि पोलीस निरीक्षक (गुन्हे) समीर गायकवाड यांच्या सूचनांनुसार पथकाने सापळा रचला. या पथकात संतोष भांडवलकर, उत्तम तारू, आण्णा केकाण, विकास बांदल, सतीश मोरे, राहुल ओलेकर, सागर शेडगे, तानाजी सागर, संदीप कांबळे, समीर माळवदकर, विनायक मोहीते आणि शिरीष गावडे यांचा समावेश होता.

‘ऑपरेशन फ्लश आऊट’ अंतर्गत पुण्यात विविध भागांत शस्त्रबाळगणाऱ्यांवर आणि संशयितांवर कडक नजर ठेवण्यात येत आहे. वडगाव परिसरातील ही कारवाई त्याच मोहिमेचा भाग असून, गुन्हेगारी प्रवृत्तीला आळा घालण्यासाठी पोलिसांची सतर्कता अधोरेखित करते. परिसरात अनधिकृतपणे धारदार शस्त्रे बाळगणाऱ्यांवर कठोर कारवाई केली जाणार असल्याचा स्पष्ट संदेश या कारवाईतून देण्यात आला आहे.

नागरिकांनीही संशयास्पद हालचाली दिसल्यास तात्काळ पोलिसांना माहिती द्यावी, असे आवाहन करण्यात आले आहे. पोलिसांच्या या धडाकेबाज कारवाईमुळे परिसरातील नागरिकांमध्ये सुरक्षिततेची भावना निर्माण झाली असून, गुन्हेगारी रोखण्यासाठी प्रशासन कटिबद्ध असल्याचे पुन्हा अधोरेखित झाले आहे.