स्वारगेटमध्ये अवैध धंद्यांचा सुळसुळाट गुन्हे शाखेच्या कारवायांनंतर स्थानिक पोलिसांवर प्रश्नचिन्ह
स्वारगेटमध्ये अवैध धंद्यांचा सुळसुळाट गुन्हे शाखेच्या कारवायांनंतर स्थानिक पोलिसांवर प्रश्नचिन्ह
स्वारगेट परिसरात जुगार अड्डे, बेकायदेशीर मद्यविक्रीवर गुन्हे शाखा व विशेष पथकांच्या कारवाया. स्थानिक पोलिसांच्या भूमिकेबाबत प्रश्न उपस्थित.
पुणे १३ मे २०२६ : पुण्यातील स्वारगेट परिसर पुन्हा एकदा अवैध धंद्यांमुळे चर्चेत आला आहे. शहरात बेकायदेशीर व्यवसाय सहन केला जाणार नाही, असा इशारा अमितेश कुमार यांनी दिला असतानाही, या भागात जुगार अड्डे आणि बेकायदेशीर मद्यविक्री उघडपणे सुरू असल्याचे अलीकडील कारवायांमधून स्पष्ट झाले. विशेष म्हणजे, या कारवाया स्थानिक पोलिसांऐवजी गुन्हे शाखा आणि अमली पदार्थ विरोधी पथकाकडून करण्यात आल्या, यामुळे स्थानिक पोलीस यंत्रणेच्या भूमिकेबाबत प्रश्न उपस्थित होत आहेत.
स्वारगेट बस स्थानकाजवळील कॅनॉल रोड परिसरात सुरू असलेल्या जुगार अड्ड्यावर गुन्हे शाखेच्या पथकाने छापा टाकला. या कारवाईत रोख रक्कम आणि जुगाराचे साहित्य जप्त करण्यात आले. या प्रकरणी नदीम अतुल शेख आणि बाळासाहेब दगडू अवघडे यांच्याविरोधात गुन्हा दाखल करण्यात आला. पोलीस अंमलदार विनोद चव्हाण यांनी याबाबत तक्रार नोंदवली. या घटनेमुळे बस स्थानकासारख्या वर्दळीच्या भागातही अशा प्रकारचे अवैध प्रकार सुरू असल्याचे समोर आले.
याच भागातील एसटी अधिकारी वसाहतीमधील सार्वजनिक शौचालयात बेकायदेशीर मद्यविक्री सुरू असल्याचा धक्कादायक प्रकार अमली पदार्थ विरोधी पथकाच्या कारवाईत उघड झाला. या वेळी रजत दीपक गायकवाड याला अटक करण्यात आली आणि त्याच्याकडून सुमारे ४७ हजार रुपयांचे देशी-विदेशी मद्य जप्त करण्यात आले. सार्वजनिक ठिकाणी अशा प्रकारे मद्यविक्री होत असल्याने नागरिकांनी तीव्र नाराजी व्यक्त केली आहे.
तसेच मार्केटयार्ड ट्रक पार्किंग परिसरात ‘कल्याण’ नावाचा जुगार सुरू असल्याची माहिती मिळाल्यानंतर पोलिसांनी येथेही छापा टाकला. या कारवाईत रहीम अब्दुल रजाक शेख याला ताब्यात घेण्यात आले. घटनास्थळावरून रोख रक्कम आणि जुगाराचे साहित्य जप्त करण्यात आले. सलग घडलेल्या या कारवायांमुळे स्वारगेट आणि आसपासच्या भागात अवैध धंद्यांचे जाळे मोठ्या प्रमाणावर पसरले असल्याचे दिसून येते.
एकाच भागात वारंवार अशा प्रकारच्या कारवाया होत असताना स्थानिक पोलिसांना याची माहिती नव्हती का, असा प्रश्न नागरिकांकडून उपस्थित केला जात आहे. गुन्हे शाखा आणि विशेष पथकांना हस्तक्षेप करावा लागत असल्यास, स्थानिक पोलिसांनी या प्रकारांकडे दुर्लक्ष केले का, अशी चर्चा रंगू लागली आहे. कायदा आणि सुव्यवस्था राखण्याची जबाबदारी असलेल्या स्थानिक यंत्रणेकडून अपेक्षित कारवाई का झाली नाही, याबाबतही प्रश्न उपस्थित होत आहेत.
या घटनांमुळे स्वारगेट परिसरातील कायदा-सुव्यवस्थेचा प्रश्न पुन्हा ऐरणीवर आला आहे. वर्दळीचा आणि महत्त्वाचा भाग म्हणून ओळख असलेल्या या परिसरात नागरिकांच्या सुरक्षेच्या दृष्टीने कठोर पावले उचलण्याची गरज व्यक्त केली जात आहे. वरिष्ठ पोलीस अधिकारी या प्रकरणाकडे कशा पद्धतीने पाहतात आणि स्थानिक पातळीवर कोणती सुधारात्मक पावले उचलली जातात, याकडे सर्वांचे लक्ष लागले आहे. अवैध धंद्यांवर सातत्याने कारवाई होणे आवश्यक असले, तरी त्यांना मुळापासून आळा घालण्यासाठी स्थानिक स्तरावर अधिक दक्षता आणि जबाबदारीची अपेक्षा व्यक्त केली जात आहे.
Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/
Twitter – https://x.com/NewsDotz
Also Read: Pune’s Latest Information
FacebookWhatsAppXTelegramThreadsLinkedInGmailShare
About The Author
