Pune Floods : पहिल्याच पावसात पुणे जलमय ‘हजारो कोटींचा मलिदा कोणी खाल्ला?’ शिवसेनेचा PMC वर हल्लाबोल

पहिल्याच मुसळधार पावसात पुणे तुंबल्यानंतर शिवसेनेने पुणे महानगरपालिकेविरोधात आक्रमक आंदोलन केले. प्रमोद भानगिरे यांनी पावसाळापूर्व कामांतील भ्रष्टाचारावर गंभीर आरोप करत प्रशासनाला थेट जाब विचारला.

पुणे २६ मे २०२६ : पहिल्याच मुसळधार पावसात पुणे शहरातील रस्ते, चौक, नाले आणि ड्रेनेज व्यवस्था पूर्णपणे कोलमडल्याने नागरिकांना मोठा त्रास सहन करावा लागला. अनेक भागांत गुडघाभर पाणी साचल्याने वाहतूक विस्कळीत झाली आणि शहरातील पायाभूत सुविधांवर पुन्हा एकदा प्रश्नचिन्ह निर्माण झाले. या पार्श्वभूमीवर Shiv Sena पक्षाच्या वतीने पुणे महानगरपालिकेविरोधात जोरदार ‘हल्लाबोल’ आंदोलन करण्यात आले.

Pramod Bhangire यांच्या नेतृत्वाखाली शेकडो शिवसैनिकांनी थेट Pune Municipal Corporation मुख्यालयावर मोर्चा काढत प्रशासनाविरोधात घोषणाबाजी केली. आंदोलनामुळे काही काळ महापालिका परिसरात तणावाचे वातावरण निर्माण झाले होते. “ड्रेनेज व्यवस्था दुरुस्त करा, नाहीतर पुणेकरांना होड्या वाटा” अशा संतप्त घोषणा देत कार्यकर्त्यांनी प्रशासनाचा निषेध केला.

शिवसेनेने आरोप केला की, पावसाळापूर्व कामांसाठी महापालिकेकडून हजारो कोटी रुपयांच्या निविदा काढण्यात आल्या, मोठ्या जाहिराती देण्यात आल्या; मात्र प्रत्यक्षात कामे दर्जाहीन आणि अपूर्ण राहिली. अवघ्या अर्ध्या तासाच्या पावसात शहर जलमय झाल्याने प्रशासनाचा निष्काळजीपणा उघड झाल्याचा आरोप करण्यात आला.

यावेळी बोलताना प्रमोद भानगिरे यांनी महापालिका प्रशासनावर गंभीर भ्रष्टाचाराचे आरोप केले. “पावसाळ्यापूर्व कामांसाठी हजारो कोटी खर्च केल्याचा दावा केला जातो, पण प्रत्यक्षात पुणेकरांना पाण्यातून मार्ग काढावा लागत आहे. हा हजारो कोटींचा मलिदा नेमका कोणी खाल्ला?” असा थेट सवाल त्यांनी उपस्थित केला. पुणेकरांच्या पैशांची उधळपट्टी करणाऱ्या अधिकाऱ्यांना शिवसेना सोडणार नसल्याचा इशाराही त्यांनी दिला.

या आंदोलनातील दोन गोष्टी विशेष चर्चेचा विषय ठरल्या. पहिली म्हणजे, शिवसैनिकांनी महापालिकेतील अधिकाऱ्यांना प्रतीकात्मक स्वरूपात होड्या भेट दिल्या. शहरातील रस्त्यांवर पाणी साचत असल्याने “आता पुणेकरांनी होड्यांमधून प्रवास करावा का?” असा सवाल त्यांनी उपस्थित केला.

दुसरी आणि अधिक लक्षवेधी बाब म्हणजे मुळा-मुठा नदीतील जलपर्णीच्या समस्येकडे लक्ष वेधण्यासाठी कार्यकर्त्यांनी थेट अंगावर जलपर्णी परिधान केली होती. “मी पुण्यातली जलपर्णी… मला कधी काढणार?” असे फलक हातात घेऊन त्यांनी नदी स्वच्छतेच्या कामांवर प्रश्नचिन्ह उपस्थित केले. नदी स्वच्छतेच्या नावाखाली कोट्यवधी रुपयांचा खर्च दाखवला जात असला, तरी प्रत्यक्षात परिस्थिती जैसे थे असल्याचा आरोप करण्यात आला.

आंदोलनात महिला आघाडी, युवासेना आणि शिवसेनेचे अनेक पदाधिकारी मोठ्या संख्येने सहभागी झाले होते. उपजिल्हाप्रमुख अमर घुले, माजी नगरसेविका सोनाली लांडगे, पंकज कोद्रे, विकी माने, अभिजित बोराटे, आनंद गोयल, मिलिंद अहिरे आणि दत्ता खवळे यांच्यासह अनेक कार्यकर्ते उपस्थित होते.

दरम्यान, पावसाळ्यापूर्व कामांतील कथित हलगर्जीपणा आणि भ्रष्टाचाराविरोधात आगामी काळात आणखी तीव्र आंदोलन छेडण्याचा इशारा शिवसेनेने दिला आहे. पहिल्याच पावसात पुणे तुंबल्याने आता नागरिकांकडूनही प्रशासनाविरोधात तीव्र नाराजी व्यक्त केली जात आहे.

Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/

Twitter – https://x.com/NewsDotz

Also Read: Pune’s Latest Information

FacebookWhatsAppXTelegramThreadsLinkedInGmailShare

About The Author

Sayali Memane

Sayali Memane is a Pune-based journalist at NewsDotz, covering Maharashtra news, current affairs, and trending updates. She focuses on clear, factual, and fast digital reporting, delivering reliable news content tailored for modern audiences across platforms.

See author's posts