Pune Golf: कॅडींच्या ८० मुलांच्या शिक्षणासाठी पुढाकार; पूना क्लबमध्ये दिग्गज गोल्फपटू एकवटले
Pune Golf: कॅडींच्या ८० मुलांच्या शिक्षणासाठी पुढाकार; पूना क्लबमध्ये दिग्गज गोल्फपटू एकवटले
पूना क्लब आणि ATRI मुंबई गरुडाज यांच्या कॅडी वेल्फेअर गोल्फ चॅम्पियनशिपमध्ये २०० गोल्फपटू सहभागी झाले. या उपक्रमातून कॅडींच्या सुमारे ८० मुलांच्या शिक्षणाला मदत केली जाणार आहे.
पुणे 25 ऑगस्ट 2026 : पुण्यात व्यावसायिक गोल्फ आणि सामाजिक बांधिलकीचा अनोखा मेळ घालणारी ‘कॅडी वेल्फेअर गोल्फ चॅम्पियनशिप २०२६’ पूना क्लब गोल्फ कोर्सवर उत्साहात पार पडली. इंडो-गोल्फ प्रीमियर लीगमधील आघाडीचा संघ असलेल्या एटीआरआय मुंबई गरुडाज गोल्फ क्लबने द पूना क्लब लिमिटेड आणि मुदिता फाउंडेशनच्या सहकार्याने या उपक्रमाचे आयोजन केले. कॅडींच्या मुलांना दीर्घकालीन शैक्षणिक मदत उपलब्ध करून देणे आणि त्यांच्या कुटुंबांसाठी प्रगतीचा शाश्वत मार्ग निर्माण करणे, हा या स्पर्धेचा प्रमुख उद्देश होता.
२२ आणि २३ ऑगस्टदरम्यान आयोजित उपक्रमात व्यावसायिक प्रशिक्षण, कनिष्ठ खेळाडूंसाठी गोल्फ क्लिनिक आणि प्रो-अॅम धर्मादाय स्पर्धेचा समावेश होता. ऑलिम्पियन गोल्फपटू उदयन माने, दोन वेळचा आयजीपीएल विजेता अमन राज, एशियन टूरवरील खेळाडू आदिल बेदी आणि उदयोन्मुख खेळाडू तुषार पन्नू यांनी कनिष्ठ गोल्फपटू आणि पूना क्लबच्या सदस्यांना मार्गदर्शन केले. गोल्फमधील तांत्रिक कौशल्य, मैदानावरील नियोजन, योग्य फटके निवडणे आणि स्पर्धात्मक खेळाचे मूलभूत धडे त्यांनी प्रशिक्षणार्थींना दिले.
मुख्य स्पर्धेत सुमारे २०० गोल्फपटू सहभागी झाले. टीम स्क्रॅम्बल स्वरूपातील या स्पर्धेत व्यावसायिक आणि हौशी खेळाडूंनी एकत्रितपणे मैदानात उतरून कॅडी कल्याणाच्या उपक्रमाला पाठिंबा दिला. प्रत्येक संघात व्यावसायिक गोल्फपटूसह हौशी खेळाडूंचा समावेश करण्यात आला होता. या स्वरूपामुळे अनुभवी खेळाडूंचे मार्गदर्शन मिळण्याबरोबरच गोल्फ समुदायामध्ये सामाजिक जबाबदारीबाबत जागरूकता निर्माण झाली. .
आयोजकांच्या माहितीनुसार, या उपक्रमातून कॅडींच्या सुमारे ८० मुलांच्या शिक्षणासाठी मदत उपलब्ध करून दिली जाणार आहे. मुदिता फाउंडेशनच्या माध्यमातून शालेय शिक्षणापासून महाविद्यालयीन आणि व्यावसायिक शिक्षणापर्यंत आवश्यक सहकार्य देण्याची योजना आखण्यात आली आहे. एटीआरआय मुंबई गरुडाजचे मुख्य कार्यकारी अधिकारी आणि व्यावसायिक गोल्फपटू राजीव दातार यांनी हा उपक्रम केवळ एका स्पर्धेपुरता मर्यादित न ठेवता मुलांना महाविद्यालयीन शिक्षणापर्यंत मदत देण्याचा प्रयत्न असल्याचे सांगितले.
द पूना क्लबचे उपाध्यक्ष आणि गोल्फ समन्वयक इंद्रनील मुजगुले यांच्या म्हणण्यानुसार क्लबकडून कॅडी आणि कर्मचाऱ्यांसाठी भोजन, आर्थिक साक्षरता तसेच व्यसनमुक्तीशी संबंधित उपक्रम राबवले जातात. मात्र, मुलांच्या उच्च शिक्षणावर लक्ष केंद्रित करणारी ही योजना कॅडी कुटुंबांच्या सामाजिक आणि आर्थिक परिस्थितीत दीर्घकालीन बदल घडवू शकते. शिक्षणाच्या माध्यमातून पुढील १० ते १५ वर्षांमध्ये कुटुंबांचे जीवनमान उंचावण्याचे उद्दिष्ट असल्याचे त्यांनी नमूद केले.
द पूना क्लबचे अध्यक्ष गौरव गढोके यांनी गोल्फ हा केवळ स्पर्धेपुरता मर्यादित न राहता अधिक सर्वसमावेशक व्हावा, अशी भूमिका मांडली. गोल्फपटूंच्या प्रत्येक सामन्यात महत्त्वाची भूमिका बजावणाऱ्या कॅडींच्या कुटुंबांना चांगल्या संधी उपलब्ध करून देणे ही गोल्फ समुदायाची जबाबदारी असल्याचे त्यांनी सांगितले. एटीआरआय मुंबई गरुडाजचे सहमालक ऋषभ किशोर आणि स्मृती किशोर यांनीही कॅडींना गोल्फ व्यवस्थेचा अविभाज्य घटक संबोधत त्यांच्या मुलांच्या शिक्षणासाठी शाश्वत व्यासपीठ उभारण्याचा संकल्प व्यक्त केला.
आयजीपीएलचे मुख्य कार्यकारी अधिकारी उत्तमसिंग मुंडी यांनी व्यावसायिक खेळाच्या विकासाबरोबरच त्याच्याशी जोडलेल्या समुदायाची प्रगती होणे आवश्यक असल्याचे सांगितले. पूना क्लब आणि एटीआरआय मुंबई गरुडाज हा उपक्रम दरवर्षी आयोजित करण्याचा विचार करत आहेत. याच धर्तीवरील पुढील स्पर्धा नोव्हेंबर २०२६ मध्ये मुंबईतील चेंबूर परिसरात आयोजित करण्याचे नियोजन आहे. त्यामुळे पुण्यात सुरू झालेला कॅडी कल्याणाचा हा उपक्रम देशातील अन्य गोल्फ क्लबपर्यंत पोहोचण्याची अपेक्षा व्यक्त केली जात आहे.
Also Read: Pune’s Latest Information
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/
Twitter – https://x.com/NewsDotz
Also Read: Pune’s Latest Information
About The Author
