Ganeshotsav 2025: पुण्यात ढोल-ताशा पथकांवर कारवाई होणार का? पोलिसांनी दिली स्पष्ट भूमिका
Ganeshotsav 2025: पुण्यात ढोल-ताशा पथकांवर कारवाई होणार का?
पुण्यातील गणेशोत्सव 2025 साठी ढोल-ताशा पथकांवर कारवाई होणार नसल्याचे पोलीस सहआयुक्त रंजनकुमार शर्मा यांनी स्पष्ट केले. डीजे मात्र बंद राहणार.
सायली मेमाणे
पुणे ११ जुलै २०२५ : पुणे शहरात गणेशोत्सव 2025 च्या तयारीला सुरुवात झाली असून, ढोल-ताशा पथकांबाबत यंदा महत्वाचा निर्णय घेण्यात आला आहे. पोलिस सहआयुक्त रंजनकुमार शर्मा यांनी जाहीर केले की पारंपरिक वाद्यांवर कोणताही गुन्हा दाखल केला जाणार नाही. त्याचबरोबर डीजेच्या वापरावर मात्र यंदाही बंदी असणार आहे.
पारंपरिक ढोल-ताशा हे महाराष्ट्रातील उत्सवांची आणि विशेषतः गणेशोत्सवाची एक आगळी वेगळी ओळख बनलेली आहे. पुण्यात कार्यरत असलेल्या अनेक ढोल-ताशा पथकांनी गेल्या काही वर्षांत पोलिस कारवाईच्या भीतीने आपला सराव आणि सहभाग मर्यादित केला होता. मात्र यंदा ढोल-ताशा महासंघ महाराष्ट्रतर्फे आयोजित वाद्यपूजन कार्यक्रमात पोलिसांनी या बाबत आश्वासन दिले.
ग्रामदैवत श्री कसबा गणपती मंदिरात झालेल्या कार्यक्रमात सहआयुक्त शर्मा, परिमंडळ १ चे उपायुक्त कृषिकेश रावले, श्रीमंत दगडूशेठ हलवाई ट्रस्टचे अध्यक्ष सुनील रासने, कोषाध्यक्ष महेश सूर्यवंशी आणि मुख्य विश्वस्त उपस्थित होते. यावेळी शर्मा यांनी स्पष्ट सांगितले की पारंपरिक वाद्यांविरोधात कोणतीही तक्रार किंवा गुन्हा नोंदवला जाणार नाही. जर असले तरी ते बंद केले जातील.
ते पुढे म्हणाले की, गेल्या वर्षी लेझर लाईटवर यशस्वी कारवाई करण्यात आली होती. त्यानंतर यंदा डीजेवर बंदी आणण्याचा कटाक्ष ठेवण्यात येईल. गणेशोत्सवाच्या सांस्कृतिक शुद्धतेसाठी आणि सामाजिक सलोख्यासाठी ही पावले महत्त्वाची आहेत.
दरम्यान, ढोल-ताशा पथकांच्या सरावाच्या वेळांबाबतही त्यांनी मार्गदर्शन केले. “दरवर्षी रात्री १० नंतर सरावामुळे पोलिस मुख्यालयात तक्रारींचे फोन येतात. त्यामुळे सर्व पथकांनी रात्री १० पूर्वी सराव थांबवावा. आपल्यामुळे इतरांना त्रास होऊ नये, याची दक्षता घ्यावी,” असे ते म्हणाले.
या निर्णयामुळे पुणे शहरातील ढोल-ताशा पथकांमध्ये आनंदाचे वातावरण असून, पारंपरिक वाद्यांच्या सन्मानासोबतच सांस्कृतिक वारशाला प्रोत्साहन मिळणार आहे. तर दुसरीकडे, डीजेवर बंदी आल्यामुळे ध्वनीप्रदूषण टाळण्यास मदत होणार असून उत्सव अधिक अनुशासित आणि पर्यावरणपूरक होईल.
