भारतीय रेल्वेने बदलले इमर्जन्सी कोटा नियम सर्वसामान्य प्रवाशांना मिळणार तातडीच्या तिकिटात सुलभता
🚆 इंडियन रेल्वेने 'इमर्जन्सी कोटा' नियमात मोठा बदल; सर्वसामान्य प्रवाशांना होणार फायदा
इंडियन रेल्वेने इमर्जन्सी कोटा (EQ) तिकीट बुकिंगसाठी नवीन नियम जारी केले आहेत. आता EQ अर्ज आगाऊ करणे बंधनकारक असून, सर्वसामान्य प्रवाशांसाठी प्रवास अधिक पारदर्शक व सोयीस्कर होणार आहे.
सायली मेमाणे
पुणे २४ जुलै २०२५ : रेल्वेने इमर्जन्सी कोटा (EQ) बुकिंग प्रक्रियेत मोठे बदल केले असून, प्रवाशांना ठराविक वेळेपूर्वी अर्ज सादर करणे आता अनिवार्य झाले आहे. रात्री १२ ते दुपारी २ या वेळेत निघणाऱ्या गाड्यांसाठी EQ अर्ज मागील दिवशी दुपारी १२ वाजेपर्यंत सादर करणे आवश्यक आहे, तर दुपारी २.०१ नंतर निघणाऱ्या गाड्यांसाठी हा अर्ज मागील दिवशी संध्याकाळी ४ वाजेपर्यंत सादर करावा लागेल. यामुळे EQ बुकिंग प्रक्रियेत पारदर्शकता येणार असून, वेळेत चार्ट तयार करणे शक्य होणार आहे.
जर प्रवास रविवार किंवा सार्वजनिक सुट्टीच्या दिवशी असेल, तर अर्ज सुट्टीच्या आधीच्या शेवटच्या कामकाजाच्या दिवशीच सादर करावा लागणार आहे. कारण सुट्टीच्या दिवशी रेल्वे बोर्डाच्या आरक्षण विभागात VIP आणि शासकीय मागण्या अधिक प्रमाणात येतात. त्यामुळे सर्वसामान्य प्रवाशांच्या EQ मागण्या वेळेत प्रक्रिया होण्यासाठी हा निर्णय घेतला गेला आहे.
रेल्वे अधिकाऱ्यांना निर्देश देण्यात आले असून, EQ साठी आलेल्या प्रत्येक अर्जाची कसून पडताळणी करावी लागणार आहे. या नव्या प्रक्रियेमुळे बनावट किंवा चुकीच्या माहितीवर आधारित अर्ज थांबवले जातील आणि गैरवापर टाळला जाईल.
याशिवाय, १ जुलैपासून रेल्वेने अंतिम आरक्षण यादी प्रवासाच्या ८ तास आधी तयार करण्याचा निर्णय घेतला आहे. याआधी ही यादी प्रवासाच्या फक्त २ तास आधी तयार होत होती. त्यामुळे प्रवाशांना वेळेत त्यांच्या प्रवासाबाबतची माहिती मिळणार आहे. तसेच, १५ जुलैपासून Tatkal तिकिटांसाठी आधार पडताळणी अनिवार्य करण्यात आली असून, त्यामुळे बुकिंग प्रणाली अधिक सुरक्षित आणि पारदर्शक होणार आहे.
या सुधारित नियमांमुळे वेटिंग लिस्टमधील प्रवाशांना निश्चित तिकीट मिळण्याची शक्यता वाढणार आहे. प्रवासाचे नियोजन अधिक सुकर होईल, आणि अखेरच्या क्षणी बदल करावे लागणार नाहीत. इमर्जन्सी कोटातील सुधारणांमुळे रेल्वे व्यवस्थापन अधिक उत्तरदायी बनले असून, कोट्यवधी प्रवाशांना याचा फायदा होणार आहे.
