कारगिल युद्धातील माजी सैनिकाला नागरिकत्व सिद्ध करण्यास भाग पाडल्याचा आरोप; पुण्यातील प्रकरणाने खळबळ
कारगिल युद्धातील माजी सैनिकाला नागरिकत्व सिद्ध करण्यास भाग पाडल्याचा आरोप
कारगिल युद्धात लढलेले निवृत्त सैनिक हकीमुद्दीन शेख यांना पुण्यात त्यांच्या नागरिकत्वाचा पुरावा देण्यास भाग पाडल्याचा आरोप; पोलिस कारवाईवर कुटुंबाची गंभीर प्रतिक्रिया.
सायली मेमाणे
पुणे ३१ जुलै २०२५ : कारगिल युद्धात देशासाठी लढा दिलेल्या एका निवृत्त सैनिकाला त्याचे भारतीय नागरिकत्व सिद्ध करण्यास भाग पाडल्याची घटना पुण्यात उघडकीस आली आहे. हकीमुद्दीन शेख या माजी सैनिकांच्या कुटुंबीयांनी आरोप केला की, २७ जुलै रोजी रात्री उशिरा चंदननगर येथील त्यांच्या घरी पोलिसांसह ३० ते ४० जणांनी अचानक धाड घालून ओळखपत्रांची मागणी केली. कुटुंबीयांना मोठ्या अपमानास्पद वागणुकीला सामोरे जावे लागले आणि पुरुष सदस्यांना पोलीस ठाण्यात नेण्यात आले.
५८ वर्षीय हकीमुद्दीन शेख यांनी १९८४ ते २००० या काळात भारतीय लष्कराच्या २६९ अभियंता रेजिमेंटमध्ये नाईक हवालदार म्हणून सेवा दिली. त्यांनी १९९९ च्या कारगिल युद्धात भाग घेतला होता. ते मूळचे उत्तर प्रदेशातील प्रतापगडचे असून, त्यांचे कुटुंब १९६० पासून पुण्यात स्थायिक आहे. त्यांच्या नातेवाइकांनी सांगितले की, शेख कुटुंबीयांनी आधार कार्डसारखी ओळखपत्रे दाखवली, परंतु त्यांना ती बनावट असल्याचे म्हटले गेले. महिलांवर ओरडण्यात आले आणि पोलिसांनीही जमाव रोखण्यासाठी कोणतेही पाऊल उचलले नाही, असा आरोप करण्यात आला आहे.
या प्रकरणी हकीमुद्दीन शेख म्हणाले, “मी देशासाठी १६ वर्षे सेवा दिली. कारगिलमध्ये लढलो. तरी आज आम्हाला आमचे नागरिकत्व सिद्ध करावे लागत आहे? हा अपमान आहे.” कुटुंबीयांनी याला पूर्ववैमनस्याचा भाग असल्याचे म्हटले असून, पोलिसांनी अशा प्रकारे गैरवर्तन करणे हा मानवाधिकारांचा भंग असल्याचेही त्यांनी स्पष्ट केले.
दरम्यान, पोलिस उपयुक्त सोमय मुंडे यांनी स्पष्टीकरण देताना सांगितले की, चंदननगर परिसरात काही बेकायदेशीर स्थलांतरितांविषयी माहिती मिळाल्यानंतर ही कारवाई करण्यात आली होती. भारतीय नागरिकत्व सिद्ध झाल्यावर सर्वांना सोडण्यात आले. यावेळी कोणत्याही तृतीयपंथी व्यक्तीसोबत आम्ही गेलो नव्हतो आणि आमच्याकडे संपूर्ण कारवाईचे व्हिडिओ फुटेज उपलब्ध असल्याचेही त्यांनी सांगितले.
ही घटना माजी सैनिक आणि त्यांच्या कुटुंबियांना समाजात पुन्हा पुन्हा स्वतःचे अस्तित्व सिद्ध करण्याची वेळ का येते, यावर गंभीर प्रश्न उपस्थित करते. देशासाठी बलिदान देणाऱ्यांना या प्रकारे वागवले जाणे समाजासाठी चिंतेचा विषय आहे.
