Baramati ST Attack: चालू एसटी बसमध्ये कोयत्याने हल्ला; प्रवासी गंभीर जखमी, हल्लेखोर ताब्यात
बारामती-इंदापूर बस मार्गावर काटेवाडी येथे धावत्या एसटी बसमध्ये कोयत्याने प्रवाशावर हल्ला
बारामती-इंदापूर एसटी बसमध्ये प्रवाशावर कोयत्याने भीषण हल्ला झाला. काटेवाडी येथे घडलेल्या या घटनेत हल्लेखोराने स्वतःवरही वार केला. दोघेही जखमी, पोलिस तपास सुरू.
सायली मेमाणे
पुणे १ ऑगस्ट २०२५ : बारामती-इंदापूर मार्गावरील काटेवाडी येथे शुक्रवारी सकाळी एक धक्कादायक घटना घडली. धावत्या एसटी बसमध्ये एका प्रवाशावर कोयत्याने हल्ला झाल्याने एकच खळबळ उडाली आहे. बसमध्ये बसलेल्या इतर प्रवाशांमध्ये भीतीचे वातावरण निर्माण झाले. विशेष म्हणजे, हल्लेखोराने कोयत्याने स्वतःवरही वार केल्याने तो देखील गंभीर जखमी झाला आहे. दोघांनाही तातडीने बारामती येथील रुग्णालयात दाखल करण्यात आले असून त्यांच्यावर उपचार सुरू आहेत. या घटनेमुळे बारामतीत पुन्हा एकदा गुन्हेगारीचा मुद्दा ऐरणीवर आला आहे.
प्रवाशांच्या सांगण्यानुसार ही घटना सकाळी साडेदहा वाजण्याच्या सुमारास घडली. एसटी बस काटेवाडी येथे थांबली असताना एका व्यक्तीने अचानक कोयता बाहेर काढून एका प्रवाशावर वार केला. बसमध्ये अचानक झालेल्या हल्ल्याने एकच गोंधळ उडाला आणि प्रवासी घाबरले. गंभीर जखमी प्रवाशाला तातडीने वैद्यकीय मदतीसाठी हलवण्यात आले. हल्लेखोराने स्वतःवरही वार करून स्वतःला जखमी केले. पोलिसांनी घटनेची माहिती मिळताच तत्काळ घटनास्थळी धाव घेतली आणि हल्लेखोराला ताब्यात घेतले. त्याच्यावर देखील उपचार सुरू आहेत.
या घटनेनंतर पोलीस तपास सुरू झाला असून हल्ल्याचं कारण वैयक्तिक वाद असल्याची शक्यता वर्तवण्यात येत आहे. या प्रकरणी बारामती पोलीस ठाण्यात गुन्हा दाखल करण्याची प्रक्रिया सुरू असून अधिक तपास पोलीस करत आहेत. सध्या दोघांच्याही प्रकृतीवर वैद्यकीय पथक लक्ष ठेवून आहे.
या घटनेमुळे बारामती शहरात पुन्हा एकदा नागरिकांच्या सुरक्षेचा प्रश्न ऐरणीवर आला आहे. काही दिवसांपूर्वीच शहरात चाकूहल्ला, अपहरण आणि मारहाणीच्या घटना घडल्या होत्या. अशा घटनांमुळे सामान्य प्रवाशांमध्ये भीतीचे वातावरण निर्माण झाले आहे. बारामतीत दिवसेंदिवस वाढणारी गुन्हेगारी ही पोलिस प्रशासनासाठी मोठे आव्हान ठरत आहे.
या घटनेने केवळ एक व्यक्ती नाही तर संपूर्ण प्रवासी वर्ग हादरला आहे. एसटीसारख्या सार्वजनिक वाहतूक सेवेतील सुरक्षिततेचा मुद्दा पुन्हा एकदा ऐरणीवर आला आहे. पोलिसांनी लवकरात लवकर या प्रकरणाचा तपास पूर्ण करून आरोपीविरोधात कडक कारवाई करावी, अशी मागणी प्रवाशांकडून होत आहे. या घटनेतून प्रवाशांच्या सुरक्षेसाठी आवश्यक उपाययोजना तातडीने करण्यात याव्यात, असा जनतेचा सूर आहे.
