श्रावण सोमवार 2025 : तिसऱ्या सोमवारसाठी त्र्यंबकेश्वरला जादा एसटी बसेस, दर 5 मिनिटांनी सेवा
तिसऱ्या श्रावण सोमवारसाठी त्र्यंबकेश्वरला ज्यादा बसेसचे नियोजन
श्रावणातील तिसऱ्या सोमवारसाठी त्र्यंबकेश्वर मंदिरात भाविकांची मोठी गर्दी अपेक्षित आहे. गर्दीचा विचार करून 10 व 11 ऑगस्टला दर 5 मिनिटांनी विशेष एसटी बसेस सोडण्याचे महामंडळाचे नियोजन. ब्रह्मगिरी प्रदक्षिणेसाठी भाविकांना दिलासा.
सायली मेमाणे
पुणे ७ ऑगस्ट २०२५ : श्रावण महिन्यात प्रत्येक सोमवारी त्र्यंबकेश्वर येथे मोठ्या प्रमाणावर भाविकांची गर्दी उसळते. विशेषतः तिसऱ्या श्रावण सोमवारच्या दिवशी ब्रह्मगिरी प्रदक्षिणेसाठी महाराष्ट्रातील विविध भागांतून भाविक येतात. या पार्श्वभूमीवर भाविकांची गैरसोय टाळण्यासाठी आणि वाहतुकीची अडचण निर्माण होऊ नये म्हणून महाराष्ट्र राज्य मार्ग परिवहन महामंडळाने (एसटी) विशेष नियोजन आखले आहे.
दहा आणि अकरा ऑगस्ट रोजी होणाऱ्या भाविकांच्या मोठ्या लोंढ्याला लक्षात घेता, एसटीने त्र्यंबकेश्वरकडे जाणाऱ्या अतिरिक्त बसेस चालवण्याचा निर्णय घेतला आहे. दर पाच मिनिटांनी एक एसटी बस भाविकांसाठी उपलब्ध करून दिली जाणार आहे, जेणेकरून त्यांना प्रदक्षिणा आणि दर्शनासाठी वेळेत पोहोचता येईल. या नियोजनामुळे गर्दीचे योग्य व्यवस्थापन होईल, तसेच स्थानिक वाहतुकीवरही ताण येणार नाही.
दरवर्षी त्र्यंबकेश्वर येथे लाखो भाविक श्रावण सोमवारच्या निमित्ताने दाखल होतात. यावेळी ब्रह्मगिरी पर्वताची प्रदक्षिणा करण्यासाठी तसेच भगवान त्र्यंबकेश्वराचे दर्शन घेण्यासाठी भक्तांची विशेष गर्दी पाहायला मिळते. त्यामुळे प्रशासनाकडून वाहतूक आणि सुरक्षेची चोख व्यवस्था केली जात असते. यंदाही पोलिस बंदोबस्त वाढविण्यात आला असून, स्थानिक प्रशासन आणि एसटी विभागात समन्वय ठेवून भाविकांच्या सोयीसाठी प्रयत्न केले जात आहेत.
या अतिरिक्त बससेवेचा लाभ पुणे, मुंबई, नाशिक, औरंगाबाद, धुळे, जळगाव यांसारख्या ठिकाणांहून येणाऱ्या भाविकांना होणार आहे. भाविकांनी एसटी विभागाच्या अधिकृत संकेतस्थळावर किंवा स्थानिक बसस्थानकावर बसची वेळ व माहिती तपासून नियोजन करणे गरजेचे आहे. भाविकांची संख्या लक्षात घेता, बसेसची संख्या वेळोवेळी वाढवण्याचा निर्णयही घेण्यात येऊ शकतो.
तिसऱ्या श्रावण सोमवारसाठी त्र्यंबकेश्वरला येणाऱ्या भाविकांनी वाहतुकीच्या नियोजनाचा लाभ घेऊन गर्दी टाळण्यासाठी आगाऊ नियोजन करावे, असे आवाहन प्रशासनाकडून करण्यात आले आहे.
