हिंगोलीत २५ हजाराची लाच घेताना बालविकास प्रकल्प अधिकारी एसीबीच्या जाळ्यात अडकला
हिंगोलीत २५ हजाराची लाच घेताना बालविकास प्रकल्प अधिकारी एसीबीच्या जाळ्यात अडकला
हिंगोलीतील बालविकास प्रकल्प अधिकारी विशालसिंह चव्हाण यांना २५ हजारांची लाच घेताना लाचलुचपत विभागाने रंगेहात पकडले. अंगणवाडी मदतनीसाकडून रुजू अहवालासाठी लाच मागितल्याची तक्रार एसीबीकडे दाखल झाली होती.
सायली मेमाणे
पुणे ७ ऑगस्ट २०२५ : हिंगोली जिल्ह्यात महिला व बालकल्याण विभागातील बालविकास प्रकल्प अधिकारी विशालसिंह चव्हाण यांना २५ हजार रुपयांची लाच स्वीकारताना लाचलुचपत प्रतिबंधक विभागाने रंगेहात पकडले आहे. अंगणवाडी मदतनीस कर्मचाऱ्यांकडून रुजू अहवाल देण्यासाठी त्यांनी पैशांची मागणी केल्याने तक्रारदार अंगणवाडी मदतनीसने एसीबीकडे तक्रार दाखल केली होती.
या तक्रारीच्या अनुषंगाने लाचलुचपत विभागाने सापळा रचला आणि अधिकारी विशालसिंह चव्हाण यांना २५ हजार रुपयांची लाच घेताना अटक केली. सदर प्रकारामुळे महिला व बालविकास विभागात खळबळ उडाली आहे. दरम्यान, या प्रकरणी हिंगोली शहर पोलीस ठाण्यात गुन्हा दाखल करण्यात आला आहे.
लाच स्वीकारताना सरकारी अधिकारी पकडला जाण्याच्या या प्रकारामुळे भ्रष्टाचारविरोधी कारवाईस चालना मिळाली आहे. हिंगोलीसारख्या जिल्ह्यातील अशा घटनांमुळे सामान्य कर्मचाऱ्यांमध्ये भीतीचे वातावरण निर्माण झाले असून, सरकारी यंत्रणांमध्ये पारदर्शकतेची मागणी पुन्हा एकदा पुढे आली आहे.
