Nashik News: दिंडोरीत हादरे आणि जोरदार आवाज; सुखोई विमानामुळे ‘सॉनिक बूम’चा अनुभव
Nashik News: दिंडोरीत हादरे आणि जोरदार आवाज; सुखोई विमानामुळे ‘सॉनिक बूम’चा अनुभव
नाशिकच्या दिंडोरीत जोरदार आवाज आणि जमिनीला बसलेले हादरे यामुळे घबराट. पोलिसांनी स्पष्ट केले की, हा आवाज भूकंपाचा नसून सुखोई विमानाच्या सॉनिक बूममुळे झाला.
सायली मेमाणे
पुणे १४ ऑगस्ट २०२५ :नाशिक जिल्ह्यातील दिंडोरी तालुक्यात आज अचानक जोरदार आवाजासह जमिनीला बसलेल्या हादऱ्यांमुळे नागरिकांमध्ये भीतीचे वातावरण निर्माण झाले. काही क्षणांसाठी घबराट पसरली आणि भूकंपाचे धक्के बसल्याची चर्चा सर्वत्र सुरू झाली. काहीजणांनी तर विमान अपघात झाल्याचा अंदाज व्यक्त केला. मात्र, नाशिक ग्रामीण पोलिसांनी स्पष्ट केले की हा आवाज भूकंपाचा नसून सुखोई लढाऊ विमानामुळे झाला असून, नागरिकांना कोणताही धोका नाही.
नाशिकच्या ओझर येथे हिंदुस्तान एरोनॉटिक्स लिमिटेड (HAL) या कंपनीचा लढाऊ विमानांचा कारखाना आहे. येथे सुखोई विमाने तयार केली जातात आणि त्यांचा नियमित सराव देखील सुरू असतो. आजच्या सरावादरम्यान सुखोई विमान जमिनीच्या अगदी जवळून गेले, ज्यामुळे प्रचंड दाब निर्माण झाला. या दाबाच्या लाटेमुळे दिंडोरी तालुक्यातील सुमारे २५ किलोमीटर परिसरातील अनेक घरांना हादरे बसले आणि काही घरांच्या काचा फुटल्या.
या घटनेनंतर नागरिकांनी मोठ्या प्रमाणावर पोलिसांशी संपर्क साधून माहिती विचारली. पोलीस अधीक्षक बाळासाहेब पाटील यांनी तातडीने तपास करून वस्तुस्थिती स्पष्ट केली. त्यांनी सांगितले की, ही घटना केवळ विमानाच्या सरावामुळे झाली आहे आणि त्यामध्ये कोणताही जीवितहानी किंवा मालमत्तेचा गंभीर धोका नाही. पोलिसांनी नागरिकांना आवाहन केले की, अशा प्रकारच्या घटना घडल्यास घाबरून न जाता प्रशासनाशी संपर्क साधावा आणि अफवांवर विश्वास ठेवू नये.
सुखोई सारखी सुपरसॉनिक विमाने जेव्हा कमी उंचीवरून वेगाने जातात, तेव्हा हवेत प्रचंड दाब तयार होतो. हा दाब जमिनीवर कंपन स्वरूपात जाणवतो आणि अनेकदा त्याचा परिणाम भूकंपासारखा भासतो. याला ‘सॉनिक बूम’ असे म्हणतात. आज नाशिकमध्ये झालेली घटना ही याच कारणामुळे घडली आहे.
दिंडोरी परिसरातील नागरिकांनी हादऱ्यांची तीव्रता अनुभवली आणि काचा फुटल्यामुळे सुरुवातीला परिस्थिती गंभीर असल्याचे वाटले. परंतु पोलिसांनी दिलेल्या माहितीमुळे भीती दूर झाली आहे. प्रशासनानेही स्पष्ट केले आहे की, HAL चा सराव हा नियमित स्वरूपाचा असून, त्यासाठी सर्व आवश्यक सुरक्षा नियम पाळले जातात.
या घटनेनंतर स्थानिक पातळीवर सजगता वाढली आहे. काही नागरिकांनी या सरावावेळी अगोदर माहिती द्यावी, अशी मागणी केली आहे, जेणेकरून अनावश्यक भीती टाळता येईल. नाशिक ग्रामीण पोलिसांनी नागरिकांना संयम राखण्याचे आणि अशा वेळी केवळ अधिकृत स्त्रोतांवरील माहितीवर विश्वास ठेवण्याचे आवाहन केले आहे. वस्तुस्थिती स्पष्ट झाल्यानंतर परिसरात शांतता परतली असून, नागरिकांना दिलासा मिळाला आहे.
