Bhandara News: घरात वडिलांचे पार्थिव, तरीही जान्हवीने दिली बारावीची परीक्षा; धैर्याला सलाम

भंडाऱ्यात वडिलांच्या निधनानंतरही जान्हवी राहांगडाले हिने बारावीचा इंग्रजी पेपर दिला. घरात पार्थिव असतानाही शिक्षणासाठी दाखवलेले धैर्य सर्वांना भावले.

पुणे ११ फेब्रुवारी २०२६ : नियतीचा खेळ कधी आणि कसा वळण घेतो, याचा नेम नसतो. भंडारा जिल्ह्यातील तुमसर तालुक्यातील आंबागड येथील जान्हवी हौशीलाल राहांगडाले हिची कहाणी याच गोष्टीची साक्ष देते. घरात वडिलांचे पार्थिव शांतपणे ठेवलेले असताना, डोळ्यात अश्रू आणि मनात वेदना घेऊन जान्हवी बारावीच्या पहिल्या पेपरसाठी परीक्षा केंद्रावर पोहोचली. तिच्या धैर्याने संपूर्ण परिसर भावूक झाला आहे.

जान्हवीचे वडील हौशीलाल राहांगडाले सोमवारी दुपारी सायकलने घरी परतत असताना अचानक तोल जाऊन खाली पडले. या अपघातात त्यांच्या डोक्याला गंभीर दुखापत झाली आणि त्यातच त्यांचा मृत्यू झाला. कुटुंबासाठी हा मोठा धक्का होता. घरात शोककळा पसरली होती. अशा वेळी प्रत्येक जण मानसिकदृष्ट्या खचून जातो, परंतु दुसऱ्याच दिवशी जान्हवीसमोर आयुष्याची निर्णायक परीक्षा उभी होती.

मंगळवारी, 10 फेब्रुवारी रोजी बारावी बोर्ड परीक्षेचा इंग्रजीचा पहिला पेपर होता. घरात वडिलांचे पार्थिव अंत्यसंस्काराची वाट पाहत होते. अशा परिस्थितीत परीक्षा देणे की नाही, हा मोठा प्रश्न तिच्यासमोर होता. मात्र वडिलांनी पाहिलेलं स्वप्न तिच्या डोळ्यांसमोर होतं. मुलगी शिकून मोठी व्हावी, आयुष्यात काहीतरी साध्य करावं, ही त्यांची इच्छा होती. हे स्वप्न पूर्ण करण्यासाठीच जान्हवीने स्वतःला सावरले.

सकाळी सुमारे 10 वाजता ती आपल्या मामाच्या मुलासोबत जनता विद्यालय व कनिष्ठ महाविद्यालय, तुमसर येथील परीक्षा केंद्रावर पोहोचली. डोळ्यांत अश्रू दाटलेले असतानाही तिने स्वतःला सावरत पेपर लिहिला. आयुष्याच्या अत्यंत कठीण टप्प्यावरही तिने दाखवलेले धैर्य आणि जबाबदारीची जाणीव सर्वांना प्रेरणा देणारी ठरली आहे.

परीक्षा केंद्रावरील शिक्षक, कर्मचारी आणि ग्रामस्थांनी तिचे सांत्वन केले. तिच्या परिस्थितीची जाणीव असूनही तिने परीक्षा देण्याचा घेतलेला निर्णय पाहून अनेकांनी तिच्या जिद्दीचे कौतुक केले. दुःखाचा डोंगर कोसळलेला असतानाही शिक्षणासाठी उचललेले हे पाऊल तिच्या आत्मविश्वासाचे द्योतक आहे.

ग्रामीण भागातील विद्यार्थ्यांसाठी शिक्षण हे आयुष्य बदलणारे साधन ठरते. प्रतिकूल परिस्थितीतही शिक्षणाचा ध्यास न सोडण्याची प्रेरणा जान्हवीने दिली आहे. वडिलांचे छत्र हरपले असले तरी त्यांच्या स्वप्नांचा वारसा पुढे नेण्याचा निर्धार तिने केला आहे. तिची ही कहाणी अनेकांना संकटसमयी धैर्याने उभे राहण्याची प्रेरणा देणारी आहे.

Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/
Twitter – https://x.com/NewsDotz

Also Read: Pune’s Latest Information

FacebookWhatsAppXTelegramThreadsLinkedInGmailShare