BMC आणि इतर महापालिका निवडणुका 2026 मध्ये? सरकारची दोन-तीन टप्प्यात निवडणूक घेण्याची तयारी
महापालिकेच्या निवडणुका २०२६ मध्ये? BMC निवडणूक जानेवारीत होणार का?
BMCसह महापालिका निवडणुका 2026 मध्ये होण्याची शक्यता. पहिल्या टप्प्यात नगरपालिका व जिल्हा परिषदा; निवडणुका दोन-तीन टप्प्यात होणार असल्याची सूत्रांची माहिती.
सायली मेमाणे
मुंबई ७ ऑगस्ट २०२५ : मुंबई – गेल्या काही वर्षांपासून प्रलंबित असलेल्या मुंबई महानगरपालिका (BMC) निवडणुकीसंदर्भात मोठी माहिती समोर आली आहे. सूत्रांच्या माहितीनुसार, मुंबईसह राज्यातील इतर महापालिकांच्या निवडणुका २०२६ मध्ये होण्याची शक्यता आहे. ही निवडणूक जानेवारी किंवा फेब्रुवारी महिन्यात घेतली जाऊ शकते, असे प्राथमिक संकेत देण्यात आले आहेत. त्यामुळे राज्यातील स्थानिक स्वराज्य संस्थांच्या राजकारणात मोठा उलथापालथ होण्याची शक्यता आहे.
राज्यात सध्या स्थानिक स्वराज्य संस्थांच्या निवडणुका प्रलंबित आहेत. त्यात विशेषतः नगरपालिका, जिल्हा परिषद आणि महापालिकांचा समावेश आहे. यापैकी नगरपालिका व जिल्हा परिषद निवडणुका नोव्हेंबर २०२५ नंतर होण्याची शक्यता असल्याचेही सांगितले जात आहे. अशा प्रकारे राज्य सरकार दोन ते तीन टप्प्यांमध्ये निवडणूक घेण्याची रणनीती आखत असल्याचे संकेत मिळत आहेत.
सध्या राज्यात सत्ताधारी महायुतीकडे अनेक मोठ्या शहरे व जिल्ह्यांची सूत्रे आहेत. परंतु २०२४ लोकसभा व २०२४ विधानसभा निवडणुका झाल्यानंतर आता स्थानिक स्वराज्य संस्थांवरील नियंत्रणाचे राजकारण अधिक तीव्र होण्याची शक्यता आहे. त्यामुळे भाजप, शिवसेना शिंदे गट, राष्ट्रवादी अजित पवार गट आणि महाविकास आघाडी यांच्यात आगामी निवडणुकांमध्ये जोरदार लढत पाहायला मिळेल.
मुंबई महानगरपालिका ही देशातील सर्वात मोठी महापालिका मानली जाते. सुमारे ४० हजार कोटी रुपयांच्या वार्षिक उत्पन्नासह बीएमसीवर नियंत्रण मिळविणे हे कोणत्याही पक्षासाठी अत्यंत प्रतिष्ठेचे मानले जाते. २०१७ पासून या महापालिकेवर निवडणुका झाल्या नाहीत. त्यामुळे सध्या प्रशासकांची नियुक्ती करण्यात आली असून, निवडणुका झाल्यानंतरच लोकप्रतिनिधी पुन्हा सत्तेत येणार आहेत.
राजकीय निरीक्षकांच्या मते, राज्यातील सध्याचे सत्तास्थिती आणि निवडणूक आयोगाचे वेळापत्रक पाहता, बीएमसीसह इतर महानगरपालिका निवडणुका २०२६ च्या सुरुवातीलाच होण्याची शक्यता अधिक आहे. त्यामुळे सर्वच पक्षांनी आतापासून तयारी सुरू केली आहे. शिवसेना (उद्धव बाळासाहेब ठाकरे गट), काँग्रेस व राष्ट्रवादी (शरद पवार गट) यांनी आधीच प्रचार मोहीम सुरु केली आहे, तर भाजप व महायुतीची प्रचार रणनिती लवकरच जाहीर होण्याची शक्यता आहे.
