Delhi Ashram Crime: स्वामी चैतन्यानंद बाबांवर 17 मुलींसोबत लैंगिक छळाचा गंभीर आरोप
Delhi Ashram Crime: स्वामी चैतन्यानंद बाबांवर 17 मुलींसोबत लैंगिक छळाचा गंभीर आरोप
दिल्लीतील वसंत कुंज आश्रमात स्वामी चैतन्यानंद बाबांवर 17 विद्यार्थिनींसोबत छेडछाड व बळजबरीने अश्लील वर्तन करण्याचा गंभीर आरोप; आरोपी अद्याप फरार, पोलिस तपास सुरू.
सायली मेमाणे
पुणे २४ सप्टेंबर २०२५ : दिल्लीच्या वसंत कुंज येथील एका नामांकित आश्रमात सुरू असलेल्या गंभीर गैरकृत्यांचा पर्दाफाश झाल्याने एकच खळबळ उडाली आहे. या आश्रमात शिकत असलेल्या १७ विद्यार्थिनींनी पोलिसांसमोर आपली तक्रार नोंदवली की, स्वामी चैतन्यानंद सरस्वती उर्फ पार्थ सारथी यांनी त्यांच्याबरोबर छेडछाड आणि बळजबरीने अश्लील वर्तन केले. त्यानंतर आरोपी तात्काळ आश्रमातून फरार झाला आहे.
श्री शृंगेरी मठ आणि त्याच्या मालमत्तांचे प्रशासक पी.ए. मुरली यांच्या तक्रारीवरून भारतीय न्याय संहितेच्या अनेक कलमांनुसार स्वामी चैतन्यानंद सरस्वतीविरुद्ध लैंगिक छळाचा गुन्हा दाखल करण्यात आला आहे. आश्रमात दोन बॅचेसमध्ये एकूण ३५ हून अधिक विद्यार्थिनी शिकत आहेत, त्यापैकी १७ जणींनी पोलिसांना दिलेल्या जबाबात आश्रम संचालकाने त्यांच्याबरोबर छेडछाड केल्याचे स्पष्ट केले आहे.
पोलीस तपासामध्ये सीसीटीव्ही फुटेज ताब्यात घेण्यात आले असून, संस्थेकडून मिळालेली हार्ड डिस्क एफएसएल तपासणीसाठी पाठवण्यात आली आहे. तसेच १६ पीडित विद्यार्थिनींचे जबाब न्यायालयात नोंदवण्यात आले आहेत. आश्रमाच्या व्यवस्थापनाने या प्रकरणावर स्पष्टीकरण दिले आहे की, स्वामी चैतन्यानंद बेकायदेशीर कामांमध्ये गुंतला होता, आणि त्याच्याविरुद्ध संबंधित अधिकाऱ्यांकडे तक्रार दाखल करण्यात आली आहे. पीठाने त्याच्याशी सर्व संबंध संपुष्टात आणले आहेत.
विद्यार्थिनींच्या तक्रारीत असेही म्हटले आहे की, स्वामीने ईडब्ल्यूएस शिष्यवृत्तीवर पोस्ट ग्रॅज्युएट डिप्लोमा (PGDM) कोर्स करत असलेल्या विद्यार्थिनींसोबत अश्लील वर्तन केले, आक्षेपार्ह मेसेज पाठवले, आणि बळजबरीने शारीरिक संबंध ठेवण्याचा प्रयत्न केला. काही महिला कर्मचारी आणि प्रशासकीय कर्मचाऱ्यांनीही आरोपीला साथ दिल्याचा आरोप आहे. आश्रमातील काही वॉर्डन विद्यार्थिनींना आरोपीला भेटण्यासाठी बोलवत होत्या, ज्यामुळे दबाव निर्माण झाला.
पोलीस तपासात असेही समोर आले की, आरोपी आपल्या महागड्या ‘व्होल्वो’ गाडीवर बनावट नंबर प्लेट लावून फिरत होता. गाडीवर “39 UN 1” असा बनावट नंबर असल्याचे दिसून आले. पोलिसांनी ही गाडी जप्त केली असून, आरोपीपर्यंत पोहोचण्याचा प्रयत्न सुरू आहे.
श्री शारदा इन्स्टिट्यूट ऑफ इंडियन मॅनेजमेंट-रिसर्च (वसंत कुंज, नवी दिल्ली) ही AICTE मान्यताप्राप्त संस्था असून, पीठाच्या अंतर्गत चालवली जाते. गव्हर्निंग कौन्सिलने आश्वासन दिले आहे की, विद्यार्थ्यांच्या हिताची पूर्ण सुरक्षा केली जाईल आणि त्यांच्या शिक्षण किंवा कार्यक्रमांमध्ये कोणत्याही अडथळा येणार नाही.
हा प्रकरण दिल्लीतील आश्रम चालवणाऱ्या संस्थांच्या पारदर्शकतेसाठी आणि विद्यार्थिनींच्या सुरक्षिततेसाठी गंभीर धक्कादायक आहे. पोलिस तपास चालू असून, आरोपी पकडण्यासाठी सर्वतोपरी प्रयत्न सुरु आहेत.
