Digital Scam: 9 कोटींचा ‘डिजिटल अरेस्ट’ बनाव उघड; बँक कर्मचाऱ्याच्या सतर्कतेमुळे मोठा घोटाळा टळला
Digital Scam: 9 कोटींचा ‘डिजिटल अरेस्ट’ बनाव उघड; बँक कर्मचाऱ्याच्या सतर्कतेमुळे मोठा घोटाळा टळला
Satara Digital Scam: डिजिटल अरेस्टच्या नावाखाली 85 वर्षीय निवृत्त शिक्षकाला 9 कोटींना गंडा घालणाऱ्या टोळीचा पर्दाफाश. PFI मनी लाँडरिंगची भीती दाखवून फसवणूक, बँक कर्मचाऱ्याच्या हुशारीने कट उघड.
पुणे २४ डिसेंबर २०२५ : Digital Scam: सायबर गुन्हेगारांकडून ‘डिजिटल अरेस्ट’च्या नावाखाली करण्यात येणाऱ्या फसवणुकीचे आणखी एक धक्कादायक प्रकरण समोर आले असून, मुंबई सायबर पोलिसांनी तब्बल 9 कोटी रुपयांच्या फसवणुकीचा बनाव उघडकीस आणला आहे. या प्रकरणात सातारा येथील 27 वर्षीय संग्राम बळीराम बाबर याला अटक करण्यात आली आहे. विशेष म्हणजे, आरोपी ज्या कंपनीचा संचालक असल्याचे भासवत होता, त्याच खात्याचा वापर करून यापूर्वीही ज्येष्ठ नागरिकांची 5.65 कोटी रुपयांची फसवणूक झाल्याची माहिती समोर आली आहे.
मिळालेल्या माहितीनुसार, 85 वर्षीय निवृत्त शिक्षकाला 1 डिसेंबर ते 22 डिसेंबर या कालावधीत त्यांच्या घरातच ‘डिजिटल अरेस्ट’ करून ठेवण्यात आले होते. आरोपींनी स्वतःला नाशिकच्या पंचवटी पोलीस ठाण्याचे पोलीस निरीक्षक दीपक शर्मा असल्याचे भासवले. तुमच्या नावे असलेल्या बँक खात्यातून प्रतिबंधित संघटना ‘पॉप्युलर फ्रंट ऑफ इंडिया’ (PFI) कडे मनी लाँडरिंगद्वारे पैसे पाठवले जात आहेत, असा गंभीर आरोप करत पीडिताला भीतीच्या छायेत ठेवण्यात आले.
सायबर भामट्यांनी व्हिडिओ कॉलच्या माध्यमातून गणवेशातील तोतया पोलीस अधिकारी दाखवले तसेच बनावट आरबीआय वॉरंटही सादर केले. यामुळे पीडिताचा विश्वास अधिकच दृढ झाला. तपास सुरू असल्याचे सांगून, तुमची सर्व रक्कम सर्वोच्च न्यायालयाच्या खात्यात तातडीने वर्ग करावी लागेल, अन्यथा अटक केली जाईल, अशी धमकी देत आरोपींनी पीडिताकडून टप्प्याटप्प्याने तब्बल 9 कोटी रुपये उकळले.
या संपूर्ण प्रकारात पीडित शिक्षकाला मानसिकदृष्ट्या पूर्णपणे दबावाखाली ठेवण्यात आले होते. सतत फोन कॉल, व्हिडिओ कॉल आणि बनावट कागदपत्रांच्या आधारे त्यांना बाहेर कोणाशीही बोलू नये, असे सांगून ‘डिजिटल अरेस्ट’मध्ये ठेवण्यात आले. त्यामुळे दीर्घकाळ ही फसवणूक कोणाच्या लक्षात आली नाही.
मात्र, जेव्हा पीडित शिक्षक बँकेत जाऊन मोठी रक्कम ट्रान्सफर करत होते, तेव्हा बँकेतील सतर्क कर्मचाऱ्याला संशय आला. व्यवहाराची रक्कम आणि परिस्थिती लक्षात घेऊन संबंधित कर्मचाऱ्याने तात्काळ पीडिताच्या कुटुंबीयांना माहिती दिली. कुटुंबीयांनी पोलिसांशी संपर्क साधताच हा संपूर्ण फसवणुकीचा कट उघडकीस आला.
मुंबई सायबर पोलिसांनी तातडीने कारवाई करत या प्रकरणाचा तपास हाती घेतला. सहपोलीस आयुक्त (गुन्हे) लक्ष्मी गौतम आणि वरिष्ठ पोलीस निरीक्षक नंदकुमार गोपाळे यांच्या मार्गदर्शनाखाली तपास सुरू असून, या टोळीत आणखी किती आरोपी सामील आहेत, याचा शोध घेतला जात आहे. पोलिसांकडून संबंधित बँक खाती, कॉल रेकॉर्ड्स आणि डिजिटल पुरावे तपासले जात आहेत.
या घटनेमुळे ‘डिजिटल अरेस्ट’च्या नावाखाली होणाऱ्या सायबर फसवणुकीचा धोका पुन्हा एकदा अधोरेखित झाला आहे. पोलीस आणि बँक प्रशासनाने नागरिकांना अशा कॉल्सपासून सावध राहण्याचे आवाहन केले असून, कोणताही पोलीस किंवा सरकारी यंत्रणा फोन किंवा व्हिडिओ कॉलद्वारे पैसे ट्रान्सफर करण्यास सांगत नाही, असे स्पष्ट केले आहे.
Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/
Twitter – https://x.com/NewsDotz
Also Read: Pune’s Latest Information
