Girni Kamgar Housing Scheme 2025: मुंबईत गिरणी कामगारांना मिळणार घर, शिंदे सरकारचा मोठा निर्णय
मुंबईत गिरणी कामगारांना मिळणार घर, शिंदे सरकारचा मोठा निर्णय
मुंबईतील गिरणी कामगारांसाठी आनंदाची बातमी! उपमुख्यमंत्री एकनाथ शिंदे यांच्या बैठकीत गिरणी कामगारांना मुंबई व परिसरात घरे देण्याचा मोठा निर्णय घेण्यात आला. शेलू येथील घरे ऐच्छिक, दावा संपुष्टात येणार नाही. वाचा संपूर्ण माहिती.
सायली मेमाणे
पुणे ११ जुलै २०२५ : ही बातमी गिरणी कामगारांसाठी खरोखरच दिलासादायक आहे. राज्य सरकारने अखेर गिरणी कामगारांना मुंबई आणि परिसरात घरे देण्याबाबत मोठा निर्णय घेतला आहे. उद्योगमंत्री उदय सामंत यांनी विधानसभेत ही घोषणा करताना सांगितले की, मुंबई शहर आणि लगतच्या परिसरात जिथे जागा उपलब्ध असेल, त्या ठिकाणी गिरणी कामगारांसाठी घरे बांधण्यात येणार आहेत. उपमुख्यमंत्री एकनाथ शिंदे यांच्या अध्यक्षतेखाली झालेल्या बैठकीत हा निर्णय घेण्यात आला. हा निर्णय कामगारांच्या आंदोलनानंतर घेतल्याचेही त्यांनी स्पष्ट केले.
विशेष म्हणजे शेलू येथील घरांची बाब ऐच्छिक असून कोणत्याही गिरणी कामगारावर ती सक्तीची नसल्याचे मंत्री सामंत यांनी स्पष्ट केले. त्याचबरोबर २०२४ मध्ये ज्यांनी घरे घेतली नाहीत, त्यांचा घरावरचा दावा संपुष्टात येईल, अशा आशयाचा निर्णयही आता रद्द करण्यात आला आहे. शिंदे सरकारने यासंदर्भातील शासन निर्णयातील कलम क्रमांक १७ रद्द करण्याचा निर्णय घेतला आहे. त्यामुळे कोणत्याही पात्र गिरणी कामगाराला घरापासून वंचित ठेवले जाणार नाही, याची हमी सरकारने दिली आहे.
मिठागरांच्या जागांवर गिरणी कामगारांसाठी घरांची मागणी केंद्राकडे करण्यात आली असून या प्रकल्पासाठी झोपडपट्टी पुनर्वसन प्रकल्पांतर्गत कोटा देण्याचा विचार सरकार करत आहे. गिरणी कामगारांसाठी विशेष योजनांच्या माध्यमातून न्याय मिळावा आणि त्यांना मुंबई परिसरात स्वतःचं घर मिळावं, यासाठी शासन कटिबद्ध असल्याचे सामंत यांनी विधानसभेत स्पष्ट केले.
या बैठकीत घेतलेले निर्णय आणि सरकारची कार्यवाही पाहता, अनेक वर्षांपासून घराच्या प्रतीक्षेत असलेल्या गिरणी कामगारांना दिलासा मिळणार असून त्यांना मुंबईच्या हद्दीतच घर मिळण्याची शक्यता आता बळावली आहे.
Do-follow Links:
Instagram
YouTube
Facebook
Twitter
