Gondia Crime: ‘लॉलीपॉप’ गैरसमजातून शिक्षिकेकडून ९ वर्षीय विद्यार्थ्याला मारहाण; आमगावात संताप

गोंदिया जिल्ह्यातील आमगाव तालुक्यात ‘चूपरी’ शब्दाच्या गैरसमजातून शिक्षिकेने ९ वर्षीय विद्यार्थ्याला बेदम मारहाण केल्याचा आरोप. आईने पोलिसांत तक्रार दाखल केली असून गावात संताप व्यक्त होत आहे.

पुणे 12 फेब्रुवारी २०२६ : गोंदिया जिल्ह्यातील आमगाव तालुक्यातील गोरठा येथील आदर्श जिल्हा परिषद प्राथमिक शाळेत घडलेल्या एका धक्कादायक घटनेमुळे परिसरात संतापाची लाट उसळली आहे. ‘चूपरी’ या शब्दाच्या गैरसमजातून एका शिक्षिकेने ९ वर्षीय विद्यार्थ्याला बेदम मारहाण केल्याचा गंभीर आरोप समोर आला आहे. या प्रकरणी विद्यार्थ्याच्या आईने आमगाव पोलीस ठाण्यात तक्रार दाखल केली असून शिक्षण विभागाच्या कारवाईकडे सर्वांचे लक्ष लागले आहे.

मिळालेल्या माहितीनुसार, धैर्य मनोज मिश्रा (वय ९) हा दुपारच्या सुट्टीदरम्यान शाळेतील वॉशरूमकडे जात असताना आपल्या मित्राकडे असलेल्या लॉलीपॉपबाबत बोलत होता. ग्रामीण भागात लॉलीपॉपला ‘चूपरी’ असे संबोधले जाते. धैर्यने आपल्या मित्राला “माझी चूपरी मला दे” असे म्हटल्याचे सांगितले जाते. मात्र जवळ उभ्या असलेल्या एका विद्यार्थिनीने हा शब्द ऐकून गैरसमज करून घेतला. तिला धैर्यने शिक्षिका शोभा गिरडकर यांना उद्देशून अपमानास्पद शब्द वापरल्याचा संशय आला.

त्या विद्यार्थिनीने ही बाब संबंधित शिक्षिकेला सांगितल्यानंतर शिक्षिकेने धैर्यला बोलावून घेतले आणि त्याला बेदम मारहाण केल्याचा आरोप करण्यात आला आहे. विद्यार्थ्याला शारीरिक तसेच मानसिक त्रास झाल्याचे पालकांनी सांगितले आहे. शाळेतून घरी आल्यानंतर धैर्यने घडलेला प्रकार कुटुंबीयांना सांगितला. सायंकाळी त्याची आई राणी मिश्रा घरी आल्यानंतर मोठ्या मुलाकडूनही संपूर्ण माहिती मिळाली.

“माझ्या मुलाने कोणतीही चुकीची भाषा वापरलेली नव्हती. केवळ गैरसमजातून त्याला बेशुद्ध होईपर्यंत मारहाण करण्यात आली,” असा आरोप राणी मिश्रा यांनी केला आहे. घटनेनंतर धैर्य शाळेत जाण्यास घाबरत असल्याचेही त्यांनी सांगितले. दुसऱ्याच दिवशी त्यांनी आमगाव पोलीस ठाण्यात तक्रार दाखल केली.

राईट टू एज्युकेशन (RTE) कायद्यानुसार विद्यार्थ्यांवर शारीरिक शिक्षा करण्यास सक्त मनाई आहे. अशा परिस्थितीत संबंधित शिक्षिकेवर काय कारवाई केली जाणार, याकडे पालक आणि ग्रामस्थांचे लक्ष लागले आहे. पोलिसांनी तक्रारीची नोंद घेतली असून पुढील तपास सुरू असल्याची माहिती मिळत आहे.

दरम्यान, भंडारा–गोंदिया परिसरात आणखी एका धक्कादायक घटनेने खळबळ उडवली आहे. उपचाराच्या बहाण्याने अवघ्या १० दिवसांच्या बाळाची ३ लाख रुपयांत विक्री केल्याचा आरोप एका डॉक्टरवर करण्यात आला आहे. या प्रकरणी डॉ. नितेश बाजपेयी यांच्यासह पाच जणांविरुद्ध गुन्हा दाखल करण्यात आला असून एका महिलेला अटक करण्यात आली आहे. मुख्य आरोपी डॉक्टर फरार असल्याचे सांगितले जात आहे.

या दोन घटनांमुळे जिल्ह्यात संतापाचे वातावरण निर्माण झाले आहे. शिक्षण आणि वैद्यकीय क्षेत्रातील अशा प्रकारच्या गंभीर आरोपांमुळे नागरिकांमध्ये चिंता व्यक्त केली जात आहे. प्रशासनाकडून कठोर कारवाईची मागणी होत असून संबंधित प्रकरणांचा सखोल आणि निष्पक्ष तपास व्हावा, अशी मागणी स्थानिकांकडून करण्यात येत आहे.

Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/
Twitter – https://x.com/NewsDotz

Also Read: Pune’s Latest Information

FacebookWhatsAppXTelegramThreadsLinkedInGmailShare