India Rain Alert: उत्तराखंड, हिमाचल, राजस्थान आणि मध्यप्रदेशात मुसळधार पावसाचा इशारा
India Rain Alert: उत्तराखंड, हिमाचल, राजस्थान आणि मध्यप्रदेशात मुसळधार पावसाचा इशारा
भारतीय हवामान विभागाचा अलर्ट – आज उत्तराखंड, हिमाचल, राजस्थान आणि मध्यप्रदेशात अति मुसळधार पाऊस. दिल्ली व उत्तर प्रदेशात हलक्या ते मध्यम स्वरूपाचा पावसाचा अंदाज.
सायली मेमाणे
पुणे २९ ऑगस्ट २०२५ : भारतीय हवामान विभागाने आज देशातील काही राज्यांसाठी महत्त्वाचा अलर्ट जारी केला आहे. उत्तराखंड, हिमाचल प्रदेश, राजस्थान आणि मध्यप्रदेश या राज्यांमध्ये वरूणराजा आपला रौद्र अवतार दाखवणार असल्याचा अंदाज व्यक्त करण्यात आला आहे. अति मुसळधार पावसामुळे या राज्यांतील जनजीवन विस्कळीत होण्याची शक्यता वर्तवण्यात आली असून, नागरिकांना अनावश्यक प्रवास टाळण्याचे आवाहन हवामान विभागाने केले आहे.
हवामान विभागाच्या अंदाजानुसार डोंगराळ प्रदेशातील हिमाचल आणि उत्तराखंड या राज्यांमध्ये मुसळधार पावसामुळे भूस्खलनाचा धोका वाढू शकतो. त्यामुळे प्रवाशांनी आणि स्थानिक नागरिकांनी विशेष काळजी घेण्याची आवश्यकता आहे. अनेक नद्यांच्या पाण्याची पातळी वाढण्याची शक्यता असल्याने पूरस्थितीची शक्यता नाकारता येत नाही. विशेषतः दुर्गम भागात अडकलेल्या लोकांना सुरक्षित स्थळी हलवण्यासाठी प्रशासनाने सज्ज राहण्याची सूचना देण्यात आली आहे.
राजस्थान आणि मध्यप्रदेशातही पावसाचा जोर वाढेल असा अंदाज हवामान खात्याने वर्तवला आहे. ग्रामीण भागात शेतीसाठी हा पाऊस फायदेशीर ठरू शकतो, मात्र अति मुसळधार पावसामुळे रस्ते वाहतुकीवर परिणाम होऊ शकतो. अनेक भागात वाहतुकीला अडथळा निर्माण होऊन दैनंदिन जीवन विस्कळीत होण्याची शक्यता आहे.
दिल्लीच्या हवामानाबाबत बोलायचे झाल्यास राजधानीत आज हलका ते मध्यम स्वरूपाचा पाऊस होण्याची शक्यता व्यक्त केली आहे. यामुळे नागरिकांना काही प्रमाणात उकाड्यातून दिलासा मिळू शकतो. मात्र सततच्या पावसामुळे काही भागात पाणी साचण्याची शक्यता असल्याने नागरिकांनी बाहेर पडताना काळजी घेण्याचे आवाहन करण्यात आले आहे.
उत्तर प्रदेशात मात्र आज पावसापासून काही प्रमाणात दिलासा मिळेल. तरीदेखील 31 ऑगस्ट पासून 2 ते 3 सप्टेंबरदरम्यान पावसाचा जोर पुन्हा वाढेल असा अंदाज हवामान विभागाने दिला आहे. त्यामुळे शेतकऱ्यांना आगामी दिवसांमध्ये पावसाचे नियोजन लक्षात घेऊन शेतीकाम करावे लागणार आहे.
मुसळधार पावसामुळे निर्माण होणाऱ्या परिस्थितीला सामोरे जाण्यासाठी प्रशासनाने तयारी ठेवली आहे. विशेषतः डोंगराळ राज्यांमध्ये आपत्ती व्यवस्थापन पथक सज्ज ठेवण्यात आले आहे. नागरिकांनी अधिकृत हवामान विभागाच्या सूचनांचे पालन करणे आवश्यक आहे. अफवांवर विश्वास ठेवू नये आणि स्थानिक प्रशासनाशी संपर्कात राहावे, असेही आवाहन करण्यात आले आहे.
या पावसामुळे शेती, पिण्याच्या पाण्याची स्थिती आणि भूजल पातळीला दिलासा मिळू शकतो. मात्र अतिवृष्टीमुळे होणारे पूर, भूस्खलन आणि वाहतुकीतील अडथळे हे नागरिकांसाठी आव्हानात्मक ठरणार आहेत. त्यामुळे येणारे काही दिवस खबरदारीचे असून, सुरक्षिततेला प्राधान्य देणे गरजेचे आहे.
