Jalgaon Election 2026: जेलमधून विजय, नवख्यांचा उदय, दिग्गजांना धक्का; जळगाव निवडणुकीची 10 वैशिष्ट्ये
Jalgaon Election 2026: जेलमधून विजय, नवख्यांचा उदय, दिग्गजांना धक्का; जळगाव निवडणुकीची 10 वैशिष्ट्ये
Jalgaon Municipal Corporation Election 2026 मध्ये जेलमधून विजय, घराणेशाही, पक्षबदलाचा फटका आणि नव्या चेहऱ्यांचा उदय. जळगाव महापालिका निवडणुकीतील 10 ठळक वैशिष्ट्यांचा सविस्तर आढावा.
पुणे १८ जानेवारी २०२५: जळगाव महापालिका निवडणूक 2026 ने केवळ सत्तासमीकरणे बदलली नाहीत, तर संपूर्ण शहराच्या राजकीय वातावरणाला हादरवून टाकले. पक्षप्रवेश, घराणेशाही, आरोप-प्रत्यारोप, बंडखोरी आणि अनपेक्षित निकाल यामुळे ही निवडणूक राज्यभर चर्चेचा विषय ठरली. निकालानंतर समोर आलेली चित्रे पाहता, मतदारांनी यंदा पारंपरिक राजकारणाला धक्का देत बदलाचा स्पष्ट संदेश दिल्याचे दिसून आले.
या निवडणुकीतील सर्वात धक्कादायक आणि ऐतिहासिक घटना म्हणजे शिवसेना शिंदे गटाचे उमेदवार आणि माजी महापौर ललित कोल्हे यांचा कारागृहात असतानाच झालेला विजय. गंभीर आरोप, अडचणी आणि कारावास असूनही मतदारांनी दिलेला कौल राजकीय वर्तुळात मोठी चर्चा निर्माण करणारा ठरला. याचबरोबर कोल्हे कुटुंबाने निवडणुकीत ‘हॅट्रिक’ साधत इतिहास रचला. ललित कोल्हे यांच्यासह त्यांचा मुलगा पियुष कोल्हे आणि आई सिंधू कोल्हे हे तिघेही विजयी ठरले. एका कुटुंबातील तीन सदस्यांचा एकाचवेळी विजय ही बाब घराणेशाहीच्या चर्चेला पुन्हा धार देणारी ठरली.
महापालिकेच्या 75 पैकी 43 जागांवर नवे नगरसेवक निवडून आल्याने तब्बल 57 टक्के सभागृह नवे झाले आहे. या निकालातून ‘बदलाचा कौल’ मतदारांनी दिल्याचे स्पष्ट झाले. अनेक दिग्गज नेत्यांना पराभवाचा सामना करावा लागला, तर नव्या चेहऱ्यांनी संधीचे सोने करत राजकीय पटलावर जोरदार एंट्री केली.
राष्ट्रवादी काँग्रेस अजित पवार गटासाठी ही निवडणूक संमिश्र ठरली. प्रफुल्ल देवकर यांच्या माध्यमातून महापालिकेत खाते उघडण्यात यश आले असले, तरी तेच गटाचे एकमेव विजयी उमेदवार ठरले. दुसरीकडे, शिंदे गटाचे आमदार चंद्रकांत सोनवणे यांच्या कुटुंबाने लक्षवेधी कामगिरी केली. त्यांचा मुलगा गौरव सोनवणे आणि मुलगी अमृता सोनवणे हे दोघेही विजयी झाल्याने एका घरातून दोन नगरसेवक सभागृहात जाणार आहेत.
या निवडणुकीत काही बिनविरोध जागाही चर्चेत राहिल्या. शिवसेना ठाकरे गटाचे उपमहापौर कुलभूषण पाटील यांच्या आईने उमेदवारी माघार घेतल्याने भाजपचा उमेदवार बिनविरोध निवडून आला. मात्र त्याचवेळी कुलभूषण पाटील यांचा पराभव झाला, हा निकाल अनेकांसाठी धक्कादायक ठरला. 158 अपक्ष उमेदवार रिंगणात असतानाही केवळ भारती सोनवणे या एकमेव अपक्ष उमेदवार विजयी ठरल्या, हेही विशेष ठरले.
पक्षबदलाचा फटका मतदारांनी स्पष्टपणे दाखवून दिला. ठाकरे गटातून भाजपमध्ये आणि नंतर अजित पवार गटात गेलेले माजी नगरसेवक प्रशांत नाईक यांना पराभव पत्करावा लागला. आरपीआय आठवले गटाने भाजपच्या चिन्हावर निवडणूक लढवत प्रथमच महापालिकेत खाते उघडले, तर जयश्री महाजन आणि सुनील महाजन दाम्पत्याने कमळ चिन्हावर विजय मिळवत राजकीय विरोधाभास निर्माण केला.
एकूणच, जळगाव महापालिका निवडणूक 2026 ही केवळ आकड्यांची लढाई न राहता घराणेशाही, नव्या चेहऱ्यांचा उदय, पक्षबदलाचे परिणाम आणि धक्कादायक विजय-पराभव यांची साक्षीदार ठरली आहे. आता या निकालातून उभ्या राहणाऱ्या नव्या राजकीय समीकरणांमुळे जळगावच्या कारभाराला कोणती दिशा मिळते, याकडे सर्वांचे लक्ष लागले आहे.
Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/
Twitter – https://x.com/NewsDotz
Also Read: Pune’s Latest Information
