JM Mhatre ED Action: पनवेलचे माजी नगराध्यक्ष जे. एम. म्हात्रे यांच्यावर ईडीची कारवाई; ४४ कोटींच्या ठेवी, गुंतवणुकीवर टाच
पनवेलचे माजी नगराध्यक्ष जे. एम. म्हात्रे यांच्या ४४ कोटींच्या बँक ठेवी व म्युच्युअल फंड ईडीने गोठवले
पनवेलचे माजी नगराध्यक्ष जे. एम. म्हात्रे यांच्या ४४ कोटींच्या बँक ठेवी व म्युच्युअल फंड ईडीने गोठवले; वनजमिनीच्या बेकायदेशीर विक्री प्रकरणात मोठी कारवाई.
सायली मेमाणे
१९ जून २०२५ : पनवेलचे माजी नगराध्यक्ष आणि जे. एम. म्हात्रे इन्फ्रा प्रायव्हेट लिमिटेडचे संचालक जे. एम. म्हात्रे यांच्या विरोधात सक्तवसुली संचालनालयाने (ईडी) मोठी कारवाई केली आहे. मुंबईच्या दादर आणि पनवेलमधील त्यांच्या मालमत्तांवर ईडीने छापे टाकले असून, त्यांच्या बँक खात्यातील ४४ कोटी रुपयांच्या ठेवी व म्युच्युअल फंड गुंतवणूक गोठवण्यात आली आहे. याशिवाय १६.५ लाखांची रोकड जप्त करण्यात आली आहे.
ईडीच्या माहितीनुसार, म्हात्रे यांनी २००५ मध्ये सातबारा उताऱ्यात फेरफार करून पनवेल तालुक्यातील वहाळ गावातील वन विभागाच्या मालकीच्या जमिनीचा अवैधरित्या ताबा घेतला. ही जमीन स्वतःच्या मालकीची असल्याचे भासवून, त्यांनी तिचा काही भाग नॅशनल हायवे अथॉरिटी ऑफ इंडिया (NHAI) ला विकला. या विक्रीनंतर म्हात्रे यांना तब्बल ४२.४ कोटी रुपयांची मोबदला रक्कम मिळाली. तर त्यांचे सहकारी सय्यद मोहम्मद अब्दुल हमीद कादरी यांना ९.६९ कोटी रुपये मिळाले, असं ईडीच्या तपासातून स्पष्ट झालं आहे.
या संदर्भात वन विभागाने सप्टेंबर २०२४ मध्ये पनवेल पोलिस ठाण्यात तक्रार दाखल केली होती. त्यानंतर म्हात्रे आणि कादरी यांच्या विरोधात गुन्हा दाखल करण्यात आला होता. विशेष म्हणजे, ही जमीन १९७५ मध्ये महाराष्ट्र खासगी वन (अधिग्रहण) कायदा अंतर्गत सरकारने अधिग्रहित केली होती. ७/१२ उताऱ्यावर ‘वन विभाग, महाराष्ट्र सरकार’ असं नाव नमूद असतानाही, म्हात्रे यांनी नोंदीमध्ये फेरफार करून आपलं नाव दाखवून ही जमीन विकली, हे चौकशीत समोर आलं आहे.
ईडीने म्हात्रे यांच्यावर “प्रिव्हेन्शन ऑफ मनी लॉन्डरिंग अॅक्ट” (PMLA) अंतर्गत चौकशी सुरू केली असून, हे उत्पत्तीचे स्रोत बेकायदेशीर असल्याचा ठपका ठेवला आहे. त्यांना मुख्य आरोपी घोषित करण्यात आलं असून, पुढील आर्थिक गुन्हे अन्वेषण व न्यायालयीन प्रक्रिया सुरू आहे.
Do-follow Links:
Instagram: https://www.instagram.com/newsdotz/
YouTube: https://www.youtube.com/@NewsDotz
Facebook: https://www.facebook.com/profile.php?id=61573903448264
Twitter: https://x.com/NewsDotz
