Ladki Bahin Yojna: बुलढाण्यात लाडकी बहीण योजनेचा गैरवापर उघड, अपात्र शासकीय कर्मचाऱ्यांकडून 99 हजारांची वसुली
लाडकी बहीण योजनेचा गैरवापर उघड, अपात्र शासकीय कर्मचाऱ्यांकडून 99 हजारांची वसुली
बुलढाणा जिल्ह्यात मुख्यमंत्री माझी लाडकी बहीण योजनेचा गैरवापर करणाऱ्या शासकीय कर्मचाऱ्यांवर कारवाई सुरू झाली आहे. अपात्र कर्मचाऱ्यांकडून रक्कम वसूल करून शिस्तभंगाची प्रक्रिया राबवली जाणार आहे.
पुणे ८ जानेवारी २०२६ : राज्य सरकारची अत्यंत महत्त्वाकांक्षी योजना म्हणून ओळखली जाणारी ‘मुख्यमंत्री माझी लाडकी बहीण’ योजना आता गैरवापराच्या प्रकरणामुळे चर्चेत आली आहे. बुलढाणा जिल्ह्यात पात्रतेचे निकष धाब्यावर बसवून या योजनेचा लाभ घेणाऱ्या शासकीय कर्मचाऱ्यांचे पितळ उघडे पडले असून, प्रशासनाने त्यांच्यावर कारवाईचा बडगा उगारला आहे. शासनाची फसवणूक करून घेतलेल्या लाभाची रक्कम वसूल करण्याबरोबरच संबंधित कर्मचाऱ्यांवर शिस्तभंगाची कारवाई प्रस्तावित करण्यात आली आहे.
महिला व बालविकास विभागामार्फत राबवण्यात येणाऱ्या या योजनेचा उद्देश आर्थिकदृष्ट्या दुर्बल महिलांना थेट आर्थिक मदत देण्याचा आहे. मात्र, बुलढाणा जिल्ह्यात काही शासकीय कर्मचाऱ्यांनी आपली खरी माहिती लपवून या योजनेचा लाभ घेतल्याची बाब तपासात उघडकीस आली. शासनाकडून बुलढाणा जिल्ह्यातील विविध विभागांत कार्यरत असलेल्या 196 संशयास्पद कर्मचाऱ्यांची यादी महिला व बालविकास विभागाकडे पाठवण्यात आली होती. या यादीच्या सखोल पडताळणीनंतर धक्कादायक माहिती समोर आली.
तपासात असे आढळून आले की, या 196 पैकी 190 कर्मचारी अर्धवेळ स्वरूपात काम करणारे होते. त्यांचे वार्षिक उत्पन्न अडीच लाख रुपयांपेक्षा कमी असल्याने ते योजनेच्या निकषांनुसार पात्र ठरले. मात्र, उर्वरित सहा कर्मचारी हे पूर्णवेळ शासकीय सेवेत कार्यरत असूनही त्यांनी स्वतःला अपात्र असूनही पात्र असल्याचे भासवले. आवश्यक माहिती लपवून त्यांनी लाडकी बहीण योजनेचा लाभ घेतल्याचे स्पष्ट झाले.
या सहा अपात्र कर्मचाऱ्यांनी आतापर्यंत प्रत्येकी 16 हजार 500 रुपये इतकी आर्थिक मदत घेतली होती. ही बाब समोर येताच जिल्हा प्रशासनाने तातडीने पावले उचलली. संबंधित सर्व कर्मचाऱ्यांकडून एकूण 99 हजार रुपयांची रक्कम वसूल करण्यात आली आहे. शासनाच्या योजनेचा गैरफायदा घेतल्याने ही कारवाई करण्यात आल्याचे प्रशासनाकडून स्पष्ट करण्यात आले आहे.
फक्त रक्कम वसूल करून प्रशासन थांबणार नसून, आता या कर्मचाऱ्यांवर विभागीय चौकशी आणि शिस्तभंगाची कारवाई केली जाणार आहे. जिल्हा कार्यक्रम अधिकारी प्रमोद येंडोले यांनी दिलेल्या माहितीनुसार, या प्रकरणासंदर्भात जिल्हा परिषदेच्या मुख्य कार्यकारी अधिकाऱ्यांकडे रीतसर प्रस्ताव सादर करण्यात आला आहे. शासनाची दिशाभूल करणे आणि फसवणूक करणे हा गंभीर प्रकार असल्याने संबंधित कर्मचाऱ्यांवर कठोर कारवाई होण्याची शक्यता आहे.
या घटनेमुळे लाडकी बहीण योजनेच्या अंमलबजावणीवरही प्रश्नचिन्ह उपस्थित झाले आहे. गरजू महिलांपर्यंत मदत पोहोचावी, हा योजनेचा मुख्य उद्देश असताना शासकीय कर्मचाऱ्यांकडूनच नियमांचे उल्लंघन होत असल्याचे समोर आल्याने प्रशासन अधिक सतर्क झाले आहे. भविष्यात अशा प्रकारची पुनरावृत्ती होऊ नये यासाठी पडताळणी प्रक्रिया अधिक कडक करण्याचे संकेतही प्रशासनाकडून देण्यात आले आहेत. बुलढाण्यातील या कारवाईमुळे इतर जिल्ह्यांतील संशयास्पद लाभार्थ्यांवरही नजर ठेवली जाण्याची शक्यता व्यक्त केली जात आहे.
Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/
Twitter – https://x.com/NewsDotz
Also Read: Pune’s Latest Information
