MCA Election: मुंबई क्रिकेटमध्ये बिनविरोध अध्यक्षपद; अजिंक्य नाईक पुन्हा अध्यक्ष
MCA Election: मुंबई क्रिकेटमध्ये बिनविरोध अध्यक्षपद; अजिंक्य नाईक पुन्हा अध्यक्ष
MCA निवडणुकीत पडद्यामागील हालचालींनंतर मोठे उमेदवार माघारी; अजिंक्य नाईक यांची अध्यक्षपदी बिनविरोध निवड. इतर पदांसाठी 12 नोव्हेंबरला मतदान.
सायली मेमाणे
१० नोव्हेंबर २०२५ : मुंबई क्रिकेट असोसिएशनच्या निवडणुकीत या वर्षी मोठे नाट्यमय बदल पाहायला मिळाले असून अध्यक्षपदाची निवड बिनविरोध झाल्याने क्रीडा क्षेत्रात विशेष चर्चा रंगली आहे. भारतीय क्रिकेटची पंढरी म्हणून ओळखल्या जाणाऱ्या मुंबईतील MCA निवडणुकीत सुरुवातीला अनेक दिग्गजांनी अर्ज दाखल केल्याने मोठी चुरस निर्माण झाली होती. मात्र, अर्ज मागे घेण्याच्या अंतिम दिवशी झालेल्या जलद आणि निर्णायक पडद्यामागील हालचालींमुळे अध्यक्षपदाचा तिढा सुटला आणि विद्यमान अध्यक्ष अजिंक्य नाईक हे पुन्हा एकदा अध्यक्षपदी विराजमान होणार असल्याचे निश्चित झाले.
अर्ज माघारीच्या अखेरच्या दिवशी अचानक परिस्थिती बदलली. सुरुवातीला अध्यक्ष आणि उपाध्यक्षपदासाठी अनेक राजकीय व क्रीडाक्षेत्रातील दिग्गजांनी उमेदवारी दाखल केली होती. त्यात भाजप नेते प्रसाद लाड, माजी क्रिकेटपटू डायना एडल्जी आणि विहंग सरनाईक यांच्या नावांचा विशेष उल्लेख होत होता. पण महत्वाचे उमेदवारांनी एकामागोमाग एक अर्ज मागे घेताच निवडणूक बिनविरोध झाली. या सर्वांच्या माघारीनंतर अजिंक्य नाईक यांच्या नावावर शिक्कामोर्तब झाले आणि त्यांचा अध्यक्षपदी पुनर्विहार निश्चित झाला.
या घडामोडींच्या मागे मोठ्या नेत्यांची तीव्र चर्चासत्रे कार्यरत होती. MCA अध्यक्षपदाचा वाढता तिढा सोडवण्यासाठी काल रात्रीपासून तीन महत्त्वाच्या नेत्यांनी सतत संपर्क साधून रणनीती आखली. राष्ट्रवादी काँग्रेसचे वरिष्ठ नेते शरद पवार, मुख्यमंत्री देवेंद्र फडणवीस आणि भाजप नेते आशिष शेलार यांच्या चर्चेनंतर अध्यक्षपदाची निवडणूक बिनविरोध करण्याचा निर्णय घेण्यात आला. या तीन नेत्यांच्या निर्णयानेच निवडणुकीत निर्माण झालेला तिढा सुटला. तथापि, इतर पदांसाठी 12 नोव्हेंबरला होणारे मतदान पूर्वनियोजितप्रमाणेच पार पडणार आहे.
निवडणुकीत सुरुवातीला अनेक जणांनी विविध पदांसाठी अर्ज दाखल केले होते. ठाकरेंच्या गटाचे नेते मिलिंद नार्वेकर यांनी अध्यक्ष, उपाध्यक्ष, सचिव, सहसचिव आणि खजिनदार अशा पाच पदांसाठी अर्ज केले होते. याशिवाय जितेंद्र आव्हाड यांनी अध्यक्ष, उपाध्यक्ष आणि खजिनदार पदांसाठी उमेदवारी दाखल केली होती. विहंग सरनाईक यांनी अध्यक्षासह उपाध्यक्ष, सचिव आणि सहसचिवपदासाठी अर्ज दाखल करून निवडणुकीला रंगत आणली होती. या सगळ्यांमुळे MCA निवडणूक अत्यंत स्पर्धात्मक आणि गाजलेली मानली जात होती.
परंतु अध्यक्षपदाची निवड बिनविरोध झाल्याने आता सर्वांचे लक्ष इतर महत्त्वाच्या पदांकडे वळले आहे. मुंबई क्रिकेट असोसिएशनच्या कारभारात हे पदेही महत्त्वाची भूमिका बजावतात आणि कोणाला या पदांची जबाबदारी मिळते, हे पाहणे आगामी काळात महत्त्वाचे ठरणार आहे. MCA निवडणुकीत पडद्यामागे झालेल्या घडामोडींनी आणखी एकदा दाखवून दिले की मुंबई क्रिकेटमध्ये राजकारणाची छाया किती खोलवर आहे.
एकूणच, MCA निवडणुकीतील या अनपेक्षित पण समन्वयातून सुटलेल्या तिढ्यामुळे अजिंक्य नाईक यांच्या अध्यक्षपदाचा मार्ग सुकर झाला आहे. आता पुढील काळात MCA च्या कामकाजात कोणते नवे बदल दिसतील आणि मुंबई क्रिकेटचा कारभार कोणत्या दिशेने जाईल, हे पाहणे क्रीडारसिकांसाठी महत्वाचे ठरणार आहे.
