Mumbai Accident: लालबागच्या राजाचे दर्शन घेऊन परतणाऱ्या भाविकांना अपघात; तरुणाचा मृत्यू, एक जखमी
लालबागच्या राजाचे दर्शन घेऊन परतणाऱ्या भाविकांना अपघात; तरुणाचा मृत्यू, एक जखमी
मुंबई पवईत JVLR भवानी पेट्रोल पंपाजवळ बेस्ट बस आणि दुचाकीचा अपघात. लालबागच्या राजाचे दर्शन घेऊन परतणाऱ्या भाविकांपैकी एकाचा मृत्यू, दुसरा गंभीर जखमी.
सायली मेमाणे
पुणे ५ सप्टेंबर २०२५ : मुंबईत लालबागच्या राजाचे दर्शन घेऊन परतणाऱ्या भाविकांना भीषण अपघाताचा सामना करावा लागला आहे. पवई येथील JVLR भवानी पेट्रोल पंपाजवळ आज पहाटे बेस्ट बसने दुचाकीला धडक दिल्यामुळे एकाचा जागीच मृत्यू झाला असून दुसरा गंभीर जखमी झाला आहे. या घटनेने भाविकांमध्ये हळहळ व्यक्त केली जात आहे.
या अपघातात देवांश पटेल (२२) या तरुणाचा दुर्दैवी मृत्यू झाला आहे. तर त्याचा मित्र स्वप्नील विश्वकर्मा (२२) गंभीर जखमी असून, त्याच्यावर पवई रुग्णालयाच्या अतिदक्षता विभागात उपचार सुरू आहेत. दोघेही एमआयडीसी, अंधेरी येथील रहिवासी असल्याची माहिती पोलिसांनी दिली आहे.
घटनेच्या रात्री देवांश आणि स्वप्नील हे आपल्या मित्रांसोबत ॲक्टिव्हा स्कुटीवरून लालबागच्या राजाच्या दर्शनासाठी गेले होते. दर्शन घेतल्यानंतर ते पहाटेच्या सुमारास घरी परतत असताना पवईमध्ये त्यांच्या दुचाकीला बेस्ट बसने जोरदार धडक दिली. अपघात इतका भीषण होता की देवांशचा जागीच मृत्यू झाला, तर स्वप्नील गंभीर जखमी झाला.
ही घटना पहाटे घडल्याने परिसरात वर्दळ कमी होती. मात्र, अपघातानंतर पोलिसांना तातडीने कळविण्यात आले आणि ते घटनास्थळी दाखल झाले. जखमी स्वप्निलला तातडीने पवई रुग्णालयात हलविण्यात आले. पोलिसांनी अपघाताची नोंद केली असून बसचालकाच्या निष्काळजीपणामुळे ही दुर्घटना घडली का, याची तपासणी सुरू आहे.
या घटनेमुळे लालबागच्या राजाच्या भाविकांमध्ये शोककळा पसरली आहे. दरवर्षी लाखो भाविक बाप्पाच्या दर्शनासाठी लालबागमध्ये गर्दी करतात. मात्र, दर्शनानंतर घरी परतताना झालेल्या या अपघातामुळे भक्तांच्या सुरक्षेचा मुद्दा पुन्हा एकदा पुढे आला आहे.
मुंबईत सतत वाढणारी वाहनांची गर्दी, वाहतुकीचा ताण, तसेच सार्वजनिक वाहतुकीतील निष्काळजीपणामुळे अपघातांचे प्रमाण वाढत असल्याचे दिसून येत आहे. पोलिसांकडून या प्रकरणाचा तपास सुरू असून बसचालकावर कारवाई होण्याची शक्यता वर्तवली जात आहे.
