मुंबईत घातपाताचा कट उधळला; दिल्ली पोलिसांनी ISIS दहशतवादी ताब्यात घेतले
मुंबईत घातपाताचा कट उधळला; दिल्ली पोलिसांनी ISIS दहशतवादी ताब्यात घेतले
दिल्ली पोलिसांच्या स्पेशल सेल आणि केंद्रीय एजन्सींनी संयुक्त कारवाईत ISIS संबंधीत आफताब आणि सूफियान यांना अटक केली. या दोघांचा मुंबईत घातपाताचा कट होता, मात्र पोलिसांनी वेळेत कारवाई करून योजना उधळली.
सायली मेमाणे
पुणे १२ सप्टेंबर २०२५ : मुंबईसारख्या महानगराला हादरवून सोडणारी मोठी माहिती समोर आली आहे. दिल्ली पोलिसांच्या स्पेशल सेलने केंद्रीय एजन्सींसह संयुक्त कारवाई करत आयसिसशी संबंध असलेल्या दोन दहशतवाद्यांना ताब्यात घेतले आहे. मिळालेल्या माहितीनुसार, आफताब आणि सूफियान या दोघांचा मुंबईत मोठ्या प्रमाणात घातपात करण्याचा कट होता. मात्र, पोलिसांच्या दक्षतेमुळे हा कट उधळून लावण्यात आला असून मोठा अनर्थ टळला आहे.
दिल्ली पोलिसांनी दिलेल्या माहितीनुसार, आफताब आणि सूफियान या दोघांवर बराच काळ गुप्तपणे नजर ठेवण्यात आली होती. त्यांच्या हालचाली संशयास्पद वाटत असल्याने तपास अधिक खोल करण्यात आला. गुप्तचर विभागाच्या इनपुट्सनंतर दोघांना दिल्ली रेल्वे स्टेशन परिसरातून अटक करण्यात आली. पोलिस सूत्रांच्या माहितीनुसार, हे दोघे मुंबई गाठण्याच्या तयारीत होते आणि तिथे त्यांनी मोठ्या प्रमाणावर घातपात घडवून आणण्याची योजना आखली होती.
या कारवाईमुळे सुरक्षा यंत्रणांनी दिलासा घेतला असून, देशाच्या सुरक्षेला धोका निर्माण करणारा एक गंभीर कट वेळीच रोखण्यात आला आहे. मुंबई ही देशाची आर्थिक राजधानी असल्यामुळे येथे दहशतवादी संघटनांचे डोळे नेहमीच लागलेले असतात. याआधीही अनेकदा दहशतवादी हल्ल्यांचे मुंबईने दाहक जखमा सोसल्या आहेत. त्यामुळे या नव्या कटामुळे पुन्हा एकदा सुरक्षेचा प्रश्न ऐरणीवर आला आहे.
स्पेशल सेलच्या अधिकाऱ्यांनी सांगितले की, अटक करण्यात आलेल्या दोघांकडून चौकशी सुरू असून त्यांच्याकडून अनेक महत्त्वाची माहिती मिळण्याची शक्यता आहे. प्राथमिक तपासात त्यांचा संपर्क परदेशातील आयसिस नेटवर्कशी असल्याचे संकेत मिळाले आहेत. तसेच मुंबईतील काही संवेदनशील ठिकाणांचा उल्लेख त्यांच्या योजना दस्तऐवजांमध्ये असल्याचे समोर येत आहे. या ठिकाणी संभाव्य हल्ले घडवून आणण्याचा त्यांचा इरादा होता.
मुंबई पोलिस आणि महाराष्ट्र ATS यांनाही या अटकेची माहिती देण्यात आली असून, राज्यभर सुरक्षा वाढवण्यात आली आहे. विशेषतः रेल्वे स्थानके, विमानतळ, धार्मिक स्थळे आणि गर्दीची बाजारपेठ या ठिकाणी पोलिसांनी सुरक्षा कडेकोट केली आहे. नागरिकांना सतर्क राहण्याचे आवाहन करण्यात आले असून कोणतीही संशयास्पद हालचाल दिसल्यास तात्काळ पोलिसांना कळवण्याचे आवाहन करण्यात आले आहे.
या घटनेमुळे पुन्हा एकदा दहशतवादी संघटनांच्या भारतावरील डोळस योजनांचा पर्दाफाश झाला आहे. गेल्या काही वर्षांत विविध राज्यांमध्ये ISIS शी संबंधित तरुणांना अटक करण्यात आली आहे. डिजिटल प्लॅटफॉर्म, सोशल मीडिया आणि इतर माध्यमांतून या संघटनेचे जाळे तरुणांना आकर्षित करण्यासाठी कार्यरत आहे. अशा पार्श्वभूमीवर ही अटक अत्यंत गंभीर मानली जात आहे.
आफताब आणि सूफियान या दोघांचा तपास राष्ट्रीय तपास यंत्रणांकडेही सोपवला जाण्याची शक्यता असून त्यांच्या संपर्कातील इतर साथीदारांचा शोध घेतला जात आहे. या प्रकरणामुळे पुन्हा एकदा मुंबई आणि देशभरातील नागरिकांनी सतर्क राहण्याची गरज अधोरेखित झाली आहे. पोलिसांनी दाखवलेली तत्परता आणि सुरक्षा यंत्रणांची वेळेवरची कारवाई यामुळे एक भीषण घटना घडण्यापूर्वीच रोखण्यात यश मिळाले आहे.
