Nagpur Water Contamination: दूषित पाण्यामुळे सावनेर तालुक्यात खळबळ; एकाच वेळी 80 नागरिक रुग्णालयात, प्रशासनावर गंभीर आरोप

नागपूरच्या सावनेर तालुक्यातील खैरी ढालगाव येथे दूषित पाणीपुरवठ्यामुळे 80 नागरिकांची प्रकृती खालावली. पाईपलाईन फुटल्यानंतर प्रशासनाच्या दिरंगाईमुळे आरोग्य संकट, गावात तात्पुरता वैद्यकीय कॅम्प सुरू.

पुणे ८ जानेवारी २०२६ : नागपूर जिल्ह्यातील सावनेर तालुक्यातून एक धक्कादायक आणि चिंताजनक प्रकार समोर आला असून दूषित पाणीपुरवठ्यामुळे संपूर्ण गाव भयभीत झाले आहे. खैरी ढालगाव या गावात एकाच वेळी तब्बल 80 नागरिकांची प्रकृती खालावल्याने आरोग्य यंत्रणेसह प्रशासनाची मोठी कसोटी लागली आहे. या घटनेमुळे प्रशासनाच्या हलगर्जीपणावर तीव्र प्रश्नचिन्ह उपस्थित होत असून ग्रामस्थांमध्ये संतापाचे वातावरण निर्माण झाले आहे.

मिळालेल्या माहितीनुसार, 3 जानेवारी रोजी खैरी ढालगाव येथे मुख्य पाणीपुरवठा करणारी जलवाहिनी फुटली होती. एका इलेक्ट्रिक पोल वाहून नेणाऱ्या ट्रॅक्टरच्या दाबामुळे ही पाइपलाइन फुटल्याचे सांगण्यात येत आहे. मात्र, ही गंभीर बाब असूनही ग्रामपंचायत प्रशासनाने सुरुवातीला याकडे दुर्लक्ष केल्याचा आरोप स्थानिक नागरिक करत आहेत. वेळेत दुरुस्ती न झाल्याने फुटलेल्या पाइपलाइनमधून दूषित पाणी थेट नळाद्वारे घराघरांत पोहोचले.

हेच दूषित पाणी नागरिकांनी पिल्याने 4 जानेवारीपासून गावात आजाराचे प्रमाण झपाट्याने वाढू लागले. नागरिकांना अचानक पोटदुखी, हगवण, उलट्या, मळमळ आणि अशक्तपणा यांसारख्या त्रासांना सामोरे जावे लागले. काही तासांतच रुग्णांची संख्या वाढू लागल्याने गावात एकच खळबळ उडाली. विशेष म्हणजे या रुग्णांमध्ये लहान मुले आणि वृद्ध नागरिकांचा मोठ्या प्रमाणावर समावेश असल्याने परिस्थिती अधिक गंभीर बनली.

परिस्थितीचे गांभीर्य लक्षात घेत प्राथमिक आरोग्य केंद्राच्या पथकाने तातडीने गावातच तात्पुरता वैद्यकीय कॅम्प सुरू केला. पहिल्या दिवशी 65 रुग्णांची नोंद झाली, तर दुसऱ्या दिवशी आणखी 25 नागरिकांना उपचारासाठी दाखल करण्यात आले. सध्या रुग्णांवर औषधोपचार सुरू असून बहुतांश रुग्णांची प्रकृती स्थिर असल्याचे आरोग्य विभागाकडून सांगण्यात आले आहे.

प्रशासनाच्या म्हणण्यानुसार, पाइपलाइन 4 जानेवारीलाच दुरुस्त करण्यात आली होती आणि सध्या पाणीपुरवठा सुरळीत आहे. तसेच कोणत्याही रुग्णाची प्रकृती गंभीर नसल्याचा दावा करण्यात आला आहे. खबरदारीचा उपाय म्हणून पाण्याचे नमुने प्रयोगशाळेत तपासणीसाठी पाठवण्यात आले असून अहवालाची प्रतीक्षा केली जात आहे.

मात्र, प्रशासनाच्या या दाव्यांवर गावकऱ्यांनी तीव्र नाराजी व्यक्त केली आहे. ग्रामस्थांचा आरोप आहे की, सुरुवातीपासूनच प्रशासनाने हलगर्जीपणा केला आणि पाणीपुरवठा बंद न करता दूषित पाणी नागरिकांच्या घरात सोडले गेले. काही नागरिकांनी हे प्रकरण दाबण्याचा प्रयत्न होत असल्याचाही आरोप केला आहे. वेळेत योग्य कारवाई झाली असती, तर इतक्या मोठ्या प्रमाणावर नागरिक आजारी पडले नसते, असा संतप्त सवाल ग्रामस्थ उपस्थित करत आहेत.

या घटनेमुळे ग्रामीण भागातील पाणीपुरवठा व्यवस्थेच्या सुरक्षिततेचा मुद्दा पुन्हा एकदा ऐरणीवर आला आहे. प्रशासन आता या प्रकरणाची सखोल चौकशी करणार का, दोषींवर कारवाई होणार का, याकडे संपूर्ण नागपूर जिल्ह्याचे लक्ष लागले आहे.

Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/
Twitter – https://x.com/NewsDotz

Also Read: Pune’s Latest Information

FacebookWhatsAppXTelegramThreadsLinkedInGmailShare