पुणेकरांसाठी कोजागरी पौर्णिमेची खास सोय; महापालिकेचा मोठा निर्णय
पुणेकरांसाठी कोजागरी पौर्णिमेची खास सोय; महापालिकेचा मोठा निर्णय
कोजागरी पौर्णिमेनिमित्त पुणेकरांना मध्यरात्रीपर्यंत बागा आणि उद्याने खुली राहणार. महापालिकेकडून सुरक्षितता, प्रकाश व्यवस्था आणि स्वच्छतेची विशेष सोय.
सायली मेमाणे
पुणे ५ ऑक्टोबर २०२५ : पुणेकरांसाठी यंदाची कोजागरी पौर्णिमा आणखी खास ठरणार आहे. पारंपरिक पद्धतीने पौर्णिमेचा आनंद नागरिकांना घेता यावा यासाठी पुणे महापालिकेने मोठा निर्णय घेतला आहे. शहरातील सर्व उद्याने आणि बागा कोजागरी पौर्णिमेच्या दिवशी रात्री बारा वाजेपर्यंत खुल्या ठेवण्यात येणार आहेत. यामुळे चांदण्यांच्या साक्षीने कुटुंबियांसह व मित्रपरिवारासोबत नागरिकांना कोजागरीचा उत्सव साजरा करण्याची संधी मिळणार आहे.
पारंपरिक पद्धतीने या दिवशी हजारो नागरिक दूधपानाचा कार्यक्रम करण्यासाठी एकत्र येतात. उद्यानांमध्ये, बागांमध्ये किंवा खुल्या जागांवर चंद्र पाहत दुधपान करताना आनंद, स्नेह आणि बंधुभाव वृद्धिंगत होतो. यंदा महापालिकेने केलेल्या या विशेष सोयीमुळे अधिकाधिक नागरिकांना सार्वजनिक ठिकाणी एकत्रितपणे हा सोहळा अनुभवता येणार आहे.
पालिकेकडून या निर्णयाच्या पार्श्वभूमीवर विशेष व्यवस्था करण्यात आली आहे. शहरातील उद्यानांमध्ये प्रकाशयोजना, अतिरिक्त सुरक्षा आणि स्वच्छतेची सोय उपलब्ध करून देण्यात येणार आहे. त्यामुळे नागरिक निर्धास्तपणे कुटुंबासोबत रात्री उशिरापर्यंत कोजागरीचा आनंद घेऊ शकतील. विशेषतः मोठ्या उद्यानांमध्ये महापालिकेच्या सुरक्षा रक्षकांसोबत पोलीस पथकांची गस्तही वाढवली जाणार आहे.
पुणेकर नेहमीच सांस्कृतिक आणि सामाजिक परंपरांचा उत्साहाने भाग घेतात. कोजागरी पौर्णिमेला शहरातील अनेक कुटुंबे एकत्र येऊन या खास परंपरेत सहभागी होतात. उद्याने आणि बागा यामुळे नागरिकांना सुरक्षित व मोकळं वातावरण मिळतं, ज्यामुळे चंद्र पाहण्याचा आणि रात्रीच्या सौंदर्याचा अनुभव अधिक खुलतो.
पालिकेने नागरिकांना स्वच्छतेची काळजी घेण्याचं आणि सार्वजनिक ठिकाणी कचरा न टाकण्याचं आवाहन केलं आहे. तसेच दूधपान कार्यक्रमासाठी येणाऱ्या कुटुंबांनी सणाचा आनंद घेताना सार्वजनिक शिस्त आणि सुरक्षितता पाळावी अशी विनंती करण्यात आली आहे.
या उपक्रमामुळे पुणेकरांना कोजागरी पौर्णिमेची रात्र अविस्मरणीय ठरणार आहे. कुटुंबियांसोबत, मित्रांसह आणि शेजाऱ्यांसह बागांमध्ये जमून चांदण्यांच्या प्रकाशात दुधपान करण्याचा आनंद यावर्षी अधिक खुला आणि आनंददायी होईल. महापालिकेचा हा निर्णय नागरिकांसाठी दिलासा देणारा आणि उत्सवाच्या आनंदात भर घालणारा ठरला आहे.
