Pune News: पुणे महानगरपालिका निवडणुकीत मतदारांची चांदी; थायलंड टूर, गुंठाभर जमीन आणि आलिशान गाड्यांची आमिषे

पुणे महानगरपालिका निवडणुकीच्या पार्श्वभूमीवर मतदारांना आकर्षित करण्यासाठी थायलंड टूर, गुंठाभर जमीन, एसयूव्ही कार आणि सोन्याच्या दागिन्यांची आमिषे दाखवली जात असून शहरात जोरदार चर्चा रंगली आहे.

पुणे २५ डिसेंबर २०२५ : पुणे महानगरपालिकेच्या निवडणुकीचा बिगुल वाजताच शहरातील राजकीय वातावरण तापू लागले आहे. 18 डिसेंबर रोजी निवडणुकीची अधिसूचना जाहीर झाल्यानंतर इच्छुक उमेदवारांनी मतदारांपर्यंत पोहोचण्यासाठी वेगवेगळ्या क्लुप्त्या लढवण्यास सुरुवात केली आहे. यंदाच्या निवडणुकीत केवळ हात जोडून किंवा आश्वासनांवर मते मागितली जात नसून, मतदारांना थेट आर्थिक आणि ऐषआरामी लाभांची स्वप्ने दाखवली जात असल्याचे चित्र समोर आले आहे. त्यामुळे पुण्यातील मतदारांची अक्षरशः चांदी झाल्याची चर्चा सुरू आहे.

शहरातील विविध प्रभागांमध्ये लकी ड्रॉ, भेटवस्तू योजना आणि सहलींच्या माध्यमातून मतदारांना आकर्षित करण्याचे प्रकार खुलेआम सुरू आहेत. प्रभाग क्रमांक 1 लोहगाव-धानोरी परिसरात एका इच्छुक उमेदवाराने दिलेल्या ऑफरमुळे मोठी खळबळ उडाली आहे. या ऑफरअंतर्गत लकी ड्रॉच्या माध्यमातून तब्बल 11 मतदारांना प्रत्येकी 1100 स्क्वेअर फूट म्हणजेच सुमारे एक गुंठा जमिनीचा प्लॉट देण्याचे आश्वासन देण्यात आले आहे. विशेष म्हणजे यासाठी मतदारांची रीतसर नोंदणीही करून घेण्यात आली असल्याचे बोलले जात आहे. या प्रकारामुळे निवडणूक आचारसंहितेवर प्रश्नचिन्ह उपस्थित होत आहे.

प्रभाग क्रमांक 3 विमाननगर परिसरात आणखी एक वेगळाच प्रकार समोर आला आहे. येथील काही इच्छुकांनी मतदार जोडप्यांसाठी पाच दिवसांची थायलंड सहल आयोजित केल्याची चर्चा शहरात रंगली आहे. ख्रिसमस आणि नवीन वर्षाच्या सुट्टीचा मुहूर्त साधून ही सहल आखण्यात आली असून, मतदारांना आकर्षित करण्याचा हा प्रयत्न असल्याचे बोलले जात आहे. परदेशी सहलीचे आमिष दाखवले जात असल्याने नागरिकांमध्ये आश्चर्य आणि संताप अशा संमिश्र प्रतिक्रिया उमटत आहेत.

याचबरोबर अनेक प्रभागांमध्ये भव्य बक्षीस योजनांची घोषणाही करण्यात आली आहे. लकी ड्रॉमध्ये प्रथम बक्षीस म्हणून आलिशान एसयूव्ही किंवा चारचाकी गाड्या देण्यात येणार असल्याचे जाहीर करण्यात आले आहे. महिला मतदारांसाठी सोन्याच्या अंगठ्या, नथ यांसारखे दागिने तर तरुण मतदारांसाठी स्टायलिश दुचाकी देण्याची घोषणा करण्यात आली आहे. या घोषणांमुळे निवडणूक प्रचाराचा सूरच बदलल्याचे चित्र दिसून येत आहे.

महिला मतदारांचे समर्थन मिळवण्यासाठी ‘होम मिनिस्टर’सारख्या कार्यक्रमांचे आयोजन मोठ्या प्रमाणावर केले जात आहे. या कार्यक्रमांत हजारो पैठणी साड्या, शिवणयंत्रे तसेच तरुण मुलींसाठी सायकलींचे वाटप केल्याचे प्रकार समोर येत आहेत. महिला आणि तरुणींची मते निर्णायक ठरणार असल्याने त्यांच्यासाठी खास भेटवस्तू देण्यावर भर दिला जात असल्याचे स्पष्ट होत आहे.

या सर्व प्रकारांमुळे पुणे महानगरपालिका निवडणूक केवळ राजकीय लढत न राहता आमिषांची स्पर्धा बनत चालल्याची टीका होत आहे. निवडणूक आयोग आणि प्रशासन यावर कारवाई करणार का, याकडे नागरिकांचे लक्ष लागले आहे. दरम्यान, या आमिषांमुळे मतदार खरोखर प्रभावित होणार की अशा प्रकारांना नकार देणार, हे मतदानाच्या दिवशीच स्पष्ट होणार आहे.

Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/
Twitter – https://x.com/NewsDotz

Also Read: Pune’s Latest Information

FacebookWhatsAppXTelegramThreadsLinkedInGmailShare