SBI 30 नोव्हेंबरपासून mCash सेवा बंद! मग पैसे ट्रान्सफर कसे कराल? जाणून घ्या पर्याय
SBI 30 नोव्हेंबरपासून mCash सेवा बंद! मग पैसे ट्रान्सफर कसे कराल? जाणून घ्या पर्याय
SBI ने 30 नोव्हेंबर 2025 पासून mCash सेवा बंद करण्याची घोषणा केली. योनो लाइट आणि Online SBI वरून mCash वापरता येणार नाही; पैसे ट्रान्सफरसाठी UPI, IMPS, NEFT, RTGS वापरण्याची सूचना.
सायली मेमाणे
पुणे १७ नोव्हेंबर २०२५ : भारतीय स्टेट बँकेने (SBI) त्यांच्या डिजिटल पेमेंट सेवांमध्ये मोठा बदल जाहीर केला आहे. 30 नोव्हेंबर 2025 पासून एसबीआयची लोकप्रिय mCash सेवा पूर्णपणे बंद करण्यात येणार आहे. ग्राहकांना लाभार्थी रजिस्ट्रेशनशिवाय पैसे पाठवण्याची सुविधा देणारी ही सेवा आता वापरता येणार नाही. Online SBI आणि YONO Lite ऍपवर mCash पाठवणे आणि दावा करण्याचा पर्याय रद्द करण्यात आल्याची माहिती बँकेने अधिकृतरीत्या दिली आहे.
एसबीआयने त्यांच्या वेबसाइटवर माहिती देताना सांगितले आहे की, पैसे पाठवण्यासाठी mCash हा पर्याय बंद होत असला तरी UPI, IMPS, NEFT आणि RTGS अशा इतर सुरक्षित व व्यापकपणे वापरल्या जाणाऱ्या डिजिटल पेमेंट पद्धती ग्राहक वापरू शकतात. त्यामुळे ग्राहकांना कोणत्याही प्रकारची अडचण येऊ नये, यासाठी सर्व पर्याय अपडेट स्वरूपात उपलब्ध आहेत.
mCash ही सेवा मुख्यतः त्यांच्यासाठी होती जे लाभार्थी माहिती नोंदवता केवळ मोबाइल नंबर किंवा ई-मेल आयडीवर पैसे पाठवू इच्छित होते. गुगल प्ले स्टोअरवरील SBI mCash अॅप डाउनलोड केल्यानंतर ग्राहक MPIN तयार करून लॉगइन करू शकत. नंतर पासकोड वापरून पैसे क्लेम करता येत आणि ती रक्कम कोणत्याही बँक खात्यात क्रेडिट केली जात असे. अनेक SBI ग्राहक जलद पेमेंट ट्रान्सफरसाठी ही सेवा वापरत होते.
mCash बंद झाल्यानंतर ग्राहकांना आता UPI सर्वात सोपा पर्याय ठरणार आहे. ‘BHIM SBI Pay’ हा एसबीआयचा अधिकृत UPI अॅप असून, त्याद्वारे ग्राहक सहजपणे पैसे पाठवू आणि मिळवू शकतात. UPI द्वारे बिल पेमेंट, रिचार्ज, ऑनलाइन खरेदी, QR कोड पेमेंट अशा अनेक सुविधा उपलब्ध आहेत. स्मार्टफोन असलेल्या कोणत्याही युजरसाठी ही पद्धत अत्यंत जलद आणि सुरक्षित आहे.
BHIM SBI Pay वापरून पैसे पाठवण्यासाठी ग्राहकाला अॅपमध्ये लॉग इन करून ‘Pay’ पर्याय निवडावयाचा आहे. त्यामध्ये VPA (UPI ID), Account Number + IFSC किंवा QR कोड यांपैकी कोणत्याही पर्यायाद्वारे पेमेंट करता येते. आवश्यक माहिती भरल्यानंतर लिंक केलेल्या खात्यांमधून डेबिट खाते निवडायचे आणि UPI PIN टाकून व्यवहार पूर्ण करायचा. काही सेकंदांत पैसे प्राप्तकर्त्याच्या खात्यात पोहोचतात.
IMPS हेही एक जलद पेमेंट माध्यम आहे. पैसे तात्काळ (24×7) दुसऱ्या खात्यात ट्रान्सफर करता येतात. तसेच NEFT आणि RTGS सारख्या पारंपरिक पद्धतीदेखील उपलब्ध आहेत. ज्यांना मोठ्या रकमेचे व्यवहार करायचे आहेत त्यांच्यासाठी RTGS उपयुक्त आहे, तर नियमित व्यवहारांसाठी NEFT व्यवहार सुरक्षित आणि सोपे आहेत.
SBI च्या या निर्णयाचा उद्देश डिजिटल पेमेंट पद्धती अधिक एकसंध, सुरक्षित आणि आधुनिक बनवणे हा आहे. mCash चे वापरकर्ते मोठ्या प्रमाणावर UPI कडे वळलेले असल्याने ही सेवा बंद करण्याचा निर्णय घेतल्याचे बँकेचे संकेत आहेत.
एकूणच, mCash सेवा 30 नोव्हेंबर 2025 नंतर पूर्णपणे बंद होणार असून, UPI, IMPS, NEFT आणि RTGS हे पर्याय एसबीआय ग्राहकांसाठी उपलब्ध राहतील. त्यामुळे ग्राहकांनी आता नवीन पेमेंट पर्यायांवर स्विच करून व्यवहार सुरळीत ठेवणे आवश्यक आहे.
