मुख्याध्यापिकेच्या अपमानामुळे विद्यार्थिनीची आत्महत्या – नवी मुंबई हादरली
मुख्याध्यापिकेच्या अपमानामुळे विद्यार्थिनीची आत्महत्या – नवी मुंबई हादरली
नवी मुंबईत ऐरोली येथे मुख्याध्यापिकेने सार्वजनिकपणे रागावल्यानंतर दहावीतील विद्यार्थिनीने आत्महत्या केली. अनुष्का शहाजी केवळे हिच्या या निर्णयाने समाजात हळहळ.
सायली मेमाणे
पुणे ६ ऑक्टोबर २०२५ : नवी मुंबईतील ऐरोली येथे घडलेली एक हृदयद्रावक घटना संपूर्ण समाजाला विचार करायला लावणारी ठरली आहे. ऐरोली येथील सुशिलाबाई देशमुख विद्यालयात शिक्षण घेणाऱ्या दहावीतील विद्यार्थिनी अनुष्का शहाजी केवळे हिने आत्महत्या करून आयुष्य संपवले. तिच्या या निर्णयाने परिसरात शोककळा पसरली आहे. अनुष्काने हे टोकाचे पाऊल उचलण्यामागे शाळेतील अपमान हा मुख्य कारण असल्याचा आरोप तिच्या पालकांनी केला आहे.
मिळालेल्या माहितीनुसार, काही दिवसांपूर्वी मुख्याध्यापिकेने अनुष्काला सार्वजनिकपणे रागावले होते. या अपमानाचा तिला इतका मानसिक आघात झाला की, तिने आत्महत्येसारखा टोकाचा निर्णय घेतला. शाळेत सार्वजनिकपणे झालेल्या या अपमानामुळे तिचा आत्मविश्वास डळमळीत झाला होता. पालकांनीही स्पष्टपणे आरोप केला आहे की, शाळेत झालेल्या या अपमानामुळेच अनुष्काने आत्महत्या केली आहे.
अनुष्का ही अभ्यासू, हुशार आणि शांत स्वभावाची मुलगी असल्याचे सांगितले जाते. दहावीच्या महत्वाच्या टप्प्यावर असताना तिच्याकडून अशा टोकाच्या पावलाची कोणीही अपेक्षा केली नव्हती. तिच्या मित्रमैत्रिणींनाही या घटनेचा मोठा धक्का बसला आहे. शाळेतील वातावरण आणि शिक्षकांचे वर्तन विद्यार्थ्यांच्या मानसिक आरोग्यावर किती मोठा परिणाम करू शकते याचा हा प्रकार गंभीर दाखला ठरत आहे.
या घटनेनंतर शाळा प्रशासनावर मोठ्या प्रमाणावर टीका होत आहे. विद्यार्थ्यांना शिस्त लावण्याच्या नावाखाली त्यांना सार्वजनिकपणे अपमानित करणे, त्यांच्या स्वाभिमानाला धक्का लावणे हे किती घातक ठरू शकते हे पुन्हा अधोरेखित झाले आहे. समाजमाध्यमांवरही या प्रकरणाबाबत तीव्र संताप व्यक्त केला जात आहे. अनेकांनी शिक्षण पद्धतीत सकारात्मक दृष्टिकोनाची गरज असल्याचे मत मांडले आहे.
अनुष्काच्या आत्महत्येनंतर पोलीस प्रशासनाकडूनही तपास सुरू करण्यात आला आहे. पालकांच्या जबाबावरून मुख्याध्यापिकेवर गुन्हा दाखल होण्याची शक्यता वर्तवली जात आहे. आत्महत्या प्रकरणी सखोल चौकशी करण्याचे आदेश देण्यात आले असून, शाळा प्रशासनाच्या भूमिकेवर प्रश्नचिन्ह उपस्थित झाले आहे.
अशा घटना टाळण्यासाठी शाळा स्तरावर मानसिक आरोग्य सल्लागारांची नेमणूक करणे, विद्यार्थ्यांशी सकारात्मक संवाद साधणे आणि त्यांना समजून घेण्याचा प्रयत्न करणे आवश्यक असल्याचे तज्ज्ञांचे मत आहे. किशोरवयीन मुलांवर अभ्यासाचा, करिअरचा आणि सामाजिक अपेक्षांचा प्रचंड दबाव असतो. त्यातच जर शाळेतील वातावरण त्रासदायक असेल तर विद्यार्थी तणावाखाली जाऊ शकतात. त्यामुळे पालक, शिक्षक आणि समाजाने एकत्रितपणे संवेदनशील दृष्टिकोन ठेवणे अत्यावश्यक आहे.
अनुष्काच्या आत्महत्येने केवळ तिच्या कुटुंबीयांवरच नव्हे, तर संपूर्ण समाजावर भावनिक धक्का दिला आहे. एका लहानशा अपमानाने विद्यार्थिनीने आपले आयुष्य संपवणे ही दुःखद बाब आहे. त्यामुळे शिक्षण क्षेत्रातील सर्व संबंधितांनी या घटनेतून शिकून विद्यार्थ्यांच्या मानसिक आरोग्याला प्राधान्य देणे अत्यावश्यक आहे.
