TMC Election 2026: ठाण्यात भाजपची धक्कादायक भूमिका; युतीवर प्रश्नचिन्ह, शिवसेनेला मोठा झटका

ठाणे महापालिका निवडणूक 2026 आधी भाजपच्या स्थानिक नेत्यांनी युतीला विरोध केल्याने महायुतीत तणाव. शिवसेना-भाजप युती तुटण्याची शक्यता?

पुणे १९ डिसेंबर २०२५ : ठाणे महापालिका निवडणूक 2026 च्या पार्श्वभूमीवर महायुतीमध्ये मोठ्या राजकीय घडामोडी घडताना दिसत आहेत. उपमुख्यमंत्री एकनाथ शिंदे यांचा बालेकिल्ला मानल्या जाणाऱ्या ठाण्यातच भाजपकडून धक्कादायक भूमिका समोर आली असून, त्यामुळे शिवसेना-भाजप युती टिकणार की नाही, याबाबत प्रश्नचिन्ह निर्माण झाले आहे. राज्यपातळीवर महापालिका निवडणुका एकत्रितपणे लढवण्याचा निर्णय झाला असला, तरी स्थानिक पातळीवर विरोधाची ठिणगी पडल्याचे स्पष्ट होत आहे.

शिवसेना आणि भाजप युती मजबूत करण्यासाठी उपमुख्यमंत्री एकनाथ शिंदे आणि भाजपचे प्रदेशाध्यक्ष रवींद्र चव्हाण यांच्यात बैठक झाली होती. मात्र या बैठकीनंतरही ठाण्यातील भाजप मंडळ अध्यक्षांनी थेट युतीला विरोध करत वरिष्ठांकडे लेखी निवेदन दिले आहे. ठाण्यात शिवसेनेसोबत युती नको, अशी स्पष्ट भूमिका घेत भाजप मंडळ अध्यक्षांनी रवींद्र चव्हाण यांची भेट घेतली. या निवेदनावरून भाजपच्या स्थानिक संघटनात्मक पातळीवर असंतोष उफाळून आला आहे.

भाजप मंडळ अध्यक्ष कृष्णा भुजबळ यांनी आमदार संजय केळकर, आमदार निरंजन डावखरे आणि ठाणे शहराध्यक्ष संदीप लेले यांना युतीविरोधी निवेदन दिल्याची माहिती समोर आली आहे. यामुळे महायुतीतील समन्वयावर प्रश्न उपस्थित झाले असून, ठाण्यात स्वतंत्र लढत होण्याची शक्यता नाकारता येत नाही.

दुसरीकडे, शिवसेनेतही अंतर्गत मतभेद चव्हाट्यावर आले आहेत. ठाण्यातील मनोरमा नगर प्रभाग क्रमांक तीनमध्ये स्थानिक उमेदवारालाच तिकीट द्यावे, अशी ठाम मागणी शिवसैनिक आणि स्थानिक पदाधिकाऱ्यांकडून होत आहे. शिवसेना शाखा प्रमुख देवानंद भगत आणि विक्रांत वायचाळ यांनी उमेदवार स्थानिक असावा, यावर जोर दिला आहे. या प्रभागात माजी नगरसेवक भूषण भोईर आणि मधुकर पावशे यांना स्थानिक पातळीवर विरोध होत असल्याचेही समोर आले आहे.

याच प्रभागातून माजी महापौर मीनाक्षी शिंदे यांचेही नाव चर्चेत असून, खासदार नरेश मस्के यांनाही स्थानिक शिवसैनिकांकडून पत्र देण्यात येणार असल्याची माहिती आहे. यामुळे शिवसेनेच्या गोटातही उमेदवारीवरून नाराजी आणि गटबाजी उघड झाली आहे.

महायुतीतील तणाव फक्त ठाण्यापुरताच मर्यादित नसून सोलापूर महापालिकेतही जागावाटपावरून संघर्ष दिसत आहे. शिवसेना शिंदे गटाकडून 50 टक्के जागांची मागणी करण्यात आली असून, सोलापूर जिल्हा संपर्क प्रमुख संजय कदम यांनी याबाबत स्पष्ट भूमिका मांडली आहे. युती झाली नाही, तर स्वबळावर लढण्यास आम्ही सक्षम आहोत, असा इशाराही त्यांनी दिला आहे.

राज्यस्तरावर युतीची घोषणा झाली असली, तरी स्थानिक पातळीवरील असंतोष, अंतर्गत वाद आणि जागावाटपाचा पेच यामुळे महायुतीची वाटचाल सोपी राहणार नाही, हे स्पष्ट होत आहे. ठाणे आणि सोलापूरसारख्या महत्त्वाच्या महापालिकांमध्ये युती टिकते की तुटते, याकडे आता संपूर्ण राज्याचे लक्ष लागले आहे.

Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/
Twitter – https://x.com/NewsDotz

Also Read: Pune’s Latest Information

FacebookWhatsAppXTelegramThreadsLinkedInGmailShare